牛奶繼續將琴晚嘅事一五一十講我知，樂仔向佢哋大爆發︰「你哋根本唔知香水音樂會對我打擊幾大！芯玥係幫我幫到盡呀，又出錢又出力呀，佢愈為我付出我就愈覺得愧對佢，我就愈大壓力！佢一直喺我身邊睇哂我最難堪嘅樣，但佢仲肯支持我繼續玩音樂呀，點可能唔大壓力呀？我根本想放棄喇！我無才華丫嘛！你哋都係咁講丫！但佢同我講咩呀？仲係叫我繼續加油呀，叫我堅持落去呀，佢根本唔明我幾痛苦！佢要我堅持根本就詛咒緊我！」
「你個仆街真係傻撚咗，人哋對你咁好你就更加應該努力，唔好辜負佢嘅心意！你根本淨係想享受有人崇拜你覺得你玩音樂好型好叻嘅感覺，唔係真心愛音樂呀！」阿謙都大爆發，而我就算聽完佢哋覆述樂仔嘅想法，都係唔明自己做錯咗乜嘢。
「我唔肯落苦功！？我為咗搞音樂連Sonia都無埋，我無為依條路努力過咩？唔好唔記得你哋一開始有少少成績、有人聽都係因為有我咋！Anna唔需要睇到我掙扎求存嘅一面，我喺佢面前永遠都係個有型有款嘅音樂家呀，我喺佢面前先抬得起頭做個男人！我喺芯玥面前係地底泥咋！」
砰，連牛奶都忍不住用頭搥頂向樂仔，鼻血四散︰「阿嫂根本無睇你唔起！係你自卑睇唔起自己在先！你可以有佢陪你捱人生低谷已經好幸福，祝福當詛咒，係你自己身在福中不知福呀！」
筷子都用膊頭撞向樂仔︰「芯玥無害過你，一路都幫你，你仲傷害佢，仲大條道理，吔屎啦！」
明明大家都係人類，都係講緊廣東話，但由樂仔口中發出嘅音節全部都好陌生，我無辦法理解佢依啲扭曲嘅想法喺邊度萌生出嚟。
原來我嘅存在係佢嘅壓力？我只係想佢開心，我亦只知道佢繼續喺音樂路上追夢會開心，如果已經唔開心，我亦會支持佢放棄……
我對自己開幼兒中心嘅夢想從來無動搖過，無論受幾多苦有幾多壓力我都無怨言，都覺得值得，但原來樂仔唔係咁樣。咁點解唔話畀我知，佢已經攰，佢想放棄？
我愛佢，就算佢唔追夢，無夢想都唔緊要，只要可以一齊，佢就算做公務員……就算做麥記我都唔介意……
啊……
我頓時明白自己點解會咁傷心，原來我今次真係愛上咗一個人。
以前嘅我明明好在意一個男仔有無大志，我接受唔到何金耀渾渾噩噩，亦接受唔到明偉一事無成，原來全部都只係我唔夠愛佢哋，又或者其實我根本就無愛過。我一開始只係被何金耀快樂嘅笑聲吸引，當時我自己唔識笑，先會被開懷嘅笑聲吸引。同明偉一齊只係因為佢好鍾意我，我先會接受，但不當嘅開始自然會有不當嘅結局，我無辦法無視佢對我好嘅壓力，但就無視咗自己嘅感受，到最後求婚又再一次屈服喺群眾壓力之下，先會搞成咁。
其實我一啲都唔了解自己，當初喺升降機外笑嘅人，就算唔係何金耀我都一樣會被吸引。當初明偉追我，我就唔應該因為唔好意思拒絕佢嘅好意而開始一段關係。原來我一直都唔夠愛，或者完全無愛過，先會重視啲無謂嘅原則同要求。做唔到依樣、嗰樣做得唔夠好、依個item無剔到，就用嚟作為自己要結束關係嘅藉口。
「阿嫂……」
我成個人呆咗，口都合唔埋，淚水多到撐大咗眼框。當我意識到自己今次真係愛上咗樂仔，就更加覺得胸口內嘅痛更劇烈，比我嚟m落唔到床嗰種痛再痛多十倍，心臟由內向外反，所有組織同血管都駁錯哂位，暈眩、嘔吐、窒息扭成一團喺我心肝脾肺腎大腸小腸撞嚟撞去，每個細胞都叫緊救命。
我幾乎跪低，好彩牛奶佢哋扶住我。
「你點呀？」
「我真係……真係愛佢……」
「我哋知呀，知你真係做盡哂。」
我搖搖頭︰「我原來無愛過人，偏偏就愛上佢……」而至今唯一愛上嘅人亦係傷害我最深嘅人，原來被所愛嘅人傷害係咁痛，係咁辛……我腦中開始重播明偉失望嘅表情、何金耀痛心嘅眼神，我之所以明明唔愛都仲會諗起佢兩個，唔係因為我有咩留戀，而係佢兩個當時對我嘅愛仲留到喺我今時今日嘅心中。
對唔住……
對唔住…………
對唔住呀……………
我頹倒喺地上，佢哋拉都拉我唔住，由得我坐喺度。個天嘅安排好可怕，一日之內我就頓時明白何金耀無答案嘅痛苦，更加明白當初佢同明偉有幾愛我，而我又有幾絕情。如果依兩段關係無開始過，如果我早啲知道根本無愛佢兩個，佢哋無為關係付出，我亦唔使傷害到佢哋。
我一直覺得自己絕情斬纜係啱，其實傷得愛我嘅人好深而不自知。點解我要依家先明白？點解依家先透過我真心愛嘅樂仔令我明白？點解唔可以早啲畀我明白愛係乜？咁我由一開始就唔會接受何金耀同劉明偉，就唔使傷害到佢哋，我無害人的話，係咪本來就可以同樂仔修成正果？係咪就唔使承受今次咁明顯嘅報應？
ns216.73.216.89da2
and then Add to home screen.