疫情完結依一年我地幼稚園基本上採取半放羊式管理，我地亦因為多咗空閒時間，所有行政工作都預先完成。以前八月中就要返工準備開學，今年就真係可以九月一日正式開學先返工。
我直接進入完全無空閒時間嘅工作狀態，朝早教上午班二十個小朋友、食飯時間就要處理朝早班務同預先準備下午班，通常都係得返五至十五分鐘食飯，除咗杯麵飯盒就只可以自己帶飯叮熱，唔會有時間同閒情逸致出街食。到下午班又教二十個小朋友，四點放學之後就繼續開會同做班務，每日都要處理四十人分量嘅作業、通告、進度報告……名義上嘅放工時間係六點，但啲野做唔哂唯有留喺學校繼續做，總要八九點先真正放工，仲要啲野都係未做完。
其實本來做依份工都同斷六親無乜分別，只係疫情令工作量大減輕鬆咗，幼稚園老師係吃力不討好嘅工種，無愛係好難捱落去。當然取巧一下，上堂時間播卡通片畀小朋友睇，自己偷時間做班務可以慳好多時間，我眼見都五六個老師會咁做，美姐都唔例外，所以佢一定早過我放工。不過我點都堅持上堂就係上堂，我嘅責任係教小朋友，唔係播片，所以做人有原則總係辛苦啲。
每晚返到屋企連野都唔想食，只係想把握時間訓覺，轉眼又第二日七點幾要起身，我同樂仔共處嘅時間亦漸漸錯開，最明顯就係我開學之後就無再同佢上床，有都係上床訓。
唔係我唔想同佢做愛，而係我真係太攰，樂仔都好體諒我，由得我訓，唔會精蟲上腦咁明明我訓咗都要搞醒我，又或者其實佢搞過，只係我根本搞唔醒。
每日當我終於放工返到屋企，就會見到樂仔拎住結他一邊彈，一邊改寫下首歌嘅歌詞。佢會望向我，笑住迎接我返屋企︰「我今日洗咗衫、晾咗衫、吸咗塵、拖咗地！」報告佢完成咗嘅家務。
「你日日返工咁忙，我幫輕到你幾多得幾多啦，唔通你返到嚟仲要搞家頭細務咩！」
我成世人都係依家先感受到有個可以依靠嘅另一半嗰陣你係會幾想嫁畀佢，我向來都唔太重視錢嘅問題，亦無諗買樓生小朋友，就算樂仔維持接散工表演嘅收入，我地都充夠過生活。我真心覺得咁就夠哂，兩個人簡簡單單生活落去，我願意等樂仔有一日真係實現到夢想，但佢就算一直都係依個狀態我都無所謂。
我覺得自己好好彩，可以遇到一個願意為我做家務嘅男人。雖然佢仍舊粗心大意，就算清潔咗屋企都有啲手尾要執，但我總會喺佢沖涼嗰陣幫佢處理，我唔想佢覺得我嫌棄佢清得唔乾淨。以前嘅我有問題都唔講，慢慢累積不滿直到爆發，但係對住樂仔，我願意默默幫佢解決一啲以往我會覺得唔順眼嘅問題，不滿完全無累積過。
忙碌嘅生活過咗個幾禮拜，有一日夜晚我又做到昏昏沉沉咁返到屋企，但係樂仔無笑住迎接我，亦無拎住結他，一反常態。佢望向我個樣有啲失落，但都努力擠出笑容︰「返嚟啦？睇下想食乜野。」
女人嘅直覺好準，我除鞋行去佢身邊坐好︰「發生咩事？」
樂仔搖搖頭話無野，但佢嘅苦笑令我心痛，我將手放喺佢手臂上，靜靜等佢，佢亦好快投降，嘆咗口氣︰「我覺得自己好無用……」
「你點會無用？做咩無啦啦咁講？」
佢拎咗枱上一張收入資出明細表畀我睇︰「今日搞香水音樂會嘅數全部返齊，我就由頭計一次收支……」
喺音樂會當晚我見到現場情況就估得收入一定唔好，我同樂仔係一齊搞依個活動，所有支出明細大家都知道，但我依排太忙無咗件事，而本身就好重視依個象徵夢想成真活動嘅樂仔自然一直喺度等齊數計數，今日只哥賣香水嘅分成收入都有埋，計完就發現蝕咗百分之三十幾。
換言之我作為金主投出去嘅錢連打和同小蝕都做唔到，處於介乎蝕得肉痛同大蝕之間，我儲錢自己開幼兒教育中心嘅夢想亦倒退一大步。
「對唔住……搞到你蝕咗舊錢。」樂仔好失落，唔係好敢正眼望我，有種對我唔住嘅愧疚︰「我一直都好重視香水音樂會，阿謙佢地覺得無搞頭。一路以嚟都係得我自己覺得好有竅，覺得真係有機會做一定得，一定會受歡迎，會賺到錢，我地辛苦咗咁耐咁落力去做，點知最後個結果係連搞手只求打個和都做唔到……」
樂仔捉住我對手，好用力︰「對唔住……我真係對你唔住……原來實現咗夢想都係不外如是……」委屈嘅淚水沾濕佢雙眼︰「早知係咁……我寧願香水音樂會一直都無成真過，咁至少我仲可以幻想下如果有日搞得成係有機會成功……」
望住樂仔被現實擊沉嘅樣，我個心好痛，好似自己都承受咗一次重擊咁。佢以前應該都有唔少次被現實壓逼過嘅時期，但以前嘅表演未至於係佢自認為嘅「絕世好竅」，今次係佢覺得最有機會成功嘅音樂會，原來推出世面之後都只係一單連收支平衡都做唔到嘅平冗之作。
依家已經有咗結果，就無得再幻想。
ns216.73.216.89da2
and then Add to home screen.