我凌晨三點幾嚇醒之後就瞓唔返，美姐、校長都各自有搵我，思雯亦唔知點解問我依排點，但我全部都無覆機，眼中只有「樂仔」嘅訊息框。右方嘅綠色依然一大嚿接一大嚿，左方嘅白色一直都無出現。
所有質問、辱罵、要求都無任何回應，我亦唔夠膽睇返自己好似發癲一樣嘅千字文，如同一個喺街度大叫但無人理嘅痴線婆。
我冷靜自己，強行壓抑自己心中鬱結，當一切重新嚟過︰「對唔住，係我唔好，我唔應該發哂癲。我已經冷靜咗，可唔可以見我？比個機會我同你傾下。」
以往日常中平平無奇嘅發送制，今日無比沉重，明明係個虛擬按鈕，但手指頭遲遲唔敢輕觸。一直以嚟同樂仔嘅對話根本如同自然反應，唔使經大腦思考，依家竟然臨發訊息之前驚東驚西其實又唔知驚乜，我用字啱唔啱？夠唔夠禮貌？佢收到會咩反應？佢會唔會睇？又覆唔覆我？
糾結咗成分鐘，大腦體感時間好似過咗半粒鐘咁上下，估唔到六十秒之內自己可以諗咁多無謂野。最後我都係唔想再受依啲胡思亂想折磨，把心一橫㩒制。
但腥完出去又有第二啲野諗，佢幾時會睇到？幾時覆機？覆我乜野？我哋有無機會見面？真係見面我又應該講乜？
大腦好似失控嘅馬，強拉住一堆思緒周圍奔騰，又好似每分每秒都超載嘅攪拌機，感受到無形嘅摩打不停運轉，將剎那間湧現出嘅念頭通通攪成一杯亂七八糟嘅腦漿。
又嚟喇，依種感覺再熟悉不過，家姐出事之後我就感受過，同抑鬱永遠一套組合拳打過嚟嘅overthinking，永無止境嘅過度思考，再由無限思想漩渦中心點孕育出焦慮同失眠。
我以手臂掩住雙眼︰「唔好……唔好又嚟……」我真係好驚自己又跌入以前嘅黑洞，咁難得先喺抑鬱症走返出嚟，係某啲特別日子先會悲從中來，但依家黑狗已經喺床邊望住我，靜待我情緒崩潰嗰陣嗤笑我嘅無能。
「冷靜……冷靜呀……鄧芯玥……深呼吸……深呼吸……」我不停提醒自己深呼吸，一口又一口氣，但大腦成千上萬嘅念頭好似巨浪咁冚埋嚟。
突然，靈機一動，我如同喺石縫中見到陽光透入無底洞嘅向日葵，慢慢轉向有一絲光線嘅方向。
成千上萬嘅念頭，「萬念」兩個字觸動到我全身每個神經細胞。
「要唔好亂諗，最好嘅方法就係搵樣嘢嚟諗，即係所謂『以一念，斷萬念』。」
城繩……唔係，何金耀嘅說話再次響起。幾乎同一時間，我好似感受到曾經嘅佢點樣獨自一個人面對無盡嘅黑夜。當初我嘅離開，對何金耀嚟講就好似樂仔離開我一樣，依家嘅我亦係曾經嘅何金耀。我已經唔再愛佢，準確咁講其實由一開始就無愛過佢，但依然覺得佢靠自己捱過咗無數個失去我嘅夜晚，竟然可以諗通到一種令自己跨過難關嘅處理方法，係一種好罕見嘅才能。連我都無辦法做到，佢唔止做到，仲將個方法分享埋畀我，令我依刻有多個選擇。
「一念……一念……」我好似喺海中心見到水泡咁，激起求生意志提起最後嘅力氣游過去，只要捉到個水泡我就得救。
我嘅一念係乜野？以前我可以諗住城繩，依家我可以諗邊個？父母無令我有過受重視嘅童年，諗起家姐就傷心，諗樂仔只會令我更加內耗，何金耀亦唔係我一念，明偉都唔係，其他前度都唔係，思雯呢？我唯一嘅友情，係佢喇。我就算乜人都無哂，唯獨友情上從來無令我難受過，我哋之間無出賣、無痛苦，只有平淡但堅固嘅感情。
思雯……
我拎返起手機，退出同樂仔嘅對話，搵返用白雪雪做頭像嘅思雯，一陣恐懼湧上心頭，如果我無覆機嘅時候依個女人喺我唔知嘅角落突然離開咗世界，我絕對會為我依刻唔覆佢而後悔到死埋一份。
「依排點？」
「八婆唔鬼覆機！」
「一路都灰剔喎，無野丫嘛？」
「捕到你在線上！一陣覆我啦！」
「係咪同樂仔有事？」
「使唔使嚟搵你？」
同樂仔嘅對話頁面唔同，左方白色框框接二連三，文字之中感受到打字嘅人對我嘅關心。思雯自己都肯定未完全放得低康仔，只係強顏歡笑，我最清楚諗唔開嘅狀態係點，而佢仍然關心緊我，無論身邊幾多野變咗，佢都一直喺度。
一瞬間，思雯發畀我嘅所有訊息變成藍剔。
「我同樂仔分咗手……」我終於覆咗思雯。我知道突然驚佢出事唔再覆機係好杞人憂天，但我真係試過，家姐就係突然間就永遠都無覆過我。
「對唔住咁遲先覆你……」
覆機後，我就放返低手機，冚好被，準備好以一念斷萬念，開始諗返同思雯一齊嘅經歷，特別係家姐走咗之後，思雯陪我慢慢走出陰霾嘅日子。
只要一回想，眼淚就忍唔住奪出眼框，但唔再係悲傷，而係感動。不知不覺，意識喺溫暖嘅回憶中遠去。
ns216.73.216.179da2
and then Add to home screen.