「係咩啊？」我緊張地問。
「天機不可洩漏，講咗出嚟，可能會令你質疑呢個『關鍵詞』。當你對『關鍵詞』產生動搖，可能就會影響到你穿越嘅次數。所以，你真係決定要聽？」死神瞪著我的雙眼，把我直看得內心發毛。
「得得得......唔聽唔聽。」
「根據啱啱所讀取到嘅『關鍵詞』，佢可以連貫到九個回憶載點，亦都係代表住，你有九次機會去改寫胡皓晴嘅命運。所以，你確實決定要穿越時空？」死神的語氣，就像是在問新郎新娘是否願意的律師。
「穿，一定穿！」能讓阿晴起死回生，我想也不想地回答說。
「咁係你出發前，我最後要提醒你幾樣嘢。第一，唔可以主動話俾過去嘅人知道你穿越緊時空，只要一講俾人聽，你就會馬上翻嚟現實，而且亦唔會再有機會出發。所以，想救胡皓晴，就記得小心。」聽著死神的勸戒，我鄭重地點點頭。
「第二，當你決定要穿越時空，就必須要逐個回憶載點走過，除非中途已經成功改變咗胡皓晴會死嘅現實，否則唔能夠中途想退出就退出。」
「第三，亦都係最後一樣。你要記得，你係歷史當中即使只係作出咗少少改變，而家嘅現實都可能會好似蝴蝶效應咁產生巨變，所以你要小心你嘅一舉一動。當然，相反嚟講，你小小嘅動作足已帶嚟現實嘅變化，所以盡量試下令你經歷過嘅事出現少少改變，或者已經可以改變到胡皓晴已死嘅事實。」
「其實，穿越時空係咪真係可以令阿晴翻生？」眼見出發在即，我發現自己其實心中仍有掩藏不住的擔心。
「愚蠢嘅人類，改變歷史，話易唔易，話難唔難，你唔係有句口頭禪，叫做『唔夢想，又邊得嚟夢想成真呢？』，而家既然阿晴已經死咗，你咪大膽咁夢想下，或者會成功呢。」死神以熟悉我的口吻說道。
「唔夢想，又邊得嚟夢想成真呢？」
對，這確實是我所堅信的座右銘。
雖然事情已經發展到穿越時空這種荒謬的程度，但若然能夠成功救回阿晴，那我就盡力一試吧。
「總之我只要令佢唔好嫁俾嗰個渣男，或者唔好俾佢跌落海就得啦。」我在心內自說自話，嘗試減輕一下出發前的緊張感。
「我只能夠講，為咗令我下世唔好變蝙蝠同埋令胡皓晴復活，希望你會成功。」死神語重心長地說。
「嗯，我準備好出發㗎啦。」難得死神臉上出現了一剎那鼓勵的表情，我朝他肯定地點了點頭。
「為咗幫助你順利完成任務，我同你可以有一句暗號，當你講出呢句暗號，我就會出現嚟解答你嘅問題啦。」死神說道。
「咁句暗號係咩啊？」
「Ummmmm你有冇睇過一套電視劇，係講男主角為咗女主角而回到過去？」死神想了一想，向我問。
「當然有。」我心想，求婚大作戰嘛，這神作誰沒有看過。
「咁你識唔識唱佢首主題曲？」
雖然「求婚大作戰」是日劇，但憑著我前後看了十多遍的經驗，我還是可以勉強哼出不太標準的歌詞的。
所以，我又點了點頭。
「咁就好啦，我哋就用呢首歌最激昂嗰句嚟做我哋嘅暗號啦。而家你企落床，有氣勢咁嗌一次，我就送你翻去過去啦。」
我一邊想著到底「求婚大作戰」主題曲哪一句歌詞算是最激昂的一句，一邊站到了床邊。
「準備好就開始嗌啦！」死神一臉期待地看著我。
「Oh baby，no maybe......」
「停停停！愚蠢嘅人類，你到底唱緊咩啊？」死神一下子就把我叫停了。
「咩啊，最激昂唔係呢句咩，我再唱囉......」
「你真係一個愚蠢嘅人類，唔係啊，我係問你到底唱緊咩歌啊？」死神一臉沒好氣地問。
「又係你話係一套男主角為女主角而穿越嘅劇集主題曲嘛，呢首咪求婚大作戰主題曲囉。」我無辜地回應著。
「咩係求婚大作戰啊？我講緊『尋秦記』喎！」死神的表情就似是在投訴著我毫無文化，竟然連「尋秦記」也不知道。
「我點知你咁local睇cctvb嘅啫......咦，咪住，咁即係話，我要大叫嗰一句歌詞就係......」我細心地從「誰求誰」開始，默默地回想著「尋秦記」的歌詞。
突然，我記起了，歌詞中最激昂的一句當然就是......
「天命最高！」我脫口地大聲叫了出來。
「啱啦，出發啦！」
隨著死神一聲令下，我只見眼前一陣強光冒起，而我整個人，則被強光所淹沒......
ns216.73.216.23da2
and then Add to home screen.