我嘅痛覺慢慢歸位，由額頭鑽入腦髓，將我留喺虛無嘅精神強行拉返返嚟。擘大眼，模糊嘅視線慢慢對焦，先知自己喺病房，兩老擔心咁望住我，見我醒即刻鬆咗口氣，媽咪第一件事係捉住我隻手︰「醒喇醒喇……終於醒喇。」淚水沾濕佢眼框。
醫生幫我檢查完，無咩大礙，原來我沖涼嗰陣跣低冚到額頭，照過個腦無事，昏迷咗足足一日。醫生建議我留醫多一日先好出院，之後就交番時間畀我兩老。
同佢地已經好耐無見，一時之間都唔知講咩好，佢地嘅表情明顯同我諗緊同一樣野。
「好彩有你男朋友call白車送你入院，唔係就凶多吉少。」媽咪率先開口，即係佢地已經見過樂仔。
「佢呢？」
「落咗去買野畀我地食，一陣就番。」
「你地唔使返工咩？」
「傻咗咩，個女入院咁大件事仲返工？」佢地連我生日都無放低過工作，以前就算病都係家姐帶我睇醫生，講起上嚟入醫院都係第一次，原來佢地係會請假喺度陪我。
如果入院都仲繼續返工，咁佢兩老真係無得救，請假陪我好似係理所當然嘅做法，但我仍然覺得感動。佢地完全無提起我搬屋嘅事，好似之前發生過嘅一切都唔重要，只想同我好好傾兩句偈。
一直好少出聲嘅爸爸終於開口問我︰「阿妹你係咪同緊男朋友住？」
我點點頭，無咩好隱藏。爸爸又再鬆咗口氣，眼神變得溫柔︰「你有無交租架？唔好死痴人地喎。」
「間屋我租架咩事。」兩老互望一眼，佢地對我嘅現況一片空白，我就簡短咁講咗佢地知依段時間發生咩事，不過佢地由始至終都無問我當初點解咁突然下決心搬出去。
「你記得做家務呀。」
「我有囉。」
「出得去住就大個女，同另一個人一齊住得，如果無咩大問題，應該都係依個架喇。」出奇地，爸爸睇嚟對樂仔唔係咁抗拒，佢地一直以嚟介紹我嘅相睇對象都有啲家底，樂仔肯定唔係嗰種……唔通佢地未知樂仔正識係做音樂？
爸爸輕拍我手背︰「搵到就好喇，最緊要你開心架啫。」好似一醒返，兩老就變咗另一個人咁，可能耐無見，我又喺醫院，佢地都盡量避免有咩衝突，總係小心翼翼。
依個時候樂仔拎住外賣飯盒返嚟，見我醒咗即刻衝過嚟︰「芯玥！」佢望咗我兩秒，確定我真係醒番，仲向佢笑一笑，就即刻成個人鬆哂，好似便秘咗兩日終於屙得出嘅樣︰「終於醒喇……」爸爸過去拍下佢膊頭以示安慰︰「多得你咋，以後多啲睇住我個女呀。」
「收到。」樂仔喺外人眼中，就係一個有禮貌嘅高大靚仔，唔知兩老知樂仔做音樂會唔會有其他反應呢？
「你有新歌記得腥畀我。」爸爸一講完我即刻打咗個突，咩新歌話？
「咁快聽哂？」」
「係呀，仲有無貨丫？」
「作緊！」
「等你。」我視線隨樂仔同爸爸一對一答左右游移，唔識畀反應，樂仔見我咁，即刻幫我解畫︰「你爸爸知我做音樂走去搵我啲歌聽，點知上咗癮。」我真係既驚且喜。
兩老好識做咁拎咗兩個飯盒︰「我地去食堂食，你地慢慢。」臨走爸爸又拍拍樂仔膊頭︰「加油呀，睇好你。」
「咁交畀你喇。」媽咪補多句之後，就拖住爸爸兩個一齊離開病房。
當得返我地兩個，樂仔坐喺我身邊，我話︰「佢兩個竟然無刁難你。」
「唔好咁話佢地啦，佢地好好啊，聽到我做音樂都好支持，同我以前面對嘅家長完全唔同，唔怪得佢地個女可以唔睇錢全力支持我。」
我突然明白，原來有啲野係遺傳兩老。
「佢地話之前逼過你相睇，其實都係擔心以後無人照顧你。呃……佢地話你家姐出事之後，就一直擔心你，仲要本身有個好有錢嘅男朋友，臨結婚又悔婚，就仲擔心。」樂仔呼咗口氣︰「佢地係為你好嘅，只係用錯方法啫，依個我覺得啦。」
「如果佢地唔係為你好，第一件事已經鬧咗我走。佢地話，最緊要同我一齊嗰陣，你係開心就得。」
喺樂仔口中聽返兩老無同我講嘅心意，唔知點解突然有少少感動，雖然佢地唔聽我講野依點好難改，亦好難頂，不過個出發點都係想我過得好。又調返轉諗，做父母見到個女悔婚，又驚佢嫁唔出，其實除咗搞相睇又可以點？只係我從來唔需要相睇，我有佢地兩個陪下都好足夠。
樂仔輕輕嘆口氣︰「原來你家姐……」我點頭，佢就溫柔咁摸下我啲頭髮︰「唔係見到你爸爸媽媽，都唔知有咁多野無同我講。」有關屋企、有關我以前嘅事，其實我都無同樂仔講過，同時樂仔亦無同我講相關嘅野，大家一齊只係好純粹兩個人嘅關係，其他一切都唔重要。
一段關係發展到咁上下自然會講到屋企，如果未到嗰個時候我唔想突登提，我諗樂仔都一樣咁諗，順其自然係最好。
「嚟緊重陽，我陪你去拜下家姐。」
樂仔簡單一句，我啲眼淚即刻湧出嚟，點點頭。即使我一路都無講，但樂仔好似先天就知道我最重視嘅屋企人係邊個咁。
ns216.73.216.89da2
and then Add to home screen.