《我專門幫人擺分手和頭酒》 - （十一）你叫我最快樂

「所以而家分咗手就係你最滿意嘅結果？」

計劃順利完成哂，我望住坐喺櫈上面嘅阿飛，睇唔出佢有開心嘅感覺。

「唔係最滿意，不過，對Rebecca嚟講應該已經係最好。」阿飛一直望住地下。

「咁你自己呢？你之後打算點？」我覺得佢需要啲關心。

「我？都無咩所謂啦，我由細到大都係自己一個，咁咪繼續自己一個更開心囉。我會繼續照顧好婆婆，考好埋個dse，或者好似Rebecca教會嘅人所講，過一兩年，到我有進步先再搵翻佢啦。」阿飛講到未來嘅事，但我唔覺得佢有帶住希望。

「咁Rebecca呢？佢好鍾意你喎，你唔怕咁做會hurt到佢咩？」

「長痛不如短痛嘛，我相信佢教會有好多好男仔，總會有一個比我更適合佢。」阿飛一邊講，我見到佢望住嘅地下上面出現咗幾點水滴。

「係呢，講起教會呢，你有冇興趣聽啲嘢。」我笑咗一笑，用手機㩒咗幾個制。

房入面嘅喇叭再次響起。

「Rebecca，你點啊，我哋見到你翻完團契之後喊啊！」

「Rebecca，我哋明㗎，你有咩記得要同我哋講，我哋幫你祈禱啊。」

「Rebecca，我係組長阿成啊，雖然團長有團長嘅意見，但我覺得其實阿飛都幾好啊，今日佢一嚟到就我同打招呼，你哋要加油啊！」

「Rebecca，恭喜你拍拖啊，見到你終於搵到另一半我哋都好開心！」

「Rebecca，有機會你帶埋阿飛翻嚟啊，我哋都好歡迎佢。」

「Rebecca，我知你嘅選擇未必個個支持，但我會支持你㗎，最緊要有咩都要同我哋分享，我哋會祝福你！」

「Rebecca，唔怪得我覺得你最近開心咗咁多，好感恩你搵到個令你開心嘅人！」

「呢啲錄音，全部都係喺Rebecca電話入面嘅團契團友whatsapp度搵出嚟嘅。」我解釋，順便補多句：「ok，或者算係偵探hack出嚟嘅。」

阿飛聽住呢啲錄音，抬起咗頭，好明顯咁望到佢嘅兩行眼淚。

「其實，你都為Rebecca嘅世界帶嚟咗祝福同快樂啊。」阿飛聽到我呢句說話，喊得更加犀利，我即刻遞咗張紙巾俾阿飛。「我對教會就真係唔太熟，但我淨係知教會其實都係人聚集嘅地方，而有人就有唔同意見。呢個世界俾意見嘅人有兩種，一種係真心想俾意見嚟幫你嘅人，另一種就係唔理事實、淨係俾意見想你聽哂佢講嘅人。既然每個人都有對愛情唔同嘅理解方式，點解要因為某啲人嘅理解，去改變你同Rebecca嘅關係呢？」

「我......我唔識諗咁多，我淨係愛佢，我淨係想佢好同幸福咋......」阿飛喊到收唔到聲，仲一直拍牆揼地，成個畫面其實都幾mk，但同時又幾感動。

感動嘅位，係我感受到，呢個表面mk嘅人，內心其實好單純。

佢真係好單純咁鍾意Rebecca，好單純咁想Rebecca好。

呢一刻我終於明白點解兩個睇落咁唔同嘅人可以一齊到。

因為，佢同Rebecca就算外表幾咁唔同，其實內心都係同樣嘅單純。

曾幾何時，我都試過好似阿飛一樣，好單純咁希望令一個人幸福快樂。

可惜嘅係，呢份單純，今日變成咗一種痛覺。

「其實，即使你唔同Rebecca分手，你一直以嚟所做嘅一切唔係都係為Rebecca好同令佢幸福咩？」

「一直以嚟？」阿飛唔明咁望住我。

「好多人喺感情面對問題嘅時候，會一心一意去改變對方。但係你，為咗想令對方幸福，你一直去令自己進步。呢個，咪就係你可以令Rebecca幸福同快樂嘅方法囉。既然本身都可以帶到幸福俾佢，咁又分手嚟做咩呢？」我微笑住咁望住阿飛。

阿飛無答我，只係繼續喊。

「係呢，你哋聖經嘅十戒入面，好似有一條係『不可說謊』之類嘅嘢？」