機動戰士高達︰瑪斯子嗣　The Children of Mars - 第十集　唯有向前(四)

「——伊素、法里度、巴特韋恩、艾利安、古捷因、亞茲拉路，同埋最後嘅亞斯諾，就係今日嘅號角七星。」

果然係做公主嘅——澳加不得不承認，大小姐真係有讀過書，起碼比佢多。

「大嬸……咳、唔，墨丘利女士，似乎唔認為，會係艾利安搞鬼。」

「就叫大嬸啦，唔緊要嘅，順口，我唔會同佢講嘅！」

大小姐對住佢，舉起手指公。

佢兩眼一反，白返過去——呢種事，信你半成都死。

「如果係艾利安，」亞米達講，「唔洗咁麻煩，成支阿麗安蘿德，幾百艘船任佢指揮，佢想邊個死，就邊個死。」

「咁亦即係，唔會係古捷因——今日嘅古捷因卿，係阿麗安蘿德嘅副總司令。」

名瀨一講完，就笑住，望住大小姐講︰「至於邀請你，去地球嘅人，應該就係費特力克．法里度。」

「你講嘅喳，我冇認過。」

「所以，都唔係亞斯諾。」

去到呢度，佢聽唔明喇。

「點解唔係亞斯諾？你頭先係話，費特力克．法里度——」

「費特力克係亞斯諾一手帶出來——至於佢養父，伊蘇拿里奧，當今法里度卿，兩個關係就，唔係咁好。」

「仇深似海就真啦。」大小姐咁講。

「哦？你都知道？」

「伊蘇拿里奧嘅，不良嗜好，我希望我冇聽過。」

「跟住，巴特韋恩，係亞斯諾一直嘅盟友——至於伊素，年青有為，咁個冇咁嘅心思，所以唔係法里度，就係亞茲拉路。」

「啊，又係嗰兩條蛋散。」

大小姐講嘅時候，一臉厭棄，同佢提起伊謝魯根特嗰陣，差唔多。

「血色情人節戰爭嘅原兇，」名瀨嘆咗啖氣，繼續講︰「當然，冇任何證據證明，尤尼烏斯七號嘅核彈，同佢哋有關。」

「襲擊我哋嘅𡃁妹，」亞米達講，「的確提到兩年前。」

「為咗藍色而清淨嘅世界，」大小姐兩手一攤，「藍色宇宙，大概係喇，嗰𡃁妹好憎新人類，我只係順便。」

「講到呢度，差唔多清楚喇，」名瀨點頭，講︰「法里度，或者亞茲拉路，唔想你去到地球，無論原因係乜。」

「聽落唔錯，半個號角啫。」

「咁最後嘅問題——」

※※※

你哋覺得，要喺茫茫星海，搵到一架船，有幾難？

※※※

答案係，幾乎唔可能。

唯有好似提華茲咁，有覆蓋半個太陽系嘅商路，先做得到。

除此之外，就係一路跟喺後面，又或者——

「船上面，有人通風報信。」

「大概係。」

「點解唔同我講。」

其實，古荻利亞一早注意到，有啲唔妥。

嗰日，普魯華茲嘅航線，同佢預測嘅，並不一樣——更似係知道漁火航線之後，又再更改。

團長望住佢，望咗幾秒，先至講︰「你落到手乜？」

佢梗係——

※※※

梗係唔得啦。

對咗一排，澳加已經知道，佢哋嘅大小姐，最大嘅優點，同埋缺點——

婆媽。

芙美頓．亞多莫斯，夾硬處理嘅話，只係製造唔需要嘅矛盾——擺住喺度，攔截所有通訊，去到地球圈之後，再趕人落船。

咁係最妥當嘅方法。

「我落到手。」

「你肯定？」

「我一定要。」

「點解呢？」

「我要成為亞古尼卡——」

※※※

「呢個係費特力克．法里度，畀我嘅選擇，成為終止呢場戰爭嘅英雄，又或者——」

古荻利亞岳起頭，望向出面嘅星海。

「睇住第二月球，灰飛煙滅。」

呢個唔係威脅，只係推演，呢場戰爭早就注定嘅結局。

逃避，就會一無所有。

唯有向前。

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically