《我專門幫人擺分手和頭酒》 - （二）反射

「我都係應梁小姐你嘅要求咋。因為你話想知大家分手嘅真正原因，咁呢個就係真正原因。」我攞翻嗰堆隊到埋我塊面前嘅相。

每張相，都係Sharon同一個睇落似係金融才俊嘅男仔攬攬錫錫嘅相。

唔同角度，唔同招式，應有盡有。

「你搵人查我？」Sharon對眼瞪到大一大，完全無哂本身嗰種斯文嘅氣質。

我明嘅，呢種就係成語所講嘅「惱羞成怒」。

「咁因為梁小姐你想知真正分手原因，我當然要派個同事去查下。」我笑住咁指一指企埋咗一邊嘅偵探。

「我要嘅係佢同我分手嘅原因！唔係查我！」Sharon一隻手指指實已經一臉死灰咁坐翻低嘅家豪。

「無，你見到呢個就係你哋分手嘅原因。」我好無奈咁講。

「咁佢呢？你有冇影到佢出軌？」Sharon似乎仲未死心。

「無，佢一直以嚟都無出軌。」我望一望家豪，佢由一個睇落有幾分帥氣嘅陽光男孩，變到而家死氣沉沉。

「無可能！佢明明兩星期前開始對我唔同咗！一定有啲嘢！」Sharon再拍一次枱。

其實好似Sharon咁嘅人我見過幾個。

出軌嘅人，總係覺得人哋都會出軌背叛自己。

但其實，只不過係佢哋自己內心有鬼。

「因為你出軌，對感情投入少咗，所以你先會覺得段感情悶咗。而且感情係相對嘅，你付出少咗，人哋都會感受到咩事，自然都會付出少咗。」我見到家豪個樣有少少反應，似乎俾我講中咗佢心聲。

「家豪，家豪......唔係咁㗎，我同個男仔玩下㗎咋，我對你先係認真㗎。」Sharon呢一刻突然好似判若兩人咁，一臉慘樣走埋家豪身邊，細細力搖住家豪隻手。

嘩，呢啲女，好危險。

「你走啦，我哋分手啦。」家豪拋低咗呢一句，擰咗個頭去望海景。

我相信唔係個海景有咩吸引，因為家豪本身成晚都無望過一眼。

只係呢一刻，佢唔想見到Sharon。

「家豪啊.....我哋再開始過啊，我可以同個男仔斷絕來往㗎。」Sharon講得好誠懇，聲淚俱下。

「你仲叫我點信你。」家豪無望翻過嚟，繼續望住個海。

睇住家豪嘅冷淡，Sharon好似知道已經無力挽回。

佢吸咗一口氣，抹一抹眼淚，然後粒聲唔出就走咗。

現場，得翻我、家豪，同埋企埋一邊嘅偵探。

「你點解會有呢啲相？」家豪突然間轉翻個頭過嚟，望住我問。

「你知㗎。」我笑一笑，將手上嘅相疊埋一齊，放咗喺家豪面前。

「你偷咗我手機入面嘅資料？」家豪無神無氣咁問。

Bingo。

「其實我哋習慣會喺『分手和頭酒』之前了解下雙方背景，咁啱嗰日去到中大見到佢偷食，然後又咁啱見到你影咗佢相，咁我哋見你部機影出嚟高清啲，所以咪趁啱啱你入座交手機嘅時候，順手去locker偷用咗一下你部機，順手再過啲相print出嚟囉，呢啲對偵探嚟講濕濕碎啦。」我俾咗幾下掌聲偵探，但係偵探好唔俾面咁繼續黑埋口面。

無錯。

所有相，其實唔係嚟自偵探，而係嚟自家豪手機。

簡單講，喺我踢爆Sharon出軌之前，家豪已經一早知Sharon出軌。

所以啱啱當偵探放相上枱面嘅時候，家豪遠遠地望一眼，就已經唔需要再行前睇。

因為呢幾張相係出自佢手機。

而且，佢已經好熟悉呢幾張相。

呢個時候，間房靜咗。

我好鐘意呢啲揭破真相之後嘅寧靜時刻。

因為通常呢啲時刻出現，就代表將會有更心底嘅秘密蘊釀緊要講出嚟。

「你明知佢出軌，仲要有哂相，你就應該一早踢爆佢啦！」

就係呢個我極期待嘅時刻，Kelly一下衝咗入嚟。

佢呢一下同兩個慾火焚身嘅情侶突然俾阿媽衝入房問飲唔飲糖水嘅情況一樣。