機動戰士高達︰瑪斯子嗣　The Children of Mars - 第二十九集　收埋咗十三年嘅牌(二)

就算而家，號角艦隊仍然將成個奧布，包到密不透風——更唔提域根啱啱出現，喺包圍網嘅另一面，戰得一片混亂——要闖入來，幾乎係唔可能嘅事——除非你架船咁啱咁好，係架通用突擊艦。

智慧女神，就係架通用突擊艦。

喺卡奔塔利亞補給完之後，泰莉亞就收到指示，發射到低軌道，等時機一到，就從太空落來——至於點先算係時機，冇人講過，唯有自己執生喇。

「啟動伊索德、崔斯坦、帕西法爾裝彈——注意別打中友軍！」

※※※

就算喺呢度，奇奧都感覺得到，成座島嘅周圍——生命，喺度消失緊，用一種唔正常嘅速度——唔係話戰場有乜正常可言。

「阿爺——」

「蘇萊塔，幫我個忙，睇住呢個細路。」

「冇問題！」

蘇姐一講完，佢阿爺就點著推進器，飛出迪娃嘅甲板，眨下眼就唔見喇。

「蘇姐——」

「你等陣先。」

「仲等啲乜——」

佢忽然冇嗌落去——有嘢唔對路，潛意識咁同佢講——唔係出於極能者嘅第六感，而係畀蘇姐抦過幾十次，累積出來嘅經驗。

七、八、九……

少咁咗部，風靈嘅子機少咁咗部。

「好喇，呢個距離，AGE-1嘅雷達偵測唔到我哋——」

「你放咗部子機跟住阿爺？」

「梗係啦，似你咁衝動囉？」

蘇姐個樣得戚到唔得，係抵佢鬆毛鬆翼嘅，呢一次。

「跟住，」蘇姐轉個頭，就得戚唔起︰「艾、艾納斯艦長——」

「好行，唔送。」

「我都知道咁樣——咦？」

「兩位只係平民，我冇權力命令你哋——再加上，通訊干擾太強喇，聯絡唔到前總司令，都係冇辦法嘅事。」

「……真係冇問題？菲力特爺爺有時好記仇㗎——」

「講得好，我錄音喇。」

「乜、乜、乜話？」

「唔洗擔心喎，最懷嘅情況，只不過成船人，畀亞斯諾卿掟咗上軍事法庭——跟住殺頭啫。」

……喂，小姐，咁沉重嘅事，咪講到咁輕描淡寫喎。

※※※

劍捅入去，又一部，冇咗動作。

去到呢個距離，菲力特已經清楚明白，呢啲機體，入面裝咗啲乜——呢一刻，仲可以慶幸嘅，係冇畀奇奧跟來。

拒絕基因調整，早就變咗信仰——為咗維持呢份信仰，同時又得到，抗衡新人類嘅力量，姆達．亞茲拉路做咗啲乜，佢唔係唔知道。

就只係，一直當睇唔到——每一年，犧牲喺研究設施嘅細路，數以千計——就算係咁，比起號角七星互相攤牌，咁嘅犧牲，仍然可以話係——微不足道。

而家，睇到伊蘇拿里奧．法里度，將嗰啲剩返低，冇成為強化人嘅實驗品，「物盡其用」，只係又一個，佢自作嘅孽。

劍捅入去。

又一部冇咗動作。

入面，早就乜都冇喇。

※※※

戰線一路退後，凱瑟琳．羅斯少尉呢隊，已經退咗入城市，希望嗰啲高樓大廈，可以限制敵機動作。

策略正確——就只係，幾部M1嘅火力，仍然爭咁少少，一輪炮火之後，只見目標手腳齊全。

監視器移向佢哋。

發出紅色嘅光。

就喺咁嘅時候，身影從天而降，劍鋒劃過半空。

等佢睇清楚嗰陣，佢哋個目標，已經冇咗兩隻手。

同時，一部高達，拿住兩把劍，企喺佢嘅面前。

仲未來得及講任何嘢，嗰部敵機已經起咗腳，一嘢踢埋去——亞古尼卡啊，到底係乜人嘅主意，將個腳底整成鑽頭？

呢一腳快成咁樣，就算係新人類，都好難避得開。

但係嗰部高達就係避得開，唔單只，仲喺嗰個瞬間，砍埋隻腳，徹底廢咗嗰部敵機。

「你、你哋走先，呢度交畀我哋。」

佢哋即刻照做。

就算嗰個女仔，講到口都震哂，都一樣。

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically