《我專門幫人擺分手和頭酒》 - （二十九）交換秘密

「Hi，我係歐雪。」

「我梗係知你係邊個啦，你咁出名。我係阿濤。」

「食屎啦，梗係你出名啲。」

呢三句，就係中二下學期我同歐雪一開始成為隔離位嘅開場白。

喺我哋正式成為隔離位之前，我哋其實無咩交流過，但係都聽過對方個名。

因為，我哋兩個都係班上面嘅好事之徒。

我哋成日都叫埋啲男仔女仔一齊去搞活動、一齊玩，所以久而久之，大家都至少知道對方同自己係同一類人。

而歐雪嘅外表，其實亦都咁啱係我鍾意嘅類型。

佢每日都會紮一條馬尾翻學，因為無咗左右邊嘅頭髮遮住，睇落更加突顯到佢個樣。

佢係一個眼大大、雙眼好有神、面圓圓得嚟又唔會令人覺得佢肥嘅女仔。

佢作為一個鍾意搞活動嘅人，好容易就可以見到佢一臉笑容。

佢俾人嘅感覺，就係一個好樂天，好可愛，好開心嘅女仔。

對於正值青春期嘅中二學生，愛情嘅定義，可能就等於快樂。

所以當我遇到一個同自己近乎一樣嘅人嘅時候，我覺得我鍾意咗佢。

而同樣地，對歐雪嚟講，我係班上最明白佢心意，亦都係最識得氹佢笑嘅人。

所以，佢對我係特別唔同嘅，至少我係咁樣覺得。

就喺中二準備放暑假嘅前一日，我決定要同歐雪表白。

嗰日我刻意用班長身份book咗班房，然後叫咗佢一點鐘去班房門口等我。

當佢嚟到嘅時候，我俾咗個眼罩佢，然後好小心咁拉咗佢入班房度。

「嗱，我數三聲你就打開眼罩啦。3、2、1！」

歐雪打開眼罩，然後佢呆咗。

因為，佢見到雪。

成個班房都係雪。

當然，雪係假嘅。

係我去教具室搬哂老師唔要嘅發泡膠盒，然後逐個逐個整爛做發泡膠碎，之後再一袋袋放哂入班房。

我仲刻意放咗好多上班房嘅吊扇度，所以吊扇一開，成個班房真係好似落雪咁。

「好靚啊！」歐雪望住周圍飛嘅發泡膠粒，臉上出現咗好陶醉嘅笑容。

我嗰時知道，就係呢一個moment啦。

我走咗去歐雪身邊，望住周圍嘅發泡膠粒講：「再靚，呢啲雪都係假嘅；而我，好想擁有真嘅雪。」

歐雪聽到，擰個頭過嚟望住咗我，佢嗰刻嘅樣，似係期待，又係緊張。

「你可唔可以做俾我擁有嘅真雪啊？」雖然呢句對白好老土，但對於一個中二嘅學生嚟講，已經係一句度咗兩星期嘅金句。

歐雪耷低咗頭，我望到佢連耳仔都紅哂。

但係同時間，佢好似點一點咗頭。

「可以？」我有啲興奮咁問多一次。

「嗯。」歐雪都係望住地下，但個頭點大力咗。

「Yes！」我開心到係咁掉起地下嘅發泡膠碎，而歐雪就笑住係側邊睇住我興奮咁發癲。

嗰一刻，好似係我人生最幸福嘅一刻。

「你...你洗唔洗食藥啊？」

Kelly把聲一下拉翻我去現實。

一脫離回憶，我先發現自己心跳得好快，而且氣喘得好急。

睇嚟啱啱當我沉醉喺回憶嘅時候，連自己有驚恐症反應都唔察覺。

「我無事。唔好講我啦，講下你啦，點解你會做花藝師嘅？」

我刻意轉變話題，一來係我知道如果再回憶落去，之後一定無可避免咁諗到去我最唔想面對嘅傷口；

二來我亦唔想俾Kelly發現我嘅唔妥，廢事令佢有更大好奇心去發掘我同歐雪嘅歷史。

「咦，你都有查我喎！」Kelly奸笑一聲，一邊從廚房攞出一碟菜一邊答：「因為花藝師係一種無得分高低嘅職業；無論用咩花、點擺設，解釋同決定權好多時候都喺我手上。我鍾意一份唔會俾人批評嘅工作。」

我望住枱上面嘅嘢食，蒜蓉白菜、蕃茄炒蛋、再加一個罐頭雜菜湯，雖然唔係啲咩特別嘅菜式，但係至少對生命嘅威脅性比第一次細咗好多。

「唔鍾意俾人批評？做咩啊，你以前俾人鬧得好勁咩？」我本身諗住好似平時笑住寸下佢，點知見到Kelly少有地臉上變色，我即刻收起咗嬉皮笑臉。

「我爸爸媽媽喺我好細個嘅時候就離咗婚，所以我係跟我媽咪大嘅。我媽咪係一個好有要求嘅人，佢成日都會覺得我呢樣未夠好，嗰樣未夠好，總之喺佢眼中，我永遠都係一個未夠好嘅人。咁佢又唔止對我高要求嘅，其實佢對自己都係。而佢對自己嚟講，佢對自己最失望嘅一件事，就係佢擁有一段失敗嘅婚姻。所以佢成日都會同我講一樣嘢，就係男人，一定要揀到啱為止。」

Kelly停低咗手好專心咁講故事，而我都忍唔住專心咁放低碗筷嚟聽。

「我好記得中學嘅時候我鍾意咗一個男仔，當時我帶咗呢個男仔翻屋企見媽咪，媽咪見佢嘅時候一直都笑笑口，我當時仲以為過咗關。但係個男仔一走，媽咪就開始同我講，呢個男仔對答好差，諗嘢又短視，分手啦。其實，嗰時我哋先十五歲，對答差同短視好正常啫。但係當媽咪每日都苦口婆心咁同我講呢個男仔將來會幾失敗，亦會令我幾咁慘，我開始慢慢都諗媽咪講嘅會唔會成真。

當人出現懷疑，睇嘅嘢就會唔同咗，慢慢，我都覺得呢個男仔有啲問題，唔係真係咁適合自己，所以我就同咗佢分手。

自此之後，我每個男朋友都過唔到我媽咪嗰關，而媽咪嘅說話就好似一套程式輸入咗我個腦度，令我慢慢都開始會過濾每一個男友。每當我搵到佢有唔好嘅地方，我都會覺得佢同我唔夾，所以就會分手。因為我個心入面，不斷都會響起媽咪所講，如果搵嘅人唔啱自己，我將會好似佢咁有一段失敗嘅婚姻。

多得你曾經話過，所有分手都有原因，呢一個，就係我最近認真去反省過自己拍拖經歷之後得出嘅原因。」

當Kelly講出佢嘅經歷，我明白多咗佢好多。

比起「用情唔專一」，原來Kelly不斷離離合合背後嘅原因係擔心同恐懼。

「所以做花藝師，係因為我想有一件事可以脫離我媽咪嘅批評。我想有一件事，係由我去決定到底咩係好，咩係唔夠好。」

Kelly講完呢句之後，重新攞翻起飯碗食飯，代表佢已經講完嘢。

聽哂佢嘅解釋之後，我諗明咗點解佢成日借啲依上嚟同我食飯，其實可能係因為佢自己都唔想成日對住佢媽咪。

雖然我好想追問到底佢而家明白咗呢個背後原因之後，係咪就代表佢可以克服到不斷分手嘅詛咒，但既然佢呢刻選擇暫停唔講，我都覺得應該俾翻啲空間佢。

正當我都想食飯嘅時候，Kelly突然好奸咁望住我笑。

「做咩事笑到成個鄭子誠咁？」我望翻住佢。

「我就講哂我嘅過去俾你聽啦，幾時到你講翻先！」Kelly瞇住對眼，充滿陰謀咁望實我。