《我專門幫人擺分手和頭酒》 - （三）大學與現實的鴻溝(上)

家豪同Sharon Year 1嘅時候認識，一個文靜，一個運動型，但係大家都係讀Business。

即使外界睇落兩個人好唔襯，但最後兩個人喺Year 2一齊咗。

家豪又大隻又有陽光feel，睇落一定係食女無數。

但喺家豪呢個大隻仔嘅心入面，其實有一份好細緻嘅心思。

佢一直都相信，初戀，就係要結婚嘅人。

所以點解一直以來佢都無拍拖，就係因為佢仲揀緊一個啱嘅人。

最後，佢揀咗Sharon。

而Sharon係佢初戀，所以佢特別珍惜。

「分手和頭酒？個名咁唔吉利嘅？如果分手要自己俾錢食一餐和頭酒，仲要俾服務費？咁咪即係搵笨？」

「BB，但係如果拍到五年零六個月，就會免費有餐飯食喎，佢請喎，揀咩都得喎！到時省翻啲錢我可以送多枝唇膏俾你都好啊！」

「咁正？咁我要食翻我哋拍拖第一個月嗰間高級嘢！」

「就咁話啦，咁我哋簽約啦！」

「簽啦，五年半咋嘛。有幾難？」

有幾難？

呢個問題對於拍拖無耐嘅情侶嚟講，簡直係多此一問。

因為每對情侶拍拖熱戀嘅一刻，個腦入面都只係得「一生一世」、「天長世久」呢啲四字詞。

傷心欲絕？恩斷義絕？一拍兩散？

咩嚟㗎？食得㗎？

一直以來，因為家豪同Sharon嘅外型太唔襯，好多人都問過點解佢哋會一齊。

佢哋都唔太介意，因為外型襯唔襯呢樣嘢，自己覺得順眼就ok啦。

而且，對佢哋嚟講，佢哋都好多嘢好襯啊。

大家都鍾意Nike唔鍾意Addidas；

大家都食粉麵唔食飯；

大家都對日劇情有獨鍾。

對於熱戀嘅情侶嚟講，無論大家相同嘅事有幾細微，佢哋都覺得好似重要到令佢哋稱得上「天生一對」咁。

嗰時嘅家豪覺得，嗯，我要搵嘅就係呢個人啦。

但係直到去Final Year，佢哋先發現原來襯真係好緊要。

唔係講外型喜好，係個心。

家豪經過暑期實習，佢已經知道自己唔係做business嘅材料。

佢其實係學校嘅手球隊，佢自己亦想簡簡單單，做個體育老師。

當佢同Sharon分享完自己嘅諗法之後，佢哋嘈咗幾場交。

內容大概係，Sharon講佢自己好鍾意同商界人士打交道，而且佢天生就係一個商界人。

Sharon又講，佢曾經好開心家豪同佢一樣讀Business，咁就可以兩個人拍住上打天下，仲夢想過兩個人可以一齊開會計師樓。

最後Sharon講，佢對家豪好失望。

家豪聽完，實在唔識反應。

佢知自己心入面想揀嘅路同Sharon完全唔同。

雖然係咁，但佢都無諗過分手。

因為，佢真係好愛Sharon。

佢相信，有愛，問題就可以解決。

但係佢忘記咗，有愛就可以解決問題嘅條件，係雙方都要有愛。

而且佢亦都忽略咗，同佢爭奪女朋友嘅唔係一個人，而係現實。

一個月前，當家豪臨時被學校教授要佢翻去改論文，喺百萬大道經過嘅時候，佢見到兩個人。

喺樹蔭之下，呢兩個人錫緊。

一個係Sharon，另一個係同系入面數一數二嘅學霸。

後來家豪聽人講，呢個學霸未grad都已經收到大公司offer，而且仲同老闆好熟。

有人話過，所有大學嘅情侶畢業後一年將會係分手高峰期，因為情侶要開始面對社會同現實嘅挑戰。

家豪無諗過，未畢業，佢就要同Sharon面對現實。

而且，仲要係喺毫無心理準備之下。

ns216.73.216.48da2

Reading Theme:

Font Size:

Line Spacing:

Paragraph Spacing:

Load the next issue automatically