機動戰士高達︰瑪斯子嗣　The Children of Mars - 第七集　點睇都係高達喎

喺火星圈嘅另一度，普魯華茲嘅話事人，布魯古．卡巴欣，而家見緊客。

「跟足你哋要求，隻船唔行得喇——我應該收到錢。」

「有第三方船隻，同目標接觸咗，可以推測，目標已經轉移。」

畫面上面，男人神高神大，著住域根嘅傳統軍服。

「咁唔關我事喎——而且，來救人嘅，好似係你哋嘅機動戰士。」

「咁只係一個失控嘅反叛分子。」

「關我撚事。」

「加多份錢。」

「噢，早講吖！得得得——而家關我事。」

「照呢條航線行，癱瘓目標船隻，如果解決到嗰部白色機，額外畀多三倍獎金。」

※※※

同一時間，船上面嘅機庫。

呢次任務，完成得幾完美，嗰客都肯畀足錢。

不過，普魯華茲嘅二號話事人，古達爾．卡塔爾，心情都係唔好。

佢心情唔好，佢就要打人。

「你班死攔坦，冇撚用㗎！小小嘢都做唔好，人哋部古辛都刮花哂！」

其實佢心情好唔好，都會搵人來打。

運動要日日做，唔係會肥。

好彩，喺呢架船，永遠搵到𡃁仔畀佢打。

※※※

呢個時候，漁火，機庫。

蘇萊塔呢世人，好多日子，都喺船上面過。

但係搭人哋船，咁就好少喇。

只不過，而家最興奮嘅人，唔係佢。

「啊哈哈哈——蘇萊塔，你睇你睇，高達啊！」

「媽，你冷靜點……」

※※※

「嗰個龜殼擺咗喺頭嘅阿嬸，忽然咁鬼生猛……」

三日月左諗右諗，都冇個好聽啲嘅形容——大嬸頭上面，有個頭盔，好似係乜嘢醫療設備，遮住咗半塊臉。

頭先仲死吓吓，而家精神到唔得，圍住巴巴托司，左睇右睇。

「真係冇禮貌，而且太長喇！」

「咁就龜……啊，妖。」

爭啲畀個八婆陰咗。

係咪佢錯覺？嗰個女人，都好似生猛過之前。

「……喂啊，我聽到㗎。」

啊，差啲唔記得，大嬸個女都喺度。

「高達呢啲嘢，你哋唔係有部喇乜？」

「風靈唔係高達。」

「點睇都係高達喎。」

呢個時候，口多嘅女人，又加把口喇︰

「你形容吓，點先算係高達？」

「紅色白色藍色，V字天線，或者心口擺個A字。」

嗰部佢見過，喺域根啲宣傳單張上面。

嗰個女人舉起手指，搖咗兩搖，講︰

「真正嘅高達，得七十二部，包括你嘅巴巴托司——」

「或者嗰架青蛙？」

雖然點睇都唔似，但大叔話係高達骨架。

「冇錯，三百年前，由加拉爾號角製造，用來拯救世界嘅救世主。」嗰個女人伸出手，指住大嬸帶來嘅機體，「其他嘅，全部都係仿製品，只係生咗塊高達臉——包括風靈。」

「……風靈先唔係高達臉。」大嬸個女抗議喇。

「你換咗隻紅白藍先算啦。」

「其實我話過要粉紅色，不過媽媽點都唔肯。」

唉，啲女人，越講越遠。

大嬸而家喺——喺嗰面，同大叔傾緊計。

佢行過去。

※※※

蘇萊塔跟住過去。

不過行到一半，佢就撞到幅力場，古荻利亞都一樣。

嗚啊——呢陣除，到底係？

「我冇辦法向前喇！」

「逃避只得一個，向前就有兩個，唔係咁講嘅乜？」

「我最近聽過另一句——逃避可恥但係有用！」

「係乜將你變成咁㗎？」

※※※

「——媽媽佢竟然面不改容啊！」

「唔通呢啲，就係做大老闆嘅實力？」

三日月睇住佢哋，冇嘢好講喇。

你哋太誇張喇。

雖然真係好臭。

「整唔整到？巴巴托司。」佢問。

大叔仲未答佢，大嬸已經舉起兩隻手，講︰

「完全整唔到。」

「……吓？」

「想整嘅話，一定要完整嘅機動戰士工廠，你喺火星唔會搵到，除非去第二月球。」

咁即係唔洗諗喇，直到佢哋抵達地球之前。

「咁你唔洗失望，」大叔話，「大小姐之前問我嘅嘢，我砌好咗喇，你應該有興趣。」

哦？

※※※

澳加一處理完亞斯頓嘅事，就收到大小姐嘅訊息︰

幫佢叫哂所有人去機庫。

唉，真係使人唔使本。

佢到嘅時候，遲咗少少，似乎已經開始喇。

機庫入面，多咗個大螢幕，畫面上面，係巴巴托司，同埋——大嬸部高達？

「你到喇？團長。」

「呢部份，你就冇同我講喇。」

「留返啲驚喜啊嘛——來，落唔落注？」

大小姐坐咗喺度，前面張檯擺咗張紙，左邊寫住三日月，右邊寫住蘇萊塔。

隔離，眼鏡大嬸拿住紙同筆，大概係負責記帳。

三日月嗰邊，啲錢堆咗個山出來，蘇萊塔嗰邊，一蚊都冇。

「咳、咳——」佢講，「我唔希望船上面，有人放大耳窿，或者收數。」

「冇事冇事，玩完呢次就冇。」

「咁好啦。」

佢拿咗一百蚊出來，擺喺蘇萊塔嗰邊。

「哇，你對自己兄弟，咁冇信心啊？」

「我對三日好有信心——不過我對你，都好有信心。」

周圍幾個衰仔，見佢咁做，伸咗隻手埋來，想拿返自己筆錢。

畀佢拍走哂。

「乜料啊你哋？想縮沙？過主！陣間大小姐冇錢畀我，點算啊？」

※※※

「大叔唔係話鐳射冇用嘅乜？」

「推進器！水星妹瞄住推進器個窿打啊！」

「黐孖筋，三日月畀人打到仆街喇！」

嗰晚，得澳加贏咗錢。

※※※

「多謝多謝，慳返幾日糧。」

「你旨在嗰啲錢乜？」

澳加笑住拿錢，大小姐都笑住畀。

「你都唔旨在，」佢講，「只係借三日過橋，畀水星妹威返次。」

「𡃁仔想學嘢，咁我咪搵個教練畀佢囉——順便確保以後，少返啲麻煩。」

打完呢場決鬥，船上面班𡃁仔，睇水星妹嘅眼神就變哂——喺一間私人軍事公司，嗰嗰都畀臉駕駛，特別係最頂級嘅駕駛——幾個青春期分泌過盛嘅友仔，而家都縮咗沙。

「的確，好似仙奴咁嘅白痴，多一個都太多。」

「係啊，䁓我沖涼都算，佢去䁓蘇萊塔嘅話——唔擔保佢性命安全。」

喂，等等，仙奴做咗乜話？

佢終於知道，點解仙奴自己仆親，仆到口腫臉青。

「……再有咁嘅事，我送佢去洗一個月甲板——」

「再有咁嘅意圖。」

「……再有咁嘅意圖。」

※※※

之後，仙奴都係洗咗幾次甲板。

如果唔係三日，話要將仙奴塞入魚雷管，佢真係想讚條友毅力可嘉。

※※※

三日月瞓咗喺巴巴托司上面。

其實夠哂鐘要瞓喇，塊裝甲板都幾凍，真係喺度瞓著，或者聽日就傷風——

不過，佢都係瞓咗喺度，睇住天花板盞燈。

忽然，佢塊臉痛咗一下，有人將罐冰水，擺咗落來。

「喂，你唔凍㗎？」

其實真係幾凍。

※※※

澳加開咗罐冰水。

大小姐返房之前，特別提佢——得閒睇吓條𡃁仔。

真係婆媽，就算冇人提，佢都會來搵三日。

「……蘇萊塔好勁啊。」

係啊，輸到一棟都冇。

又有邊個估度，嗰隻小動物下面，收埋咗部機動戰士，仲要係高達？

「我仲以為，你記唔住人哋個名。」

「緊要嘅，我都有記住。」

「係呀？咁大小姐嗰名叫乜？」

三日望咗去第度，之後先講︰

「……八婆。」

唔，相處得幾好，你哋。

「有冇聽過講？」佢問，「無論號角定喺域根，打爆五部機，就算係王牌，可以揀自己嘅顏色。」

「所以呢？」

「上次你就打爆五部喇，想要乜色？」

「……白色，啲油平。」

三日終於坐咗喺身，靜咗一陣，又講︰

「喂，澳加，我會送你去伊甸——」

「我哋——我哋所有人，會一齊去到伊甸，記住佢。」

「……好。」

「返去瞓喇，三日。嗚，熄咗暖氣，呢度好鬼凍啊。」

※※※

「我——我係超級駕駛——蘇萊塔．墨——」

鬧鐘響喇。

蘇萊塔彈起身，跌咗落床，同地板親密接觸。

「痛……」

喺漁火過咗幾日，佢都慣咗早起身。

遲啲要返學，唔早唔得㗎。

首先搵古荻利亞，跟住食飯，然後去機庫訓練，一直練，練到夠鐘食晚餐——作為駕駛員，相當充實嘅生活。

雖然風靈話，佢根本由早到晚，都係喺度打機。

※※※

雖然見過幾次，三日月都係睇唔明，嗰個女人喺度做乜。

嗰個女人拿咗三間房，一間自己，一間畀咗眼鏡大嬸，最後嗰間吉嘅，除咗四幅牆，乜都冇。

每個朝頭早，就眯埋眼，坐喺地下，前面擺住紙同筆，每隔一陣，就畫兩筆，重重複複七、八次之後，眼鏡大嬸就會過來拿。

似乎係拿畀澳加。

呢個時候，蘇萊塔行咗過來。

「早晨啊，三日月。」

「早晨——係喇，你同佢，算好熟？」

「算啊，雖然幾年冇見。」

「咁你知唔知，佢喺度做緊乜？」

「完全唔知！」

你又話同佢好熟？

蘇萊塔繼續講︰「呢個我都冇見過，大概係新解鎖嘅神棍技能。」

「吓？」

「極能者啲嘢，靈你就信，咪問點解，媽媽佢係咁講嘅。」

大嬸，你科學家喎，大嬸，你工程師喎，大嬸，你可以咁嘅乜？

「妖，𡃁仔你好吵啊！」

佢擰轉頭，就見嗰個女人啤住佢。

「唉，算喇，我搞掂喇——芙美頓，拎走呢份。」

眼鏡大嬸咁啱咁好，喺佢哋後面出現，拎走份紙，跟住轉身走咗。

嗰個女人都行咗出來，講︰

「好喇，小朋友，洗乾淨囉柚喇掛？同亞古尼卡祈禱完喇掛？應該有哂心理準備，陣間輸到甩褲——」

「你真係打算掂佢條褲？」佢問。

「古荻利亞手刀！」

……屌，呢鋪條八婆起腳。

※※※

「鐳射你都要閃啊！咪當納米積層用唔哂，最慘係你唔知佢幾時用完！」

「嗰隻新仔！唔好喺度計密位喇，你當揸緊機動棺材啊？用手去感覺佢！」

「仲有你，蘇萊塔，再畀啲氣勢出來，氣勢！」

※※※

成個朝頭早，昭弘都喺度訓練。

每日第一場，全員圍毆大小姐，通常唔洗好耐，就變咗兩個女仔單挑。

三日月嘅生存時間，每日都長啲，至於佢自己，好似冇乜進展。

昌弘兩個朋友，揸咗更耐機動戰士，一致同意︰

「仲變態過死人妖。」

「咁係另一種嘅變態。」

就喺呢個時候，警報響喇。

大小姐㩒咗牆上面，特別大粒嘅紅色掣。

「喂，所有人上機，有啲嘢來緊，呢鋪來真嘅。」

……小姐你仲曉算命啊？

※※※

呢個時候，艦橋。

「團長，雷達有反應，六點鐘方向！」

幾分鐘之前，澳加就收到通知，仲早過雷達，點知大小姐係點樣知道。

跟住大小姐嘅航線行咗幾日，佢已經學識咗，有啲嘢，不如咪問。

「哎呀哎呀，竟然咁都搵到我哋。」

普洛斯佩拉，新世社長，佢哋嘅二號客人，望住佢，咁樣講︰

「要喺星海定位一艘船，唔係咁易哦。」

呢個大嬸講得冇錯，有啲嘢唔係好妥——人選唔多，就得幾個船員，睇過條航線。

「呢個之後先講，而家——」佢企起身，盡量等自己把聲，聽落穩陣一啲，「尤真，將漁火調頭，駛向敵艦。」

好快，雷達上嘅反應，夠近喇。

「出動機動戰士！」

371Please respect copyright.ＰＥＮＡＮＡwgo0UwzZh3

ns216.73.216.208da2

Reading Theme:

Font Size:

Line Spacing:

Paragraph Spacing:

Load the next issue automatically