《我專門幫人擺分手和頭酒》 - （十二）兩個小朋友

「哎呀！睇嚟偷聽得人多，今次俾人偷聽翻哂添！大件事囉，啱啱我哋講嘅嘢俾人聽哂啦！」我扮哂嘢係咁嗌，但其實背後當然係我靜靜雞打咗俾Kelly促成成件事啦。

「夠啦，再做就略嫌浮誇㗎啦。」呢個時候一直負責守門口嘅偵探都入咗嚟，睇嚟佢已經頂唔順我嘅演技。

呢個時候，Rebecca行咗去阿飛面前，喊住咁問咗一句：「點解你要咁傻啊？」

「你聽到哂？」阿飛一邊問，一邊忍唔住起咗身，伸手抹咗Rebecca臉上嘅眼淚，但佢無留意到其實自己同樣都流緊眼淚。

Rebecca點一點頭。

「說三道四嘅人永遠都有好多，但最熟悉對方嘅人就只有你哋自己。人哋嘅意見唔係唔洗聽嘅，但只要記得一樣嘢，就係揀可以令到你兩個都幸福嘅意見嚟聽。」我講完自己最唔鍾意嘅大道理之後，乘機將阿飛輕輕一推。

Kelly見到我嘅小動作之後即刻會意，同時推咗Rebecca一下。

就係咁，佢兩個就理所當然地攬住咗對方。

睇住佢兩個又喊又笑咁攬埋一齊，我都忍唔住喺側邊笑咗。

果然，其實兩個都係小朋友。

兩個都好單純咁學習緊愛情嘅小朋友。

比起背負呢個世界強行加諸喺佢哋身上嘅價值觀，佢哋更值得自由咁探索屬於佢哋自己嘅愛情小天地。

因為說到底，愛情，始終都係兩個人嘅事。

「喂，做咩唔早啲講俾我知阿飛同你見面嘅事？」呢個時候，Kelly攝咗過嚟我身邊，細細聲問。

我貼去佢耳邊，學佢咁細細聲答：「話俾你知，死無全屍。」

Kelly睥咗我一眼，然後又細聲講：「你快啲多謝我，無我追出去，Rebecca點會有機會聽到阿飛嘅真心話？」

雖然呢一刻我好想駁佢，其實計劃之中，本來會由偵探追出去嘅，所以即使無佢，Rebecca一樣會知阿飛嘅心聲。

只不過，我又諗到，由Rebecca一開始同Kelly嘅交流到而家，俾Kelly負責追出去，其實都算係一個誤打誤撞嘅好結果。

正因如此，我決定都係簡單答Kelly一句。

「多謝哂。不過下次唔好隨身帶較剪啦，帶鐳射筆都ok㗎啦，反正都係攻擊性武器。」

Kelly對我嘅廢話無咩反應，反而好似幾有感慨咁講咗一句：「不過，今次你嘅setting真係幾好，至少幫到佢哋知道對方諗咩，又有成長。」

我有少少沾沾自喜咁笑咗一聲：「和頭酒嘅目的本身就唔係鼓勵分手，而係俾人一個坦率嘅機會去決定應該點處理大家嘅關係，唔係次次一句『性格不合』就分手咁兒戲嘅。」

就因為我最後一句嘅言語攻擊，換嚟咗Kelly使用拳頭對我帶嚟物理傷害。

Rebecca同阿飛嘅分手和頭酒，以復合作為完結。

呢個咁奇妙嘅轉折可以出現，令我不期然都想唱翻首「主能夠」。

望住佢兩個對眼同個鼻都紅哂，但係個樣又甜到不得了，我相信佢哋跟住落嚟嘅愛情路即使唔容易走，但仍然可以好似而家咁又笑又喊走落去。

當我去到門口想送走佢哋嘅時候，Rebecca突然問咗我一句：「你係咪讀聖xx中學㗎？」

我呆咗一呆，然後點下頭。

「原來真係你！我之前第一次見你嘅時候已經想問你㗎啦！」Rebecca好興奮咁講。

「我識得你嘅？」我好奇咁問。

「你唔識我，不過你識我家姐，你哋同班㗎，你記唔記得蘇頌思啊？」

「哦.....成日著裙翻學嗰個！」其實我完全無印象，所以求其答佢一句。

「係啊！我有時同媽咪接家姐放學，家姐有指過你俾我睇，仲話你係學校嘅風頭躉，成日好多創意搞呢搞路㗎！」Rebecca好興奮咁講。

我笑住咁點頭，心諗，如果無創意又點搞到咁大壇嘢俾你同阿飛和好如初呢？

「係喎，我記得嗰時你放學都會拖住個女仔㗎，仲好似幾靚女㗎！你咁熟愛情，你同嗰個女仔而家點啊？係咪仲一齊緊呢？」

聽到Rebecca呢一句，我感覺到，我嘅心跳加速緊。

黃正濤，冷靜。

「我哋...分咗手好耐啦。」

「噢，唔好意思啊。」Rebecca發現自己問咗一個尷尬嘅問題，即刻道歉，然後就同阿飛走咗。

我扶住隔離張枱，用醫生教我嘅方法深呼吸，慢慢先企得穩。

我見到Kelly望住我，好好奇我發生咩事，但呢一刻，我唔打算同佢解釋住。

因為我個心入面，有一句說話仍然好似迴音咁不斷重複緊。

「我哋...分咗手好耐啦。」

只係到今日都未放得低。

就喺呢個時候，我隻apple watch響咗一聲。

我望一望，係一個日期提示。

4月8日，紀念日。

一年一度的紀念日終於來了。

或者說，是悼念日。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically