「阿妹？」
我同樂仔正想離開，就見到有個中年男人健碩男人向家姐靈位依邊行過嚟。我同樂仔介紹︰「啊，佢係我……姐夫。」佢未正式同家姐行禮結婚，但身份地位喺我心目中已經係姐夫。家姐走咗到依家佢都無新女朋友，亦好準時喺春秋二祭同家姐死忌都會嚟拜山。除此之外仲好似爸爸媽咪親生仔咁，總會約時間同佢兩老飲下茶。
姐夫同樂仔打完招呼，互相介紹完，樂仔好識做咁話喺出面等我，畀小小空間我同姐夫講兩句。
「佢睇落幾好仔，有個人照顧下你，芯茹都安心啲。你爸爸同媽咪有同我講，醫院見到你兩個，希望你今次可以同依個男仔白頭到老，咁佢地就唔使再擔心你。安排結婚嗰陣有咩困難隨時出聲搵佢地，又或者搵我啦，我話哂都叫安排過半個婚禮。」
「又幫佢地做傳聲筒。」姐夫同我見面嘅機會唔多，但佢總係不厭其煩幫兩老轉達說話我聽。
「最後依句就我自己講嘅，得閒咪返去陪下佢兩個食餐飯囉。都過咗咁耐。」
「係……」我見姐夫如同見到半個家姐咁尊重，家姐揀得佢而佢又真係從來都唔乞人憎，仲要做事面面俱圓，我一路都好佩服佢。
或者因為姐夫喺人前人後總係講好說話，又唔會亂咁中傷人同講是非八卦，先可以咁得人心。我以前從來唔信姐夫幫我兩老講嘅好說話，但經過兩老嚟醫院探我嘅事之後，姐夫口中嘅我爸爸媽咪好似多咗幾分真誠同可憐。
「屋企人永遠都係屋企人，至少你同芯茹嘅情況係咁。好簡單架咋，有愛就得，就算做錯都好，感覺到佢地係愛你就得。」
姐夫喺破碎家庭長大，有個半途離家出走嘅媽媽，一個熱愛玩女人都賭錢嘅爸爸，佢成長嘅時光入面最記得嘅就係木棍打落皮肉穿透入骨嘅痛楚。聽家姐講，姐夫係個正宗喺地獄靠自己雙手監生爬返出嚟嘅男人，亦因為佢喺家姐眼中係個可以背負痛苦前行，又最終逆轉人生嘅男人，所以連家姐咁強勢嘅女人都忍唔住深深愛上佢。
姐夫成日話自己無屋企人，佢只感覺到自己喺爸爸眼中係個累贅，佢亦無叫過「爸爸」兩個字。佢成長之中完全無任何溫暖，到大個賺到錢都會被爸爸拎走，聽到佢嘅故事，成日覺得佢仲精神正常已經好難得，仲可以變成一個咁溫柔又強大嘅男人，簡直係萬中無一。
今時今日，佢仍然有盡做仔嘅責任，交家用畀爸爸︰「你要錢，我比足你，除此之外你乜柒都無。」但就同爸爸再無任何交雜。姐夫算係最有資格判斷家人之間有無愛存在嘅人。
「睇你狀態，依家開始感覺到。」
「……係有少少嘅。」
「通常人都係入完醫院之後會覺得個世界有啲唔同咗。好彩你醒返之後覺得個世界好咗。」姐夫拍拍我個頭︰「有咩事就返下屋企，你咁好運有個避風港，唔用好哂。」
我同姐夫道別，佢留低準備祭品，臨走我回頭再望姐夫一眼，見佢靠近家姐遺照靜靜低語，向唔存在嘅最愛傾訴近來嘅生活。
見到姐夫個樣，我會好明白點解兩老成日叫佢唔使再盡做女婿嘅責任，我都好想佢會有屬於佢嘅幸福，即使畀幸福佢嘅人唔再係我家姐。
我返去出口同樂仔會合，見到佢背住我，我亦打起精神過去拍佢背脊，佢成個嚇咗一跳︰「哇！嚇死咩！」佢掛住㩒手機無留意我已經出返嚟。
「同邊個傾野？」
「……啊，阿謙囉，佢話我作畀你首歌可以擺上網，但我係用嚟送畀你架嘛，咁私人，我唔係咁想公開畀全世界聽。」
我拖住佢隻手︰「我唔介意呀，反正我都已經係第一個聽嘅人啦，既然好聽咪擺上網囉，可能有驚喜呢。」
唔知樂仔有咩顧慮，好似唔多情願咁，我就再畀多啲信心佢︰「我都想全世界知我男朋友有幾叻架嘛。」
「我再諗下先……」
「係咩有咩其他原因？」
樂仔摸一摸我塊面︰「咪就係想首歌只屬於你囉。」
我即刻心甜到面紅，幾乎唔敢望佢。拍拖過咗熱戀期估唔到都仲會有依啲咁甜蜜嘅瞬間……唉，我唔掂喇，真係想嫁畀依個男人，話我戀愛腦就戀愛腦啦，佢真係依世都無出頭嘅咪我養佢囉！
「但我想全世界知我男朋友幾叻。」
停步。
我望住樂仔，應該無講錯嘢丫？
樂仔轉向我，展現笑容︰「我返去同阿謙傾下，重新錄音，搞哂混音所有野，可能整個簡單mv之後再擺上網。」
「到時我都要第一個睇！」
佢捏一捏我，好憐愛咁話︰「你永遠都係我第一個聽眾。」
拜過家姐咁多次，今次係我唯一一次唔係喊住離開。失去家姐之後我嘅世界缺失咗一部分，穿咗個窿，一切同快樂有少少關係嘅感情從此由我身體穿過。但樂仔填補返我失落嘅世界，我再次心動，再次感到快樂同幸福。
依一年重陽節，落山嘅時候，我好似覺得人生再次有返少少希望。
ns216.73.216.89da2
and then Add to home screen.