機動戰士高達︰瑪斯子嗣　The Children of Mars - 第二十九集　收埋咗十三年嘅牌(三)

「喂，你冇嘢呀嘛？」蘇萊塔問。

佢已經制止咗第三部，使用阿賴耶識嘅機體，不過螢幕上面嘅奇奧，仲喺拿住個嘔吐袋。

奇奧冇答佢，只係畀咗佢，一塊經典，神棍成日拿出來嘅臉——「你最好乜都咪問」。

「跟住呢？下一部喺邊？」

「……呢便，距離呢度唔係——」

奇奧講到一半，塊臉又變咗色——呢塊佢都認得，叫做「又有嘢發生喇」嘅臉。

※※※

劍捅入去，佢又謀殺咗個細路，比佢個孫仲細。

一定有更好嘅方法，不過——不過菲力特冇諗到。

阿賴耶識，加上大量催谷反應速度嘅化合物，組合出極為危險嘅殺人武器——如果再早廿年，佢或者仲可以避開駕駛艙，一部部咁制止。

而家嘅佢，做唔到喇。

變老，就係咁嘅一回事，尤其搏命嗰陣，特別明顯。

不過佢仲未老到，會察覺唔到，背脊一陣殺氣。

劍轉身劈過去，正好，劈著紅色嘅刀。

雖然全身黑色，但如果佢冇認錯，呢部應該係RGE-G2000X，格朗西嘅測試版，竟然流出咗畀伊蘇拿里奧？——算喇，呢種事，都唔係好出奇。

更出奇嘅係，嗰部機，竟然喺佢眼前消失喇。

「……海市蜃樓？」

原本設計上，格朗西冇呢種機能，不過，都冇人阻止你加落去——海市蜃樓嘅軍事用途，尤尼烏斯條約係有禁止，不過約束情況，只包括號角同P.L.A.N.T.嘅衝突。

而家，係號角同號角喺度衝突——再者，有啲人本來就唔守信。

佢舉起盾牌，向住側邊。

刀劈咗上去。

上個呼吸，佢就預見到呢一幕。

「……極能者。」

聲音從短程通訊傳來，好熟，但係佢諗唔起，自己喺邊度，或者幾時聽過——

刀又劈咗埋來。

快，快到不可思議——角度、動作，都遠超一流——可能就連全盛期嘅烏盧夫，都做唔到咁嘅地步。

太大意喇，佢竟然同咁嘅對手，喺度埋身肉搏。

不夠十個回合，對手已經斬甩咗，佢嘅左手。

刀鋒，已經落到眼前。

忽然，鐳射打咗埋來，來自四方八面，逼走嗰部黑色嘅機體。

※※※

太好喇，佢哋趕得及。

當風靈嘅子機，乜都未見到，蘇萊塔就收到警告——奇奧忽然就話，有人瞄準緊佢爺爺。

神棍佢近得多喇，呢啲嘢，千奇唔好唔信。

嗰部黑色機，實力極為強橫——用刀劈鐳射喇，咁仲唔強橫？

十一部子機圍住來射，竟然一下都冇中。

「奇奧，快啲帶爺爺——」

忽然，黑色機消失咗，螢幕同雷達，都搵唔到目標。

雖然，對方嘅目標，應該都得一個。

佢一轉身，就即刻見到，部黑色機出返來，拿住刀，衝向菲力特爺爺，同埋擋喺前面嘅奇奧。

※※※

神棍都有極限，佢哋最多都係預見到，幾秒之後嘅事，亦都預見唔到，超乎想像嘅事。

嗰部黑色機，就超乎奇奧嘅想像。

咁樣穿過風靈嘅火網，仲避開埋佢嘅攻擊，殺咗上來。

一切，只喺一個瞬間，所有睇到嘅未來，都係一樣，嗰把紅色嘅刀，就喺佢嘅結局。

只不過，最後一刻，紅色嘅牆，落到佢嘅面前。

機動戰士，唔係佢識得嘅型號，上面嘅，亦唔係佢識得嘅人。

只不過，佢識得嗰個，跟住聽到嘅名。

「你到底喺度做緊乜？阿西西西西姆——！」

係嘅，嗰個域根人嗌緊嘅，毫無疑問，就係佢，一早死咗嘅爸爸——阿西姆．亞斯諾。

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically