機動戰士高達︰瑪斯子嗣　The Children of Mars - 第二十六集　你哋火星來㗎？(三)

「所以，咁就係地下鐵——」

「應該唔係。」

地下鐵畀人搭嘅，唔係畀機動戰士——三日月起碼肯定呢一點。

如果佢冇聽錯，成個地底打通哂，只要幾分鐘，軌道就可以將佢哋，部署到島嘅任何位置——咁真係佢聽過，最神奇嘅事，雖然地球上面嘅人，好似早就慣哂。

「噢，你又知？」

「我同蘇萊塔出過去。」

佢一答完，就有人扁嘴喇。

「哇，你哋出去玩，竟然唔約。」

「一，我係去睇巴巴托司，二，係你自己話唔出去。」

古荻利亞嘅嘴更扁喇。

「……我下次同你去？」

「我想去戲院。」

呢個佢都聽過，成班人睇卡通嘅地方，好似係。

「風靈上面乜都有得睇。」

「噢——唔得，嗰條友好有原則，上映頭半年，佢唔播㗎。」

原乜鬼則，奇奧好似係咁講——咁叫非法下載——咁遲半年係為乜？同埋——

「……風靈唔識講嘢。」

「呵、呵、呵。」

每次睇到呢個反應，佢背脊都寒一寒。

嗶——嗶——

就喺呢下，儀表板響咗，表示佢哋到喇。

※※※

雷伊．法爾克，奧布陸軍二尉，機體係M1，佢哋呢支小隊，最先抵達現場。

大型運輸機從海面飛來，由航空單位護航，載滿機動戰士，距離佢哋背後嘅城市，只有大概一、兩分鐘嘅距離。

螢幕上面，密麻麻嘅敵方信號——號角嘅達加，喺歐亞同大西洋大量生產嘅機型——機動戰士從天而降，數量係佢哋嘅幾倍。

佢舉起槍。

瞬間，槍林彈雨。

同兩年前，冇乜分別，只係嗰一部，擁有藍色雙翼嘅高達，唔喺呢度喇——佢喺島嘅另一面，抵抗更多敵軍。

希恩曹長，嗰女啱啱讀幼稚園，係最先中彈嗰個，畀鐳射打穿咗駕駛艙。

凱恩二士，啱啱畢業，父母喺兩年前過身，有部達加拿住劍，腰斬咗佢部機體。

卡斯提三尉，呢隊入面，唯一嘅新人類，擊落幾部之後，畀更多敵機包圍，好快就冧低咗。

就剩返佢，佢都差唔多喇——天上面，七、八部偉達，鐳射步槍不斷開火，想將佢連埋當掩體用嘅大廈，一齊打成灰。

一槍鐳射擦身而過，座大廈撐唔住喇。

M1嘅手得返一條，步槍早就冇咗。

佢拿起頸上面嘅吊墜，再睇多次上面，前妻張相——最起碼，P.L.A.N.T.應該安全過呢度。

佢啟動鐳射劍。

只不過，佢仲未衝出去，上面嘅敵機，就一部部跌哂落來。

灰色天空入面，就得返一部，白色嘅高達。

識別信號︰默西亞(Moshia)。

※※※

佢又遲咗。

古荻利亞睇住螢幕，友軍信號，只係得返一個。

打仗係咁，犧牲在所難免——

屌佢老尾嘅在所難免，呢堆狗屎根本唔會發生，只要有啲人發少陣神經！

佢打開國際救離頻道，唔知道，亦都唔理，有邊個會聽到。

「專登瞄準城市。做乜啫？你哋火星來㗎？——」

兜兜轉轉，佢又返返來喇，同號角嘅戰爭——不過今次，佢有個好啲嘅理由。

佢舉起劍，指向眼前，一部又一部嘅機動戰士。

「如果小小嘅良知，冇叫你返轉頭——咁來啦，士兵，我要劈柒你哋。」

※※※

「講到咁有氣勢，咪又係喺度婆媽。」

三日月拉操縱桿，側身避開跌落來嘅殘骸，爭少少就撻落佢度。

唔係冇手就係冇腳，不過駕駛艙冇事，應該死唔去嘅——雖然腦震盪就梗喇。

查實佢都慣咗，假如邊日，有人忽然唔婆媽喇，佢會忍不住檢查，太陽喺邊面升起。

佢就唔同，佢只係個傭兵，只識得傭兵嘅做法。

舉起刀，將面前嘅敵人，一分為二。

「飛唔起，係你哋唔好彩。」

傭兵只識做嘢，雖然嘢都有分，討厭同唔討厭。

呢家做緊嘅嘢，佢唔討厭。

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically