是咁的，廿一歲有咗，所以我要做有錢人 - 另一條路

「可能你要借呢？嗱，依張我卡片，要錢咪搵我囉。」當初幫阿軒打理酒吧，輝哥嚟收數嘅時候畀我嘅卡片，我一直唔知點解有留低。

我佈滿紅筋嘅眼珠望住輝哥卡片上嘅電話，只要搵佢，畀啲錢，作為一個黑社會一定有辦法搞到阿糖佢哋雞犬不靈。

我拎出手機，逐個數字打入去。

可能叉咗隻腳入去同黑社會扯上關係，之後會好麻煩甩唔到身，但依一刻我真係諗唔到任何辦法。

拇指停喺通話鍵上面，我到底係撳落去，定係收手呢？465Please respect copyright.ＰＥＮＡＮＡ679nui8OQu

我真係㩒咗通話掣，打咗電話畀輝哥。多年無聽過嘅男聲再次響起。

「乜料？」

連開口我都要深呼吸，因為開始講嘢就返唔到轉頭。

「⋯⋯輝哥。」

「女人？你邊位呀？」

「我係阿軒以前女朋友。」

「⋯⋯⋯⋯哦！佢條舊菜，係喎，我畀過卡片你架喎。點呀？等錢使呀？」

「唔係，我想畀錢你使。」

輝哥肯定聽到一頭霧水：「吓？」

「我有嘢要搵你幫手，有酬勞。」

「呵，咩料呀？」

再一次深呼吸，今次真係最後機會，我到底係講定唔講好？

「喂？」

我想你幫我用黑社會嘅方法搞掂一個女仔，一個搶我生意嘅反骨妹。

我嘅呼吸愈嚟愈急促，拎住電話嘅手開始震，我係咪要做到噉？真係？

嗰一秒鐘我不停反問自己係講落去定就此收線，當咩事都無發生過。

就噉放過阿糖我條氣一定唔順，但搵黑社會搞佢會係條不歸路。

「講啦，想點呀？」輝哥再三催促，無幾多時間畀我再猶豫落去。

我好清楚邪念佈滿大腦每個角落，我嚟緊要講嘅說話將會大大影響我未來嘅人生走向。

全世界都靜落嚟等待我嘅決定，梓木都無喊，安然熟睡。無任何外在因素影響，連公公都唔喺我腦中，我下一剎那開口完完全全係個人決定。

「我想你⋯⋯」

幫我搞掂阿糖？

點解要搞掂佢？

長期習慣咗思考唔同問題嘅大腦好自然又轉起上嚟，我好清楚自己內心嘅怨念同憤恨好似想爆發嘅火山噉，滾熱嘅怒氣一直頂上喉嚨，但腦一開始轉，就會監生將怒氣暫時壓抑。

我曾經有過一個好深痛嘅教訓，就係我小學賣忌廉包嗰陣，因為當日我試咗一嚿鮮忌廉包就大腦過熱，被吸引到即刻投資去做，最後所有包壞晒，第一次正式創業出師未捷身先死。

當時我喺心入面講過，依種感性騎劫理性分析嘅錯唔可以再犯。

噉我依家係咪又要再犯依個被情緒波動而影響決定嘅錯誤？我唔想再犯錯。

唔想再錯，就唔好明知係錯都行埋去。細個賣忌廉包可以錯一次，但我嘅過去，我嘅歷史理應係一個教訓。如果我要求輝哥搞掂阿糖，噉即係我同大部分人類都係一樣無辦法喺歷史上吸取教訓。

一個人不停重複犯以前犯過嘅錯，佢注定無可能成功。

一念之間，我頓時覺得眼前嘅路變得無比清晰，我係仲好嬲，一肚悶氣無處抒發，但主要係嬲自己點會行到依一步，再下一步就真係無可挽回。

「想我點呀？嗱嗱臨講啦，咪屙兀尿噉。」

我想借暴力同非法手段解決阿糖，主要原因係佢背叛我，搶我生意。一旦我借助不當手段去解決依個問題，就代表我喺生意上無佢辦法，我白素怡作為一個商人就徹徹底底輸咗畀阿糖。

我唔想輸。

作為商人，要出一口氣就應該喺商場上同對手正面對決打低佢，而唔係諗啲旁門左道搞小動作。

我唔會墮落到好似阿糖噉，我一定有方法搶返啲生意返嚟！！！

「抄人嘅企業家，注定慢原創嘅企業家一步。」公公嘅教誨好似獎勵我懸崖勒馬噉再次喺腦中浮現。阿糖永遠慢我一步。

當佢只係搶緊我嘅女性客人生意嗰陣，我已經為開托男性客人做緊準備。

「畀多三秒你，再唔講我就收線。」

阿囡喺我身邊雖然無辦法幫我處理訂單，但佢一句無意中嘅說話就為我嘅反擊埋下伏筆。

「三。」

阿囡嘅價值遠比處理訂單更大，而幫男性客人改造型嘅知識我已經學得七七八八。

「二。」

我諗返第一次見輝哥嘅情景，當時我嘅生意唔係做服飾相關嘅嘢，所以無特別留意，今日再仔細回想，原來已經有一個機會擺喺眼前。

「一。」

或者打畀輝哥本來會係一條最壞嘅路，如果我拜托佢搞掂阿糖的話。

「我想你做我模特兒！」

但我揀咗另一條路，或者會有我意想不到嘅可能性。

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically