是咁的，玩匿名交友app撞返個ex - 【番外篇】芯玥85︰大話連篇

阿謙繼續平靜咁為我重新描述當晚嘅情景。

「你咁燥做咩呀？我同佢無嘢架。」

「無嘢？咁點解佢喺度呀？」

樂仔依舊先係愕咗半秒，好快就繼續回答︰「佢本身都係我哋粉絲，見到我哋宣傳過嚟有咩問題？佢嚟到話我知，我哋都識咗咁耐，我招呼下佢又有咩問題？」

在場三個人都難以置信，嗰一刻，係佢哋三個完完全全下定決心之後要飛甩樂仔，自己三個搞音樂嘅瞬間。

樂仔環視默不作聲嘅眾人，反而忍受唔住依種心死嘅沉默，反問︰「有咩問題呀？你講丫，你哋做咩唔出聲？」

樂仔向最容易落手嘅牛奶步去︰「你都覺得好大問題？」

牛奶靜靜望咗樂仔一眼，失望咁側過身，行向一角。

樂仔再向筷子求救︰「出下聲啦，你哋咁算咩意思呀？」

筷子嘆氣，搖搖頭。

樂仔最後看向一直都怒火中燒嘅阿謙︰「個個都唔講，你最鍾意講架喇，講丫，佢過嚟睇我個show真係咁大問題咩？」

「佢自己睇到宣傳報名過嚟梗係無問題。虧你仲可以講得咁口響。」

阿樂請你嚟？

「Anna啱啱先講完，係你叫佢嚟。」

樂仔一時之間啞口無言。

「你講大話。事實就係你特登請佢嚟睇，仲話係佢自己睇到宣傳過嚟。」

「我做乜要講大話啫？我叫佢過嚟休息室，你哋個個都喺度，一個唔覺意芯玥都喺度，唔通突登整個氹畀先己踩咩？我直接叫佢喺上面後巷食住煙等我唔好？」

阿謙覆述樂仔嘅「狡辯」，但我聽落亦覺得好合理，樂仔無理由咁蠢搵個全世界聚集喺一齊嘅地方見面。只係當我諗到佢竟然喺正印有份搞又在場嘅音樂會都可以請個SP到場一齊聽，亦都係無理由，我哋互相見到面之後點算？佢又想靠大話瞞過去？條女仲要掛住佢送嘅炸豬排，我點可能認唔到？

「你係咪覺得所有嘢都可以控制得到？」

聽完阿謙嘅質問，我就知道真正嘅問題所在。

「你咩意思？」

「我咩意思你最清楚，你本身就唔係約佢嚟休息室。你點都估唔到Anna會想畀個驚喜你。」

阿謙講完先繼續還原Anna開門入嚟搵樂仔嘅成個經過︰「哈佬～樂仔喺唔喺度呀？」

「阿樂請你嚟？」

「係呀。話哂係佢最重視嘅香水音樂會丫嘛！我仲諗住佢實喺休息室準備緊，特登過嚟畀個驚喜佢㖭。你哋睇，我帶埋佢送畀我隻豬排仔嚟架！」Anna得意洋洋咁拎起炸豬排喺胸前搖晃，佢嘅角度大概係覺得阿謙成班都唔知佢同樂仔咩關係，視佢為一個忠實粉絲，而佢講嘅說話同態度亦無逾界，偏偏佢嘅每個舉動喺阿謙眼中都異常梗眼。

「咦！你到喇！」樂仔急急腳趕過來嚟，視線喺Anna同隊友之間游移幾次︰「我忙到踢哂腳呀，一齊上去食枝煙鬆下好無？」

「好呀。」

「阿樂，講兩句。」

亦因為有Anna自爆，阿謙先得出結論，可以一口咬定樂仔真係狡辯。詐聽之下，約Anna去休息室見非常不智，但事實上佢只係想畀驚喜樂仔先會擅自去休息室，先會被大家發現樂仔叫個SP嚟參加香水音樂會。

如果Anna無掛住隻角落生物炸豬排，又或者佢肯拎隻公仔洗洗佢，唔係一模一樣嘅烏卒卒版本，我無可能喺人群中偵測到依個女仔有幾「特別」。佢只會係一個尋常嘅聽眾、大波妹豬粉絲。

又，如果我無出去搵食煙嘅樂仔，就唔會見到佢哋兩個食煙同閒話家常嘅畫面。而當時我喺休息室唔見樂仔，已經感覺到阿謙佢哋幾個有唔妥。

「哦，佢出去食枝煙呀。」

我無力咁望向筷子，個頭只如果無頸椎連接的話已經跌咗落嚟，淚水隨頭部嘅扭曲角度滲出眼角︰「點解你嗰陣話我知佢出去食煙？」筷子慚愧咁低頭，我知道佢無做錯，佢係個好人，良心令佢下意識將真相講咗出口。

「咁我出去搵佢。」

「呃……」筷子叫住我，我回頭︰「嗯？」

「啊……無野喇。」

「點解……嗰陣唔叫住我？」我仍然只可以問點解，無論平時口才幾好幾能言善辯，此時此刻嘅我除咗問題，一句正常說話都講唔到。

「對唔住……」筷子靜靜道歉。

我搖搖頭，要道歉嘅人唔應該係佢。我心中好清楚就算佢唔叫住我，我無上去見到佢哋食煙都好，當樂仔喺台上多謝我嗰刻，我都好大機會同Anna對上眼，佢既然掛得隻炸豬排出現，我點都會喺場內注意到佢嘅身影。

我點可能認唔出隻炸豬排？

阿謙嘅反問的確一針見血，樂仔就係以為乜嘢都控制到，當出現佢意料之外嘅情況，佢就當場講大話拆彈。如果Anna無講嗰幾句說話，大家都一定仲會被樂嘅大話蒙混過到關，而咁樣被人拆穿除咗「柒」之外真係無咩形容詞更加貼切。

但出軌嘅人，做咗壞事嘅人，總會喺人生某一刻要經歷依種被人當面拆穿，無可辯駁嘅柒。

現場陷入一陣沉默，大家都唔知下一句應該講咩好，我就失去思考能力，淨係覺得體內嘅怒火同悲傷喺血管奔流帶到全身每個細胞。

ns216.73.216.89da2

Reading Theme:

Font Size:

Line Spacing:

Paragraph Spacing:

Load the next issue automatically