《我專門幫人擺分手和頭酒》 - （二十一）意外驚喜

若楓同阿Ray嘅分手和頭酒約咗七點開始，但若楓早咗十分鐘到，睇得出佢有啲緊張。

佢入嚟嘅時候已經攞住咗個戒指盒，研究緊到底收埋喺邊一度攞出嚟比較好睇。

Kelly亦都好熱心咁上前幫佢，睇得出Kelly都幾想若楓可以成功復合。

「琴日無事吖嘛？」趁住未人齊，我過去同偵探吹下水。

「無事。」偵探簡而精咁答我，同時反問，「真係無查到佢哋？」

我搖一搖頭，答佢：「無啊，聽若楓嘅要求同故事都唔算複雜，所以今次唔洗你出手啦。」

偵探表示明白咁點一點頭。

大約遲咗五分鐘左右，男主角阿Ray就出現啦。

一見到佢，我就覺得其實佢同若楓真係幾襯。

阿Ray睇落有175cm以上，身形唔大隻但係幾平均，斯文得嚟又唔會有孱弱嘅感覺。

佢一入到嚟，若楓就忍唔住企咗起身，然後有啲緊張咗咁笑住講：「好耐無見啦。」

阿Ray斯文而又有啲靦腆咁講：「係啊，好耐無見。」

兩個人都走到枱前面，互望一眼睇下對方坐咗未，然後見到大家有相同嘅動作，忍唔住相對一笑，跟住一齊坐低。

「今次掂啦！」Kelly笑住咁喺隔離房嘅錄影之中睇住佢哋嘅互動，好興奮咁講。

確實，睇住阿Ray同若楓嘅互動，感覺就好似睇緊一對初戀嘅男女朋友一樣，有一份無形嘅甜蜜氛圍喺空氣之中。

「你記唔記得呢間餐廳？」若楓坐低之後問阿Ray。

「梗係記得，呢度係我當年同你表白嘅地方嘛。」阿Ray笑住答。

「你當年啊......」

若楓同阿Ray輕鬆愉快咁開始閒話家常，我同偵探好難得咁喺分手和頭酒上面見到呢啲溫馨場面，內心都不期然咁放鬆咗啲。

而Kelly一見到若楓同阿Ray嘅對話甜蜜少少，就係度細細聲嗌「yes」，唔講仲以為佢睇緊波。

而開心嘅時間亦過得好快，當我見到阿Ray同若楓邊食邊傾咗大約四十分鐘，我就知道係時候到我出場。

「Hello若楓、阿Ray，又係我阿濤啊！唔知今晚呢餐大家食得滿唔滿意呢？」

若楓微笑住點頭，而阿Ray就好有禮貌咁答一句：「好好啊，多謝你嘅安排。」

我用笑容回應佢哋，同時繼續講：「既然食得七七八八，我哋就開始今晚特別活動，交換禮物啦！根據若楓嘅建議，我哋交換禮物嘅方法係由阿Ray你先送出禮物，之後再到若楓小姐俾佢嘅禮物你。」

根據若楓事前嘅諗法，咁做先會夠驚喜。

阿Ray笑住點一點頭講：「無問題。」

佢轉身喺手提包入面搵咗一陣，然後攞咗一樣嘢出嚟。

呢樣嘢一拎出嚟，唔單止係若楓呆咗，就連平日負責主持大局控制場面嘅我都俾唔到反應。

阿Ray拎出嚟嘅，係上面寫住大大個金色「囍」字嘅喜帖，封面上面寫住「若楓收」。

「呢個......」若楓面對呢個驚喜，一時間咩都講唔到。

「係我張帖，我12月會結婚啦。」阿Ray臉上幸福嘅笑容，同若楓嘅震驚表情形成強烈嘅對比。

「但係你三個月前先同我講......」若楓努力管理緊自己嘅表情，但更顯得自己百感交集。

「我兩個月前遇到『佢』。嗰一刻，我終於明白，有啲嘢總係需要放低嘅。比起無了期嘅等待，我覺得自己係時候move on。所以，我同咗『佢』一齊，而且因為大家都覺得好適合，所以我哋好快就決定要結婚。」

聽住阿Ray呢番說話，我都有種苦澀嘅感覺。

阿Ray用咗一年幾嚟放低若楓，而我用咗五年多啲都未放低到。

係囉，到底幾時先到我可以move on呢？

就係我帶住萬緒千愁咁做旁觀者嘅時候，我膊頭突然俾人拍咗一下。

我轉頭一望，原來係喺隔離觀察房走咗過嚟嘅偵探。

佢望咗幾眼之後，耷低頭喺我耳邊講咗幾句嘢。

聽完，我有啲意外咁望住佢，然後點一點頭。

偵探就咁離開咗餐廳。

呢個時候，阿Ray已經解釋完佢送禮物嘅原因。

若楓似係幫自己平靜緊，然後勉強咁笑住講一句：「恭喜哂你結婚，不過12月我要去英國出差，應該嚟唔到你婚禮啦，所以，你份禮物，我都係唔收啦。」

阿Ray體諒咁笑咗一笑，然後講：「唔緊要，對我嚟講你係我一個好重要嘅人，可以得到你祝福我已經好開心。係呢，你想送咩禮物俾我？」

呢個問題一出，若楓臉上微微變色，但係好快又已經笑翻，講：「我本身預備咗一份禮物，但係比起你送帖咁重手，我覺得自己出手太低啦。所以我都係無謂獻醜啦，我改做送上最衷心嘅祝福俾你啦。祝你以後都可以幸福快樂。」

我望到，若楓喺枱底嘅手慢慢將原本拎定嘅戒指盒靜靜地放翻入個袋度。

呢一刻嘅若楓，唔單止收起咗本身嘅心意，仲有自己嘅心。

之後，若楓同阿Ray又傾咗大約半個鐘，呢餐飯就係愉快得嚟又有種隔膜嘅感覺下完結。

「希望之後再有機會食飯，到時我帶埋佢嚟認識你。」阿Ray笑住講。

「一定要啦，等我講下你以前嘅醜事俾你未來老婆聽！」若楓做個鬼臉，然後向阿Ray揮一揮手：「我走先啦，之後keep contact啦。」

「嗯，拜拜！」阿Ray都同佢揮手。

「今晚唔該哂你哋。」若楓走到去我身邊講，語氣聽得出係失落嘅。

「祝你幸福。」我簡單咁回應咗一句。

「承你貴言。」若楓無奈咁笑咗一下。

呢個時候Kelly都喺隔離房走咗過嚟，攬咗若楓一下。

我睇到若楓咬住咗唇，鼻頭都紅哂，似乎就快忍唔住喊，所以我輕輕拍咗Kelly一下，等佢俾若楓先行一步。

若楓最後向Kelly點咗一下頭表示多謝佢嘅安慰，然後就離開咗

「多謝你哋今晚嘅安排，餐廳好好，嘢食都好好，有機會再見。」阿Ray企咗起身，都準備離開。

「我哋做分手和頭酒同做殯儀一樣，好少講再見嘅。」我笑住咁答。

「又係喎。」阿Ray傻傻一笑，走到門口。

「係呢，既然可能無機會再見，我都想睇下你張帖啊，知道下你哋去邊擺酒都好吖！」我指一指佢手上張帖。

「哦.....哈哈，張帖好普通咋，無謂睇啦。我到時會喺紅磡擺酒。」阿Ray答得有啲尷尬。

「做咩啊？張帖唔睇得嘅咩？」我走近佢一步，眼神凌厲咁望住佢。

「吓？」阿Ray嘗試逃避我嘅眼神，然後加快腳步走出門口。

就喺呢個時候，門口出現咗一個人。

偵探。

阿Ray停咗步。

「唔肯俾人睇張帖，係因為，你張帖係假嘅。」

偵探雙眼發出睿智嘅光芒。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically