筷子幾個上車，臨走前仲好關心我情況，但終究無人可以陪住另一個人每分每秒，就算阿謙提出佢留喺度陪我，我都拒絕咗。
「咁你自己小心。」阿謙交代最後一句，閂埋車門，貨車駛走，我亦死氣沉沉咁返上樓。曾經令我自豪嘅屋企變成灰白色，我直接攤咗喺豆袋梳化，全身無力，得返眼球可以自由郁動，掃視本來放咗樂仔個人物品嘅櫃同架，物件雖然消失，但一齊生活過嘅痕跡仍然遍佈室內每一粒空氣分子。
唔知攤咗幾耐，肚餓起嚟就想煮個麵食，樂仔嘅專屬餐具全部喺哂度，最初入嚟我淨係買自己嗰份餐具，到一齊住就再買咗一套情侶碗筷，我用粉紅色佢用藍色，嗰陣仲係兩個一齊去十二蚊店揀，我覺得無野幸福得過同另一半去買屋企用品。
原來樂仔搬走自己野，但唔會特登拎走同我一齊買嘅碗筷，我諗無幾多人搬走會特登有心拎返啲餐具走，成為留低嗰個人第二日煮野食先會發現嘅暗器，再喺內心割多一刀。
我拎起隻碗想一野丟落地下，想大叫，但一諗到發完脾氣又係要自己清理返，就忍住咗。
淥麵食，做咗廿幾年人，煮過無數次，偏偏就喺今日失咗神，好似當我唔開心嗰陣所有唔順心嘅事都會一次過湧哂埋嚟，竟然可以煮成一堆淋爛麵，我以為自己好快回神，原來已經過咗五分鐘，仲可以睇住個麵變哂色都唔識撈返上嚟。
結果個麵食咗一啖就頂唔順，好似食緊淋嘅泥膠咁，都係成個倒咗佢，無心機再煮，直接攤上床就瞓覺。
夢入面，我好唔爭氣咁見到樂仔，我拉住佢，聲淚俱下︰「我原諒你呀，你可唔可以返嚟我身邊？我真係好愛你，未試過咁愛一個人，點解你要走？點解你要搵SP？同我上床真係咁唔舒服咩？對唔住呀，係我太忙返到屋企即刻瞓咗覺，同你時間錯開咗，你忍得好辛苦係咪？你同我講丫！我幾攰都可以同你做架，你唔使出去搵第二個架，好無呀？你返嚟啦，我愛你呀，無論你幾錯我都肯原諒你，我無野呀，我無唔開心呀，可唔可以變返以前咁呀？我求下你！」愈講，我嘅身體就愈縮愈細，由企喺度拉住佢手臂，到跪喺度拉住佢褲腳，我嘅力量漸漸消失，無辦法阻止佢邁出腳步。樂仔無理我哀求，向全裸坐喺床邊嘅Anna行過去，我嘅身體收縮成小矮人，無論點大叫，聲音都傳唔到去樂仔耳中。但其實我正常嗰陣求佢唔好走，佢都一樣當聽唔到。
最終我變成一粒粒子，同成個空間融合為一體，成個空間都係我嘅眼同耳，全方位咁睇住樂仔同Anna纏綿，呻吟聲不停迴蘯，撼動我嘅身體，好似佢每叫一聲我就被海嘯冚中一次。
我同自己講係發夢，但醒唔到，因為我好清楚樂仔離開咗我，樂仔喺好多個我所唔知道嘅時間空間一次又一次同Anna做愛，統統都係事實，只係我之前一直傻更更唔知道嘅事實。我連佢哋抱緊對方，令皮膚陷入一個小谷嘅力度都感覺得到，樂仔又有無咁用力摟住過我呢？
我無助咁喊，無任何人聽到，時空無任何改變，無論我做乜都阻止唔到佢兩個繼續喺床上面交合，如同現實中嘅我亦一樣無辦法阻止樂仔出軌，我無一樣野可以控制得到，無任何野係如我所願。依個到底係夢定現實？我已經分唔清，我想醒都醒唔到。
當我放棄一切，唔再諗醒返，我就被逼要感受佢兩個做愛嘅溫度、濕度、聲頻、連熾熱嘅慾望都感覺得到，我覺得自己好可悲，竟然望住聽住感受住樂仔同Anna做愛都漸漸有反應，依種反應又令我更加覺得自己噁心，好討厭咁樣嘅自己，到底發生咩事？幾時可以放過我？我真係唔想再留喺依個空間眼白白睇住樂仔屌第二條女，我真係好想嘔。
「噁！」嘔吐感湧上喉嚨，將思識扯返入現實嘅肉體，我如同就窒息但好彩浮返上水面嘅人咁，大口喘氣，嘔吐感叫醒我之後就旋即消散，彷彿從來都唔存在咁。我第一時間喺心中感謝身體救返我，等我唔使再望住樂仔同Anna兩條扭埋一齊嘅肉蟲。
我喺床上慢慢冷靜自己，夢中嘅我放低哂一切尊嚴，以愛之名包容樂仔犯嘅錯，姿態低到連自己都睇唔起自己，但咪又係被佢無視？佢咪又係選擇抱住Anna？但我又覺得，依個只係夢，如果係現實……啲人成日話夢同現實係相反，如果我願意放低身段，願意用愛感化樂仔，個結局係咪會同夢中唔同？
係咪就會有個好結局？只要我繼續包容佢，直到有一日佢真心返嚟我身邊……我得架，我會做到架，同追夢想一樣，夠堅持就有機會成功。
於是我決定搵返樂仔，同佢講我會原諒佢。
ns216.73.216.89da2
and then Add to home screen.