下午班我又係教教下忍唔住喊，所有唔順心嘅事喺我眼中都放大咗幾十倍，比如叫小朋友返埋位坐，點都有一兩個要叫多幾次先聽話，始終佢哋大腦結構同成年人唔一樣，唔係佢哋唔乖，只係接收指令到理解、行動嘅時間比較長。我明明好清楚，但叫咗兩次都見佢哋無理我，就覺得好錯敗，點解教咗佢哋咁耐仲係無辦法一聽到返位就照做呢？
見到我喊，其他仔女又指住未返位嗰兩個仔︰「哦！搞到鄧老師喊！」如果小學生都仲會反駁下，但幼稚園就會嚇親，到佢兩個都喊，因為覺得自己真係好錯先會搞到我喊，係咁講對唔住。
我唯有強忍住淚水，我係大人，我係老師，所以我過去抱住佢兩個，同佢哋解釋︰「鄧老師唔係因為你哋喊，無事無事。」
「老師有咩唔開心呀？」
「無事。」我好愧疚，自己失控嘅情緒不停影響到班仔女，反而要佢哋安慰我，而最可悲係抑鬱如同一個防護罩，將所有善意阻擋喺心房之外。
「老師係咪被媽咪打？」
「係咪無糖食？我畀我啲糖你！」
「老師玩唔玩玩具？我陪你玩。」
班仔女圍過嚟，個個好擔心，用佢哋嘅方法想氹我開心，而我知道自己再唔回應佢哋嘅好意，會令佢哋覺得安慰人係無用，錯敗感可能會令成班一齊喊。喺幼稚園成日可以感受到笑聲同喊聲點樣傳染哂成間課室嘅小朋友，如果全部人一齊喊我實處理唔到，唯有又擠出心中僅有嘅力氣去笑，多謝佢哋安慰我。
氹好兩個仔之後，我繼續強行支撐身體企好，教埋下午班。
每五分鐘，我都攰到想大力嘆口氣，真係好攰。
終於放學，平時仲要繼續處理班務，但我真係捱唔住。美姐想請我一齊食晚餐︰「有咩盡情講下啦，屈住屈住驚你出事呀。」我真係無哂能量再社交，淨係想即刻返屋企困住自己爆喊。
「咁……你有咩記得打畀我。」美姐都唔好意思夾硬逼我食飯，於是我第一次一放學就放低所有野離開學校。
喺街上、交通工具上我都不停深呼吸，控制自己唔好喊住，因為一缺堤就一發不可收拾，我唔想受陌生人白眼。我淨係對抗喊嘅衝動已經用盡全力，條氣管頂住頂住。
終於到屋企樓下，我見到一架七人貨van，筷子搬緊雜物上車，之後亦見阿謙同牛奶搬樂器落嚟。
筷子係第一個見到我返嚟，向我禮貌式點點頭，之後阿謙同牛奶都對我微微一笑，我提起一口氣靠近佢哋。
行近咗，就見到三個面上都有瘀傷。我未問，阿謙就先招咗琴晚凌晨嘅事，樂仔粒聲唔出走咗去之後直接過對面音樂室，向佢哋三個興師問罪。
樂仔一開門，三個都暫停錄音，室內嘅樂聲因為佢一個消失，見樂仔嬲爆爆，佢哋都好清楚發生咩事。
「佢話我哋做乜瞞住佢返嚟搞歌，佢估到你會發現佢無去酒吧表演係因為我哋幾個喺度。」
牛奶嘆氣︰「我同佢講，天網恢恢，佢唔係身有屎，個天唔會咁啱畀筷子同你丟垃圾嗰陣撞到正。」
「但佢更在意嘅係我哋點解瞞住佢搞歌。」
我彷彿喺佢哋複述嘅口中睇返琴晚發生咩事。
「我問你哋呀，做乜瞞住我返嚟呀！」樂仔嘅怒吼如雷貫耳。
三個靜默咁望住曾經嘅大佬變得陌生嘅表情，再無半點留戀，直接同佢攤牌︰「阿樂，依家你嘅存在係成隊人嘅負累，有你嘅歌就一改再改、好聽變難聽、浪費大家心機時間，我哋無咗你搗亂，成個創作流程快咗兩三倍。」
「算係飛起我喇下話？」
「我哋一直好糾結點同你講，今日嘅事我諗係整定要我哋講清楚哂所有野，從今以後，我哋三個同你，就劃清界線。」阿謙踏前一步，靜靜宣告。
「Niche係我一手一腳搞出嚟，唔好唔記得當日邊個帶你哋一齊夾band呀！」
「你的確係我哋玩音樂嘅原點，但一路以嚟你嘅所作所為都令大家睇唔過眼，大家只係隻眼開隻眼閉，唔代表你係啱架。」筷子都忍唔住出聲。
牛奶輕輕一拍樂仔膊頭︰「我覺得你點都應該同芯玥講清楚你同Anna到底咩關係，佢一直咁真心愛你，你都選擇傷佢心。一個內心唔選擇愛嘅人，無辦法再創作到好嘅音樂。」
樂仔用力撥開牛奶隻手，推開佢︰「講清楚咩？點講清楚！我同Anna嘅事關你哋咩事！？你哋根本唔了解我有幾痛苦！你哋又知唔知我同芯玥一齊幾大壓力？我搵Anna只係想放鬆下，得佢一個無論如何都仲覺得我係有才華，覺得我最吸引，唔似你哋咁話我嘅創作有問題呀！」
阿謙見樂仔郁手，都忍唔住推佢埋牆︰「拿！認啦！認咗啦！你個撚樣！咪郁手郁腳呀！」
樂仔怒火被刺激，馬上爆炸，揮拳打人，佢同阿謙完全唔留手，牛奶同筷子幫手拉開佢哋，都被誤傷。
我心臟一沉，好似壓住咗個胃咁，噁心感沖上喉頭。
「同我一齊……大壓力？」
ns216.73.216.89da2
and then Add to home screen.