重陽節之後，我就要準備幼稚園嘅萬聖節活動，繼續沒日沒夜咁工作。今年我仲要全權負責走廊同課室嘅裝飾，由我設計主題安排其他同事完成，我都要落手做，好多剪紙同公仔，又要買啲鬼怪玩具，同萬聖節主題嘅糖，比如眼珠綿花糖、南瓜朱古力等等。最慘係恐怖得嚟唔可以太恐怖，唔可以當成年人鬼屋咁整，唔係會嚇親小朋友。
老師之間總有啲人覺得花咁多心機時間淨係為萬聖節正日好無謂，我地雖然每年要重複做一次，但對每一年第一次讀幼稚園嘅小朋友嚟講都係新鮮嘅體驗，所以我忍受唔到任何馬虎求其「做咗」就算嘅同事。我做得今次活動負責人，就希望其他人跟足我要求嚟做，小朋友所有「第一次」體驗都好重要。
「你知唔知其他老師都話緊你吹毛求疵？」美姐釘緊壁布板嘅時候提醒我。
「理得佢哋啦。」真正為件事好嘅人無話我咪得，我由頭到尾都係想班小朋友好同開心，咁都睇唔出嘅人其實無資格做老師。
「你標準太高，唔係個個跟到架嘛。」
「我對自己要求都高，我無雙重標準。」最討人厭嘅上司永遠都係寬己嚴人，講一套做一套，我自己唔係就得。幾唔妥我嘅人，只要見到最終成品都係無聲出，咁我係整得靚過你，所有人都有眼睇。
我望望鐘，提醒美姐︰「你夠鐘放工喇，留低啲嘢我搞啦。」我已經慣咗自己一個留到九點幾十點先返屋企，其實我除咗裝飾之外仲有後日嘅通告未整理，班仔女嘅功課仲未改。啊啊啊啊！！！好多嘢做呀屌！但頂硬上！你得架，鄧芯玥，你得架！
「幫多你十五分鐘啦。」美姐向來都係準時搭到正就收工嘅人，佢肯為我遲十五分鐘走已經好多謝佢。
「你今次真係要搞得好好睇睇，有幾個老屎忽已經盯住你，你有咩差錯就同校長參你架喇。佢哋話你個理念係好理想，但一定唔夠時間整，所以你點都要趕得切起貨呀。」
「放心啦，我有哂時間表，只要唔請病假，日日加班就趕得切。同埋我實做得好，起碼靚過佢哋上年整出嚟嘅成品，依家搞咗一半啦，啲課室係咪間間都有特色先？」首先唔係全部一式一樣嘅倒模課室，每間課室都係主題，有廢屋、森林、古堡、中式庭院、日式和室、迷宮……妖怪鬼魂都分好哂類別。
今日我就可以完成埋最後一間課室，聽日就整走廊。
美姐再三叮囑我要小心啲，真係發現趕唔切，就請佢食幾餐飯換佢陪我OT幾日。但我好有信心，雖然真係好攰。
十五分鐘後，美姐放工，而我如常做到九點九，終於搞掂最後一間課室。其實依間課室就係老屎忽Miss Wong負責，佢跟我意思求其做完就交貨，我唔收貨佢都唔改，我就話︰「得啦，你唔整我就整返好佢。」我唔介意用我嘅私人時間幫佢執屎，我淨係要每間課室都又靚又有萬聖節氣氛。Miss Wong好似成日好驚我會好快升得高級過佢，但講真我從來無將佢放在眼內，我做事嘅準則唔係為升職，從來都唔係，都唔明佢咁防我係為乜，唔該以小朋友為本啦好無？幼稚園老師嚟架。
返到觀塘又已經十點半，聽日就星期五可以整走廊，如果進度慢嘅話我仲可以星期六日返去執手尾，就算有咩突發情況都有個星期一，走廊裝飾比課室簡單，我有信心做得哂。
我拎哂啲仔女作業返去改，預計十二點半至一點改哂就有得瞓。今日樂仔唔喺屋企，同阿謙筷子佢哋出咗去酒吧表演賺錢。
我淥咗個杯麵食，前後十分鐘內解決晚餐，馬上改功課，邊個做得好就有貼紙。窗外閃爍幾下，開始行雷閃電，好快聽到大雨滂沱嘅沙沙聲，成個十月都無落過雨咁滯，一嚟就落場大雨。
我準時十二點九改哂所有作業，丟完垃圾就返嚟沖涼瞓覺，已經攰到眼都就嚟睜唔開。就喺我出電梯大堂丟垃圾嗰陣，我見到一個身型高瘦嘅男人都啱啱丟完垃圾，回頭我就認出佢係最重視衛生嘅筷子。
「咦？你喺度嘅？」
「啊，阿嫂。」
「你哋今日唔係去酒吧唱歌咩？」
「下？」第一個反應無得呃人，我已經清楚咁睇到筷子嘅錯愕，但佢好快又好像諗起啲乜咁︰「哦～係呀，我扭親手腕，佢哋搵咗另一個人替我，我咪自己返嚟聽下歌放鬆下，點知咁鬼大雨無得走，今晚都應該喺度瞓。」
大話。
望住筷子無所適從嘅視線左右游移，無處擺放嘅雙手散發不安，我好似直接睇到佢心臟狂跳。
我連垃圾都唔丟，直接就衝向右翼走廊G室，聽到筷子喺後面叫︰「阿嫂！」但我嘅行動太出乎佢意料，所以我快過佢去到目的地，敲門。
隨住band房門緩緩打開，阿謙若無其事諗住迎接丟完垃圾嘅筷子，點知企喺門外嘅人係我。
筷子趕到，表情好似射唔入波嘅運動員︰「唉……」
房入面除咗阿謙就得牛奶，今日G室入面有三個人，但樂仔唔喺度。
ns216.73.216.89da2
and then Add to home screen.