《我專門幫人擺分手和頭酒》 - （二十）填滿

一入到屋，Kelly已經第一時間入咗廚房。

我跟住佢，企咗喺廚房外面，望住佢開始搵嘢。

「唔洗幫我㗎，偵探要你食得健康啲，所以今晚交俾我啦。」Kelly充滿信心咁拉高咗衫袖。

「我睇下幾時要叫消防員嚟救火啫。」我無奈咁睇住佢開始瓦解我個廚房。

「喂，咁大間屋你一個住㗎？」Kelly 一邊洗菜一邊問。

「嗯，我爸爸行船嘅，半年先翻嚟一次。」

「咁媽媽呢？」

「死咗。」

「噢，sorry。」Kelly擰轉頭過嚟道個歉，然後又望翻過去洗菜。

我一路睇住，見到Kelly洗菜嘅時候將啲生菜撕到好似入咗碎紙機咁，我已經有啲心知不妙。

「你想唔想知點解我成日跟住你？」Kelly又問，似乎佢係一個連靜一秒都嫌多嘅人。

「想。」我答「想」，只係我相信，就算我答「唔想」，佢都會照講。

「因為我真係好想知，到底你覺得認真嘅愛情係啲咩，同埋到底點解你要搞分手和頭酒。」

「呢兩樣嘢，你跟住我我都唔會話你聽。」我冷笑一聲，打算俾啲打擊佢。

「所以我而家先要深入虎穴嚟了解你囉！」

Kelly笑咗一聲，從個袋入面拎咗條青瓜出嚟，開始切起上嚟。

「其實我想講，我一直以嚟真係好認真去拍拖㗎。每遇到一個新嘅男朋友，我都好期待呢個人就係最適合我嘅人，而我亦都有好認真去同佢相處。今日聽咗若楓嘅故事，起初我都有諗自己係咪有啲似佢，因為比較而同其他人一齊呢？但係我諗諗下又覺得，我同若楓係唔同嘅。」

我聽到呢道，索性搬咗張櫈坐喺廚房門口，一來方便傾計，二來坐多陣如果一陣廚房著火我都夠腳力即刻跑走。

「若楓係因為比較之下覺得對方唔好所以分手，而我每次都係覺得對方唔啱我所以要分手。例如，我前度係一個好識計劃嘅人，但係佢俾唔到我要嘅陪伴我；我前前度係一個學識豐富嘅人，但係佢又唔識製造浪漫。總之從每一個前度入面，我都有認識自己多咗，亦知多咗自己要咩，所以我一直都覺得，即使我男朋友多，我好認真看待愛情，我只係想搵最適合自己嘅人。」

Kelly講完嗰一刻，順手倒咗碟青瓜落鑊炒。

而我聽完佢講嘅嘢之後，確實，係明白多咗佢。

比起形容佢為「對愛情唔認真」，我諗其實佢更加係唔清楚自己要啲咩。

公道啲講，其實好多人都好似Kelly一樣，以為自己係「愛一個上一課」，其實只係「見一個愛一個」。

呢件事就好似買餸咁，有經驗嘅師奶一入街市就已經知要去邊檔同埋買咩嘢，因為佢哋好清楚自己嘅需要。

只要未買過餸嘅新手，先會逐間問、逐間揀，因為連佢哋自己都唔知咩係最好。

我對Kelly嘅反感，少咗一分。

喺上菜之前，Kelly首先擺好咗餐具先。

見佢擺得有板有眼咁，我對一陣餐飯又多翻少少期待。

而有趣嘅係，我見到枱面上出現咗一副唔屬於我屋企嘅Melody公仔餐具。

Kelly見到我望住副餐具，扠住腰咁問：「做咩啊？而家唔俾人有少女心自備餐具啊？呢副係公筷嚟㗎！」

從佢連餐具都帶埋嘅呢個舉動，證明佢上嚟煮餸呢件事絕對係早有預謀。

但係我都係忍唔住要寸下佢：「兩個人食飯，公咩筷？你有潔癖啊？」

「無人想同你Share口水尾啊核突佬！」Kelly駁咗我一句之後就入翻廚房。

算啦，同女人爭拗衛生要求，等於爭取港鐵減價，永遠都係唔會有結果㗎。

經過咗半個鐘之後，Kelly終於將菜式逐一上碟。

我望住一碟浸喺黑色水嘅生菜，隔離係一兜雖然燶咗但勉強睇得出係青瓜同蛋嘅物體，最後仲有一盤黃色嘅水。

「你...會唔會解釋下呢三兜嘢係喺邊間實驗室攞出嚟嘅？」我望一望Kelly。

Kelly眉頭一皺，首先指住盤生菜：「呢個好明顯係蠔油生菜啦。」

我望住啲稀釋到好似工業廢水嘅蠔油同埋廢紙一樣嘅生菜碎，無奈望去隔離嗰一兜度。

「我知我炒燶咗，但呢個係苦瓜炒蛋。」Kelly期待我嘅回應。

「大佬，呢個係青瓜嚟㗎喎。」我聽到之後呆咗。

「吓？偵探又話苦瓜係青色，然後條邊凹凹凸凸嘅？」Kelly一臉無辜，而我相信憑偵探聰明嘅腦袋，應該都估唔到Kelly咁大個人都分唔到青瓜同苦瓜。

「無所謂啦，兜野燶成咁，咩瓜都苦㗎啦。」我見到Kelly個樣有啲失望，所以嘗試安慰下佢，然後望去隔離兜黃色水度。

「雪梨水，偵探話潤㗎，今次無錯啦掛！」Kelly臉上重現希望咁望住我。

呢一刻，我明點解兜水會黃色啦。

我攞匙羹一撈，果然，原個雪梨俾我撈咗上嚟。

我望住個雪梨，再望一望Kelly。

「媽咪不嬲話煮嘢呢啲應該交俾男仔做，所以今次人哋第一次煮嘢食嘛，係咁㗎啦！」我睇得出Kelly有啲挫敗。

「我又無話唔食。」睇到佢咁嘅樣，我唯有用生命作為賭注咁夾咗舊青瓜嚟食。

嘩，真係燶到苦。

不過，喺呢舊青瓜上面，我食到啱啱炒好嘅餸先有嘅嗰種溫暖，而且仲要完全無發泡膠盒嘅味。

呢一種，先係屋企入面應該食到嘅嘢。

而我，已經好耐都無食過呢個味道。

最後，我哋用咗二十分鐘食晒枱面上面所有嘅化學廢料。

「都唔係太差啫，我哋都食晒啊！」Kelly見到自己煮嘅嘢竟然食得哂，個樣睇落好滿足。

「有無諗過搵返個廚師做男朋友？」

「我有個ex係廚師嚟㗎，佢煮中餐西餐都好好食，但係後來我發現佢太過安於現狀，而我比較鍾意尋求突破，因為價值觀唔同，所以分咗手囉。」Kelly坐喺梳化上面休息住咁講。

「咁你有冇諗過下一個想要點樣嘅男朋友？」我一邊執碗一邊問。

「嗯...最近聽得多坦白同對感情認真，可能我都想搵翻一個咁嘅人。」Kelly好隨意咁答。

「嘩，呢兩個係我優點嚟，你千祈唔好鍾意我。」

「痴線，我鍾意靚仔。」

「死囉，呢個係我第三個優點。」

......

十一點五十分。

「我走啦。」Kelly企咗出門口同我揮一揮手。

「今晚唔該哂你。」雖然晚餐嘅味道係災難性嘅，但係，佢亦都誤打誤撞咁煮出咗另一種我期待以久嘅味道。

「鍾意食，我下次再嚟煮！」Kelly睇嚟滿心期待。

「下次帶埋隊消防員嚟係有得諗嘅，夜啦，小心翻屋企。」

「聽日見。」

「喂！」

就喺Kelly準備走嘅一刻，我又叫住咗佢。

Kelly好奇咁擰翻轉頭。

「你又話著咗lace嘅？」

Kelly狡猾咁笑咗一下，指一指隻腳。

我望落去，反咗一個白眼。

原來，係有lace邊嘅短襪。

門最後都係閂埋咗。

呢間屋，又回復翻去一粒聲都無嘅平靜。

而啱啱嗰三個鐘嘅歡笑傾計聲，好似從來都無出現過一樣。

習以為常嘅空虛感，喺一個人嘅大屋之中更加突出。

呢個時候，屋嘅鬧鐘響起。

「風裡笑著風裡唱 感激天意碰著你

縱是苦澀都變得美

天也老任海也老唯望此愛愛未老

願意今生約定他生 再擁抱」

我聽住歌詞，突然間腦入面出現咗一個問題。

如果他生先可以同「佢」再擁抱，咁今生呢？

到底我幾時先可以放低嗰份對「佢」嘅執著，學Kelly咁喺感情關係之中來去自如，然後搵一個適合自己嘅人呢？

長情，一向俾好多人所稱頌，但原來都可以係代表身陷其中，不能自拔嘅痛苦。

絕情，聽落無情無義，但係反而可以令一個人自由自在，唔需要揹住傷痕前進。

咁其實到底一個人長情定係絕情好呢？

問題，依然係無答案嘅。

因為呢間屋，再次如常地只係剩翻我一個人。

ns216.73.216.66da2

Reading Theme:

Font Size:

Line Spacing:

Paragraph Spacing:

Load the next issue automatically