《我專門幫人擺分手和頭酒》 - （二十八）本質

當子成講完佢嘅故事之後，我、偵探陪佢上咗一個鐘嘅LV真偽分辨課，成個過程簡直係令人歎為觀止，簡直比消費者委員會更加專業。

聽完之後，我、偵探陪子成去到LV嘅門市。

因為子成個禮物手袋雖然已經經過威哥再三驗證係真貨，但係佢都係想去門市再見識一下門市賣嘅貨式，一來用下威哥教嘅技巧睇袋，二來都比較下手上嘅袋同門市嘅袋有咩分別。

「嘩！真係一撚樣喎！」子成好驚訝咁望住手上嘅袋同門市個袋。

LV個員工應該好少招呼地盤裝扮同埋成口粗口嘅顧客，所以都只係企埋一邊陪笑。

「無論係布紋、車線、金屬扣嘅反光度，兩個袋都一樣......」

睇住子成好認真咁檢查兩個袋，我開始都明白點解美珍唔介意子成嘅不足，反而願意一直教佢同提醒佢。

因為愛情嘅技巧，其實全部都可以學翻嚟；但唯獨子成身上嗰份單純嘅認真，係無可替代嘅。

能夠搵到一個甘願聽自己意見，為自己改變嘅成長嘅另一半，相信呢個就係美珍愛子成嘅原因。

當我仲喺腦海入面欣賞緊子成嘅時候，突然聽到隔離櫃檯傳嚟咗一把聲：「乜你哋舖頭啲客人愈嚟愈低質素㗎，講哂粗口咁，拉低哂你哋個brand。」

一聽呢啲尖酸刻薄嘅聲，我都知道講嘢嘅人一定係一個八婆。

我望過去聲音來源，見到一個著住深綠色碎花裙嘅中年女人，睇落四十幾歲，應該都係一個衣食無憂嘅有錢婆。

有錢婆留意到我望住佢，佢用翻一個望住蟻民嘅眼神嚟睇我。

我平生最討厭嘅就係呢啲狗眼看人低嘅人，而且佢仲要出口寸我啱啱先欣賞緊嘅子成，我心入面更加唔抵得佢呢啲行徑。

我呢個時候走埋去佢企緊嘅櫃檯前面，然後問啱啱招呼緊有錢婆嗰個女店員：「你好啊，我想問下呢，其實你哋品牌本身有冇話限制顧客類型或者年紀㗎？」

因為我問得好有禮貌，或者我本身天生有幾分帥氣，所以女店員微笑住咁答我：「我哋歡迎所有類型嘅顧客啊，先生你都想買袋？」

我笑一笑，然後講：「原來你哋品牌咁大眾化嘅，咁真係好難得喎，名牌得嚟又接受唔同嘅顧客。人哋話心地好就會靚，你哋似乎係品牌好所以店員靚喎。」

女店員聽到，又細細聲掩嘴喺度笑。

「不過好可惜嘅係呢，有啲人唔知你哋品牌理念，又買你哋品牌嘅嘢，我覺得真係有啲浪費囉！」

我講完呢句，女店員似乎都聽出我話中有話，所以今次唔敢大聲笑出聲。

「係呢，你鐘唔鐘意聽Rap？」我突然咁問。

女店員諗咗一諗答：「都ok啊。」

我笑一笑咁講：「我Rap兩句你聽。」

我偷望一眼，果然發現有錢婆一直聽緊我同店員嘅對話。

咁我相信，我句句有骨一直都係針對住佢。

而佢聽住都好，因為跟住落嚟我準備同佢開火。

「咳咳...... 有乜嘢新款最緊要最快得到

但係你身上根本都睇唔撚到質素」

我刻意一邊Rap，一邊望住有錢婆。

「你講咩啊？」有錢婆聽到臉上嘅青筋都爆哂出嚟。

「我唱歌咋，又唔係話你。」我本身仲想駁多幾句，但係偵探同子成已經拉走咗我。

臨走之前，我睇住有錢婆嘅嬲樣，心入面一陣清涼。

呢個世界就係咁，有錢有地位嘅人總係覺得自己高人一等。

但係其實好似子成同美珍呢啲睇落低學識低地位嘅人，一樣可以好有愛情智慧，分分鐘比起好多又離婚又婚外情嘅有錢人更勝一籌。

1893Please respect copyright.ＰＥＮＡＮＡQ3QAEIPLiD

「嘩，好彩我唔喺度咋，如果唔係我一定幫口激到個八婆爆血管啊！」

Kelly一邊喺廚房炒菜，一邊講。

無錯，Kelly嚟我屋企煮晚餐差不多已經有大半個月嘅時間。

自從第一次製作化學廢料之後，佢每星期都會上嚟一兩次，而佢嘅專用Melody餐具已經長駐咗喺我屋企，而我都已經習慣咗主動幫佢擺埋公筷。

雖然廚藝進步甚慢，但至少我對佢嘅出現少咗抗拒，而我亦未食到肚屙，所以算係默認咗佢可以自己殺上嚟。

可能因為一直習慣一個人住，所以從來無覺得有咩問題。

但自從有咗Kelly嘅出現之後，我突然發現，呢間屋好似重新有翻生命。

當呢個地方只有我一個嘅時候，佢只係一間屋，一個俾我休息嘅地方。

但當Kelly出現嘅時候，呢個地方變成咗一個家，一個令我有快樂同想享受嘅地方。

我講唔出，到底呢個係Kelly嘅威力，定抑或係其實任何一個人做同一件事都會有呢個效果。

但係我知道，雖然我個心有一道牆隔住咗，但牆後面嘅真我，其實非常渴望同人接觸。

「係呢，今日你晏晝去咗大快活？」我突然諗起晏晝嘅事，刻意試探下Kelly。

「你點知嘅？」Kelly好驚訝咁從廚房伸咗個頭出嚟。

「我仲知你去咗見我中學同學添。」我用看透世事嘅眼神望住佢。

「係啦係啦叻啦叻啦，你做咩跟蹤我？」

「我無跟蹤你，只係咁啱撞到你啫。我反而想問你，你點解要見我個中學同學嘅？」

「咁我講過要起你底㗎嘛，我嗰日聽Rebecca提起你中學名，然後發現我Facebook竟然有一個係讀你間中學嘅朋友，咪叫佢出嚟問下你啲嘢囉！」

「咁你問到咩呢？」

「唉！佢話同你唔熟喎，唯一問到嘅，就係知道你當年嘅女朋友同你同班，個名叫做歐雪。」

歐雪。

呢兩個字好似雷轟一樣喺我心入面響咗一下。

一個將我個心封閉咗五年幾嘅名。

一個賜俾我無能力再去接觸愛情嘅名。

一個令我痛不欲生滿手割痕嘅名。

一個牽帶住我最大傷口嘅名。

ns216.73.216.216da2

Reading Theme:

Font Size:

Line Spacing:

Paragraph Spacing:

Load the next issue automatically