我無辦法眼白白睇住樂仔消沉嘅樣，佢無助嘅樣就好似個喺海中心漂流，一心以為只要搵到木板就有救嘅人，終於有機會捉住一塊木板，先發現承受唔到佢嘅重量，都係向下沉。
要追求夢想本身就比一般人要承受更多苦難，往往最在意嘅事就會有最多考驗，帶嚟最多痛苦，正正因為樂仔重視香水音樂會，知道依個活動賺唔到錢先會咁大打擊。如果佢只係搞個自己本身都唔睇好嘅活動，就算蝕哂都好，對內心嘅衝擊都未必咁大。
我強烈感覺到今日係一個轉捩點，如果樂仔因為香水音樂會放棄一直以嚟嘅夢想，會係好可惜好可惜嘅悲劇。實現一個願望，反而擊沉一生嘅夢想，無野慘得過咁。
作為佢女朋友，我有責任令佢重新振作。
「我出得錢畀你搞就預咗會蝕，就算蝕哂我都心甘命抵。」我好堅定咁講，我要樂仔知道我真係願意為佢付出同支持佢，如果我係睇中會賺錢先支持佢，咁本身就唔係真正嘅支持。
我都先提起精神，正面咁安慰佢︰「你唔好理賺定蝕先，我地由開始做，到做完，一路都好開心架嘛！你咪當係用舊錢嚟買開心囉！」
樂仔有啲錯愕︰「嘩……咁都得？」
「點解唔得？買野係咪要畀錢先？咁你會唔會話買野係蝕錢丫？唔會架嘛！我地今次一齊搞香水音樂會係好辛苦，但一路都好開心喎，同有無得打和有無得賺錢無關係架嘛！」
反正舊錢都係無咗，錢又無又唔開心，咁就連「買開心」都稱唔上。既然我地之前咁開心，咁舊錢係「蝕咗」定係「消費」，個定義就憑我地一念去決定。
「……咁又好似有啲道理。」樂仔嘅表情慢慢緩和，好似睇到本身烏雲密佈嘅天空透出一柱陽光︰「我發覺你次次都講到啲我無諗過嘅角度出嚟，同以前話我返工係做兼職一樣。」
「我個角度幫到你咪得囉。你放心啦，我知道追夢係好辛苦，但我真係會支持你，係心甘情願嗰隻，所以你唔好顧慮我嘅事，唔好令我成為你嘅包袱，今次唔得咪吸收經驗下次再做囉。」
樂仔聽到「下次」，面上稍有難色，可能因為今次經驗真係有啲嚇怕咗佢。
我將手放喺佢手背上︰「我想你堅持落去。」
我信佢總有一日可以真正夢想成真，我彷彿睇到未來某一日，我地會喺另一次座無虛席嘅香水音樂會之中，連空氣瀰漫嘅甜香都近在咫尺，淨係諗到嗰個畫面就充以令我感動到有啲眼濕濕。
「你信我丫，你以後一定唔使再做兼職，全世界話你唔得都好，你自己都覺得自己唔得都好，我都覺得你會得！」
樂仔難以置信咁望住我，一時之間講唔到野，淚水慢慢泛上佢眼框，終於手背一反，同我十指緊扣，兩隻手捉住我隻手放喺額前，如同虔誠教徒感謝神恩︰「多謝你……多謝你呀……」
我摟住佢，希望自己嘅無形嘅能量可以傳送比佢，令佢有勇氣繼續努力，佢回抱我，起初軟弱無力，要用上全身嘅力量將我抱得更緊，我先感受到佢身體中嘅力量。或者點望樂仔、點聽佢講幾受打擊，都唔及同佢摟實嘅依刻感受到佢到底嘅消沉，原來一個大男人嘅身體可以變到軟體動物咁。而我亦不自覺心痛到流眼淚，因為我真係從佢身體知道香水音樂會嘅失敗到底傷得佢幾深。
如果樂仔覺得無力企起身，就等我成為支撐佢嘅骨架。
你無力，我有，我畀你。
「我地去食餐好，轉換下心情！」
「芯玥。」樂仔好認真咁望住我︰「我……」
我唔出聲等佢講，空氣稍有凝結，佢深深吸一口氣︰「我會繼續堅持落去，我應承你，我一定會成功。」
「我知你一定會，我信你一定會。」
我同樂仔去咗打邊爐，化悲憤為食量，我同佢講我地容許自己失落一日，可以被擊沉一日，食盡佢，喊夠佢，第二日起身就要起返身。
雖然我本身放工已經無乜力氣，淨係想快啲訓覺，眼皮淨係保持張開都用盡全力咁滯，但為咗令樂仔振作，我要超越自己體力同精神嘅極限。一個眼訓嘅人安慰其他人即刻無乜說服力，樂仔感受唔到我嘅能量都好難打起精神。
結果終於又返到屋企，我沖涼嗰陣，可能因為熱水一淋到身上就令所有緊繃嘅精神馬上鬆落嚟，我企喺度恰咗恰，雙腳一軟跣低咗。
感覺到自己撞到啲野，身體有痛覺，但實在太眼訓，唔想醒，意識染上墨黑一片。
ns216.73.216.89da2
and then Add to home screen.