《屍河明居鑽石山》（是咁的，我發現打喪屍有得升呢） - 313

013

719Please respect copyright.ＰＥＮＡＮＡmixMcQ3YMS

原來喺我最後一跳時，個大隻佬同樣盡地一煲咁撲過嚟！

我見到佢直情成塊面撼咗落擋土牆度，抬起頭時個鼻爆咗，牆上一撻深綠屍水……

俾佢成功捉住咗我！

佢一用力捏我腳踝嗰時，我嗰吓痛到以為腳眼骨爆埋！

好痛！

佢再用力一扯！

我成個下半身，已被扯返出灌木叢外！

我下意識一腳踭落佢個頭度！

啪！

好似踩中咗蕉皮咁，佢成半塊頭皮到耳邊扇咗落嚟，露出咗一條條好結實嘅面部肌肉。啲肉嘅腐爛程度好細，而且好多白色筋……條友啲韌帶之類練到好勁。

條友恐怕唔止係籃球教練！

但係佢而家似乎都好狼狽，雙腳都搵唔到石𡒊食力，另一邊膊頭爆緊屍水，仲甩咗骹？

我見到條坑紋形傷痕，佢個膊頭應該係俾我個平底鑊扔傷嘅！

雖然得返一隻手，但佢依然想掹住我隻腳嚟咬！我就係咁一腳腳踭落佢下巴度！喺SAM仲有效力下，我雖然未維續到心如止水呢個最高狀態，但係我出腳時頭腦好清晰，好知自己做乜。

我每一腳都準確踭落佢牙骹位！

而事實上我亦唔怕踭錯俾佢咬到，一來我著住厚波鞋，二來，除非你咬甩我隻腳，否則我事後都可以做抗感染治療！

佢一隻手廢咗，我有信心可以踢到佢碌返落斜坡！

而我覺得，呢條喪屍好似都知道自己喺逆境。

好似激起咗佢嘅好勝心咁。

佢狂哮一聲，攞自己膊頭撼落啲石屎度！

……啪返正個骹！

喪屍會殘存生前嘅肌肉和動作記憶……視乎生前有幾熟習同埋幾執著於呢啲動作。

我懷疑條友受過軍訓！一般人點識自己醫返甩骹！

佢右手突然郁得返，伸長一搲，就要捉實我條腰！

我唔理！

揸實枝螺絲批，一嘢捅落捉住我腳踝嗰隻手度！

啪！

捅穿咗佢手腕，甚至直插落奉牆度！

啲石屎冇捅穿，支螺絲批都冇彎，但係個膠手柄爆咗！

即係枝批廢咗！

而且我手掌又被割傷，今次似乎仲傷到筋位……中指郁唔到。

但係唔夠佢傷！

佢成隻手掌冇哂力，我隨即抽返隻腳出嚟，再扭腰橫掃一腳，將佢要捉我腰嗰隻手，踩返落地！

叭啦！

個質感好似踩中隻青蛙咁，我覺得應該踩爆咗佢呢隻手，有好多屍水咇咗出嚟！我借力一踩，就咁成個人飛身撲返入灌木叢！

成功甩身！

但係我右腳一涼，屌，竟然俾佢最後一撈，掹甩咗我一隻鞋！

唯有趷住腳咁繼續行……

我仲有另一支四吋螺絲批，手上有支殺蟲水，前褲袋仲有支WD40。我藏身喺灌木叢往左上方走，俾樹枝整傷勾損呢啲冇得去理，我只想睇吓而家鳳德道變成點！

「嗄、嗄！」

我幫自己噴多浸殺蟲水，先敢靠近到行人路旁，輕輕撩開啲樹葉望出去……

撞哂車。

應該係話，有好幾個位出現過幾車連環相撞，然後後面啲車塞住哂。啲車好多都開住門，當時啲人應該係選擇咗棄車逃生……

咁啲喪屍呢？

喺我呢邊行人路，似乎冇咩喪屍……全部集中哂喺另一邊嘅鳳德商場樓下。

「避太陽？」

由於已經出咗事好幾日，應該唔會再有活人無啦啦跑出大街，喪屍日頭冇嘢做，就朝陰涼嘅地方聚集待機……

當然，喺車陣裏面，仲有唔少甩皮甩骨嘅喪屍，漫無目的咁徘徊緊。

我評估咗一陣現況……

甚至覺得有少少『天助我也』！

我只要留喺樹叢入面，順住條行人路旁邊走，就可以走完半條鳳德道！只要想辦法過到馬路，過咗個公園同埋半條街，右轉就係沙田坳道。

直上，就係聖母醫院！

「醫吓手板同隻腳先。」

我一邊赤腳就咁行咗一段，對襪已經勾爛哂，腳板好痛，同埋有兩隻腳趾已經屈親。因為我冇揀路行。

「點素治療。」

我有隻手掌喺爆螺絲批時整親，好彩唔係大傷。我連住中指條筋位出現發炎腫脹嘅保護模式，當我握拳頭時，好似手心揸住隻雞蛋咁。

而屈親嗰兩隻腳趾，經過治療後關節位亦腫咗一舊。係即時唔痛，但動作畢竟有啲頂住頂住，甚至有啲麻痺感，我有啲驚呢兩隻腳趾陣間甩咗我都唔知……

「有冇得搵番隻鞋嚟著吓？」

我見到馬路上有幾多鞋剩低……高踭鞋、涼鞋之類比較多，好少波鞋……可能因為波鞋冇咁易甩吧？

正當我邊行邊搵鞋嘅時候……

我見到身後嘅灌木叢，俾人一大抽一大抽咁掹走掉開，飛哂上天。

「唔、唔係啊嘛？」

條大隻佬喪屍仲追緊過嚟！

ns216.73.216.13da2

Reading Theme:

Font Size:

Line Spacing:

Paragraph Spacing:

Load the next issue automatically