美姐察覺到我唔妥，主動埋嚟問我咩事，我忍唔住喊，其實每分每秒都想喊，我連對住班仔女都頂唔順，更加覺得自己好失敗。以前一直都堅持唔可以比自己情緒影響到班小朋友，唔想嚇親佢哋，但今次真係控制唔到自己。
仲要係喊到講唔到嘢嗰隻，成個教員室都聽到，全世界都知我今日唔開心。Miss Wong見狀又兀我︰「今年貴庚呀？要喊返屋企喊啦，返緊工架。」
「人哋咁樣你仲喺度嘰嘰兀兀，有無人性架你？死八婆！」美姐鬧返轉頭。
「咁係丫嘛！噪音污染呀！食飯時間已經唔多架啦，仲嘈生哂！」
我無力駁佢。
其他老師走埋嚟，又有人喺美姐同Miss Wong中間叫佢哋一人少句，直到驚動咗校長出嚟，見到個個老師以擔心嘅目光望住我，就叫咗我入校長室。
我坐好後，校長坐喺我隔籬，平時佢係坐返自己位。
校長將枱上嘅紙巾拉近，手輕輕搭住我膊頭︰「放鬆……冷靜……」另一隻手慢慢喺我背部打圈搓揉，我自己拎紙巾抹眼淚。
「使唔使請假返去休息？」
我唔想臨時搞要其他老師代我課，搖搖頭，就算幾痛苦，至少個人要喺度。
「咁午飯完之前，你講到幾多就盡量講。你想唔想講？」
我唔知，個腦運轉唔到。
「其實……好小事……」
「如果真係小事你唔會咁嘅樣。就算你覺得小事，令你有依個反應，喺我嘅角度已經係大事。」
講到尾，只係感情問題。個世界比我慘嘅人多的是，重病又有、屋企人出事又有，同嗰啲痛苦相比我真係小問題。
於是我搖搖頭，盡量抹乾不停流出嘅眼淚︰「我發洩一陣就無事……」
校長一臉擔憂︰「真係？」
「真係……」
「我係校長，做得校內最高個位，就有責任了解員工嘅心理狀況。市儈啲講，你情緒太波動會影響教學質素……」
「我唔會……」
「我知你唔會。但我想你知道，我唔係怕你教得唔好，以前你點樣對小朋友唔通大家無眼見咩？任何人生理同心理都有機會病，要正視同休息，長遠先對學校好，亦係對你自己好。我需要你嚟返工，唔係攞你條命。」
「你放心……我真係無事……」係我未夠堅強，明明唔應該對一個出軌之後粒聲唔出走咗去嘅人傷心，但都未有能力控制好情緒，只係我太廢。
「你喊到收唔到聲咁講無事，我點信你？」
「可唔可以……借依度畀我喊……」
校長點頭，起身準備讓出校長室畀我發洩，臨走輕拍我背脊︰「依度隔音好好，盡情喊。有咩出嚟搵我哋。」
校長室得返我一個，我亦希望喺剩餘短短嘅午飯時間入面盡情發洩，爆完之後可以回復正常。
結果梗係唔得，我都唔知自己喊喊下已經打鐘，係時候振作起嚟出去接下午班嘅仔女入學校。我以為爆喊十五分鐘至少會舒服啲，可能係喊得未夠耐，但到底係喊多半個鐘就能夠消耗哂我嘅悲傷，定喊多半日呢？我希望最盡爆喊三日就足夠，但心中嘅負面情緒好似無底洞咁，令我覺得爆喊多三個月都發洩唔哂所有悲傷。
手中嘅紙巾球濕到出哂水，我用咗校長半盒紙巾，慢慢唞順條氣先走出校長室。其他老師都準備離開教員室去學校門口，美姐見到我，過嚟拍拍我︰「頂得住無？」
我點頭。至少工作上我一定要頂埋佢。
「頂得住就頂埋下午班，放學同你食飯。」
一班老師去到校門，我用力將笑容掛上紅腫嗁面上，逐個學生迎接。
「鄧老師！」幾個特別親嘅仔女衝過嚟摟住我對腳，以前我總會覺得心好甜，亦有少少自豪，唔係個個老師有咁嘅待遇，小朋友唔鐘意你就自然唔會咁做，好鍾意你都未必咁做。
不過今日我乜都感覺唔到。
理性上嘅我知道自己又出現抑鬱症狀，大腦分泌出現異常，令我感受正面情緒嘅能力大受影響。理應感覺到嘅心甜同溫暖，一概歸零。個世界唔係唔再美好，而係佢幾美好都無辦法順利進入鄧芯玥嘅主觀體驗。
明明校長、美姐、仔仔女女，甚至家長見到我個樣都走過嚟慰問下我係咪有事唔開心，世界仍然充滿善意，但我咩都感覺唔到。同時間我又如同戒咗毒一段時間最後都係受唔住誘惑重新沉淪毒海嘅道友，為自己又走回頭路感到無地自容同可恥。
之前家姐嘅死我真係歷盡艱辛先喺無底洞靠一對指甲都磨爛哂嘅手自己爬返上嚟，真係好攰好辛苦，當時我瞓喺無底洞邊緣，心中暗自讚嘆自己變得更加堅強，同時發誓依世都唔要亦唔會再跌入黑洞之中。
現家點呀？
我跌咗入個更深嘅黑洞，但只係因為更加無關痛癢嘅原因就自己跳咗落去。樂仔同我相處嘅日子夠我同家姐耐咩？佢同我嘅感情深厚得過我同家姐咩？佢係突如其來毫無理由咁意外身亡咩？佢咩都唔係，仲要擺明傷害我，今次嘅打擊同家姐件事根本無得比，咁點解理應已經變得更加堅強嘅我，仲會搞到依家咁嘅樣？
我好失敗，可能只係自以為堅強咗，其實仲係咁軟弱。
ns216.73.216.89da2
and then Add to home screen.