機動戰士高達︰瑪斯子嗣　The Children of Mars - 第二十六集　你哋火星來㗎？(二)

奧布由多個群島組成，除咗本島以外，淤能碁呂同埋輝夜，都各自擁有，成為戰場嘅理由。

呢個叫「曉」嘅島，相比之下，就唔係咁重要——不過，距離通牒嘅限期，得返幾個鐘頭，卡嘉蓮偏偏來咗呢度。

因為，有人嗌佢來——菲力特．亞斯諾，阿麗安蘿德嘅前總司令。

「呢度，」佢問︰「係乜地方？」

前總司令冇答佢，只係行上去。

喺天然地洞嘅最深處，鋼鐵鑄成嘅大門，企喺佢哋面前。

「由衷希望，」佢讀出刻在底下台座嘅字，「開啟這道門的日子，永遠不會到來……」

「你應該已經估到，入面擺咗啲乜。」前總司令講，「兩年前，胡志密選擇引爆輝夜，喺亞斯諾介入之前——佢希望，可以避免一場世界大戰，但佢都知道，最多，都只係拖延佢。」

大門開啟，燈跟住打開，金色嘅機動戰士，好似神像一樣，企喺佢嘅面前。

聲音都跟住響起︰「卡嘉蓮——」

「……爸爸？」

只係一段錄音——除咗聲音以外，冇任何人喺度。

※※※

有朝一日，你會需要力量，所以我將佢留畀你。

有好多嘅嘢，我來唔及教你——我以為，我哋有更多時間。

但如果你願意，喺其他人嘅身上，應該一樣，可以學得到。

咁所以，我只可以留畀你，呢份禮物，力量只係力量，無論係貪得無厭，定係一味拒絕，都只係痴愚。

單純嘅劍不會傷人，唯有拿住劍嘅人，可以決定，嗰把劍為善，定係為惡。

等到你需要力量，守護你在乎嘅，咁就來，拿起呢把劍。

但係同一時候，我真心希望，呢段錄音，永遠冇機會，播畀你聽——

※※※

「……我曾經怪責過，爸爸佢幫助亞茲拉路，開發高達——」

「咁而家，你係咪打算，拒絕呢份力量？」

「……咁你呢？前總司令，點解當初嘅你，要制造嗰部高達。」

「我同自己講，我冇得揀。」

「我都一樣——」

佢行咗上去，向住金色嘅機動戰士。

「我係卡嘉蓮．尤拉．阿斯巴。」

※※※

呢個時間，天已經光咗，雖然喺呢度，光唔光都睇唔到。

地底深處，坐滿人嘅避難室入面，普洛斯佩拉打開咗，啱啱加熱嘅罐裝咖啡。

以地熱維持能源，可以自耕自足維持糧食，菲力特嘅設計，大概係以地球淪陷，作為前提——好難講，算唔算誇張咗。

就連電視都有，而且好大部，唔驚畀人擋住。

「——投降，或者可以減少犧牲，但奧布唔會繼續存在！

「所以，我哋選擇戰鬥，喺海、喺天空、喺島嘅上面——無論如何，我哋唔會投降！

「勝利屬於我哋，因為自由同正義，都與我哋同在！」

電視上面，唔只有部金閃閃嘅機體，兼且仲有兩部，全世界都識得嘅高達——雖然紅色嗰部，其實換咗，不過根據周圍嘅歡呼聲，大概嗰班外行群眾，根本冇分出來。

※※※

呢個係菲力特嘅主意，冇嘢比上次大戰嘅傳說，更可以穩定民心。

而家，佢又返到迪娃嘅艦橋，隔咗咁多年，所有嘅嘢，好似都冇變過——雖然人唔同哂，美莉絲退咗休，而家嘅艦長，係娜度拉．艾納斯——至於佢，名義上，只係個顧問。

「偵測到大量熱源反應，」通訊員講︰「係巡航導彈。」

真係經典，教科書式嘅第一步。

佢一個字都冇講。

喺島上面，覆蓋成個群島嘅鐳射火神炮，會自己將飛彈打落來。

佢主導奧布嘅重建，就係預咗今日——以抵抗成個號角為前提，武裝起呢座島。

兩年前，佢乜準備都冇，佢唔會犯同樣嘅錯。

「來呀，伊蘇拿里奧，你導彈嘅存量，夠唔夠呢？」

「前線回報，偵測到空降部隊，」通訊員講︰「向緊淤能碁呂、輝夜、奧羅法特(Olofat)、同埋幾個城市移動——」

國防總部、同埋質量投射器，呢啲目標，固然有戰略價值，但係城市——就只有一種人，會覺得嗰啲地方，有任何戰略價值︰

恐怖分子。

嗰個恐怖分子，主宰咗七分一個世界，可以任意調動地球圈內，號角一半嘅軍力。

佢打開通訊。

「北面，𡃁妹，動作快啲。」

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically