《屍河明居鑽石山》（是咁的，我發現打喪屍有得升呢） - 314

014

662Please respect copyright.ＰＥＮＡＮＡ1sZUkCFp5u

就算唔係已經碌咗落斜坡，我以為自己匿入樹叢走咗呢一大段，佢應該已經唔記得咗我，回復返遊蕩狀態。

點知佢咁好記性！

就好似之前我睇住樓下個男人死，佢屍變後竟然會爬上三樓搵返我一樣……喺某啲情況下，喪屍會對指定目標死追不捨？

YRAAAAAAAAA！

我頭入面有兩個位突然針桔咁痛！

係杏仁核。

杏仁核對我提出最嚴厲嘅警告，刺激起我動物性求存本能。

就係逃生！

我起勢咁跑！

唔理面前係咩大紅花定夾竹桃，兩手撥開啲樹枝就撲過去！我甚至冇空間可以搵條好路……

而對方，係隨手就扯起啲灌木，細棵就連根拔起，大棵都扯到浮哂筋冧埋一邊，就咁直線大步走過嚟！

根本已經發哂癲！

而且我向後梢咗一眼，喺陰黯嘅樹叢下，佢雙眼好似貓眼咁發緊光。

死火。

唔通係所謂嘅『夜狂』狀態……而家呢度比起之前後樓梯仲要暗少少，所以呢條屍又激發咗多一個反應？

「唔可以慳落去！暴走者！」

（二段透支警告。）

「唔理啦！用啦！」

嗡！

我癲到左右兩腳踏住兩棵白樺樹樹幹借力，啪啪兩聲再魚躍一撲，躍過咗一棵面前成兩米高嘅灌木（當然係擦住頂部樹枝咁勉強飛過）！

打個前滾翻落地，無時間差繼續起跑！

比起我正常要穿過棵灌木，瞬間拉開咗個大隻佬十幾步！

但係條大隻佬好似見要追失，撲得仲癲咗，甚至都唔掹斷棵嘢，坦克車咁輾過去……

佢已經成身傷。

但恐怕有排都未摜低！

我有諗過好唔好走出行人路，咁至少有陽光曬住，可能條屍會冇咁癲。但會唔會引嚟其他喪屍攔路呢？

而我最擔心嘅係，走平路，我點都唔夠條大隻佬跑！

喪屍未有咁高智力，唔識走捷徑抄截，只會直線追，我要利用《暴走者》走最難嗰條路，咁先可以拉開最遠距離……

我跳過咗三棵大灌木！

十字路口就喺眼前！

《暴走者》嘅5.7秒（之前有累積經驗）正好用哂……

「再用啊！」

（三段透支嚴重警告；而且根據點素剩餘，這將會是最後一次可用的《暴走者》技能。）

「點解咁快用哂？」

唔通二段甚至三段透支，要花費更多點素？

我只係呆咗一呆。

啪喇！

我冇鞋嗰隻腳，勾到一條喺地面突起嘅樹根！

直仆落泥地！

而且我仲感到腳背啪咗聲，跌低時就痛咗一下……應該起碼有一隻腳趾因為咁拗斷咗。

我抽返隻腳出嚟，一轉返身。

YRAAAAAAAAAA！

條大隻佬已經一手將我揪起咗！

佢右半邊塊面皮好似半溶咗咁Sir落嚟，令佢右眼只係睜得三份一；兩隻手都見哂骨，而俾我螺絲批插穿手腕嗰隻，得兩隻手指仲郁得。

而且佢右邊膝頭哥有條骨磣咗出嚟！

仲未講佢身上仲插住可能有十幾條樹枝，畢竟佢皮膚係半腐爛狀態嘅……一邊腹部仲腫起咗成大舊，應該係啲內臟堆埋哂一齊。

但係呢一刻嘅佢，先至係最癲嘅時候！

呢條喪屍係有眼神！

喺佢眼中，只有一樣嘢：

就係要將我整死！

我一嘢將把後備螺絲批隊入佢條頸！

ns216.73.216.13da2

Reading Theme:

Font Size:

Line Spacing:

Paragraph Spacing:

Load the next issue automatically