機動戰士高達︰瑪斯子嗣　The Children of Mars - 第十集　唯有向前(三)

同一時間，雙髻鯊上面，一間尊費不凡嘅會客室。

澳加同埋大小姐，喺度做客。檯嘅另一便，係名瀨．他賓，同佢嘅大老婆，亞米達．艾卡。

「呢次多得你哋，亞米達先至冇事。」

「大小姐乜事都冇，我哋先要多謝尊夫人，他賓先生。」

「名瀨，朋友都嗌我名瀨。」

「係嘅，名瀨先生。」

「咁我哋打和喇，雖然想咁講——」

名瀨啪咗聲手指，幾個後生女，打開門行入來，將個人掟喺佢哋面前，跟住又行返出去。

「既然係我哋搞事先，點都要搵返啲嘢陪罪。」

馬魯巴．亞奇，佢哋親愛嘅前社長，趴咗喺度，畀人五飛大綁，連嘴都塞住。

名瀨企咗喺身，搣開馬魯巴嘴上面，嗰張牛皮膠紙。

「他他他他賓先生，我我我我我哋唔係朋友乜？」

「哎呀哎呀——澳加，我頭先講過啲乜？」

「朋友都嗌你名瀨。」

「是啊。」

一啲先兆都冇，名瀨忽然一腳，踢落地下嘅馬魯巴。

「馬魯巴、馬魯巴、馬魯巴——你知唔知自己，最唔朋友嘅地方，喺邊度？」

「我我我我我——」

「起你個客尾注、出賣你嘅伙計、買賣廢棄人、安裝阿賴耶識——你都好意思，半粒字都唔同我講。」

「名名名名名——啊！」

「朋友呢，出來行，個個都有啲地方，唔乾唔淨嘅喇——」

名瀨擝咗支槍出來，頂住馬魯巴額頭。」

「只不過，你唔應該昆我。」

呢個時候，馬魯巴望住佢，好似圂咗幾日，望住杯水一樣。

「澳澳澳、澳加大人，救我啊！」

有個瞬間，佢真係想當自己，乜都睇唔到。

「……名瀨先生。」

「呵呵，啱，既然話係陪禮，咁當然唔到我發落。」

「呢個人，係徹頭徹尾嘅人質，不過——」

佢企起身，行過去，企喺馬魯巴面前。

「不過，多得佢，我哋先有命活到今日，因為咁——我會放你一條生路，馬魯巴．亞奇，就呢一次。」

「你聽吓，你聽吓，」名瀨講，「呢啲先係識得過嘅朋友。」

又啪咗聲手指，幾個後生女行入來，拎咗馬魯巴出去。

「佢爭我嘅錢，會用其他方法還——我保證，你哋以後見佢唔到。」

「有勞喇。」

佢哋坐返低，要傾嘅嘢，仲有幾件。

※※※

「——號角七星，你對佢哋，有幾多認識？」

「……佢哋有七個。」

「仲有呢？」

「……佢哋唔係好熟？」

聽到呢度，古荻利亞忍唔住，笑咗。

「嗚哈哈哈——好啦，你盡力喇，團長——唔好意思，呢條友火星來㗎——」

「哈、哈、哈——咁就有勞大小姐，同小人我上上堂——」

「好！既然你誠心誠意咁問，咁我就大發慈悲——」

「唔要域根版本。」

「喂，畀啲信心我啦。」

※※※

喺三百年前，因為冇人記得嘅原因，機械成為咗人類嘅敵人。

災難戰爭。

人口得返十分之一，文明，差啲就走到盡頭。

就喺嗰個時候，亞古尼卡．卡艾盧，降臨到世上。

白色嘅機，金色嘅劍，佢同佢嘅高達，巴力，成為咗救世主。

佢嘅加拉爾號角，成為呢個物種，最後嘅希望。

去到最後，喺一場大戰，比以前所有大戰，之後所有大戰，都更加慘烈嘅大戰，佢親手斬殺咗人類之敵，為嗰場戰爭，劃上句號。

但係，亞古尼卡葬身火星，冇返到地球。

返到去嘅，只有號角七星，最後七部高達嘅駕駛，成為咗世界嘅主人。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically