是咁的，玩匿名交友app撞返個ex - 【番外篇】芯玥8：何金耀

好記得識何金耀嗰年我二十歲，同家姐鬧得最僵嗰幾年，每日都好唔開心好大壓力。

或者我係由嗰時開始習慣咗每個星期抽一兩日出嚟上吓興趣班，咩蠟燭香薰皮革占卜整蛋糕樣樣都玩吓，希望借興趣班填滿啲空閒時間，盡量唔返屋企，就唔使對住家姐。

諗返起，如果嗰陣上少啲興趣班就好。

我同佢喺一個電影鑑賞班度識，由一個由八九十年代開始喺行內打滾咗幾十年嘅編劇主持，喺劇本同製作角度講好多前中後期嘅秘聞畀我哋聽。

比如《食神》嘅神仙設定本身劇本係無，周星馳係睇景見到珍寶海鮮坊天花板嘅神仙壁畫先加入依個元素。

又比如《無間道》劇本當年係入咗王晶公司先，而投資方因為劉德華嗰陣有官司在身縮沙，王晶就將成個劇本嘅版權問題處理好轉交另一位投資者。

其實嗰陣仲講咗好多故事，不過我最深印象應該係依兩個。

《無間道》喺香港地幾乎無人不知，佢背後故事自然印象比較深刻。至於《食神》我會記得，因為嗰日係我正式認識何金耀嘅日子。

雖然之前上堂已經見過佢，但嗰日先同佢講嘢。上堂前，我喺樓下電梯大堂等𨋢，有條友喺我旁邊望住個電話喺度喪笑，但又要忍住忍住嗰種，吸引咗我注意力。

嗰時我好少笑，一來讀雙學位大壓力、二來返屋企被家姐鞭策好煩、三來啱啱分手無耐嗰位前度日日千字文煩我同埋周圍唱，喺我依個唔識笑嘅女仔面前出現一個笑到就嚟控制唔住嘅男仔，我就格外好奇。

到底有咩咁好笑？

我拍吓佢膊頭，佢先注意到我。我揮一揮手：「阿⋯⋯金係咪？」

佢開始忍笑，但未講到嘢，點點頭。

「認唔認得我？」

點頭。佢向我揮揮手打招呼。

唔知大家有冇試過，當見到一個人係咁笑嗰陣，你明明唔知佢笑乜都會想笑埋一份。

聽講開心同傷心都係會感染畀其他人，當時我就被佢嘅快樂感染咗，不知不覺都笑咗出嚟。

「你⋯⋯笑乜？」

佢耍手擰頭咁過咗一陣，到有𨋢我哋一齊入去，佢先再冷靜少少，指住個電話。

「啱、啱啱睇到，你有無聽過金斧頭銀斧頭嘅故事？」

依個寓言故事應該好多人聽過，講一個樵夫拎住木斧頭上山劈柴，唔小心跌咗把斧頭落湖，正苦惱緊點算嘅時候，湖中仙子拎住一金一銀嘅斧頭走出嚟問佢：「你跌咗嘅係依把金斧頭定依把銀斧頭呀？」

誠實嘅樵夫答唔係：「兩把都唔係，我跌咗把木斧頭。」

仙子覺得樵夫好誠實：「你真係一個誠實嘅樵夫，依把金斧頭同銀斧頭我就送咗畀你啦！」

我點頭，何金耀指住手機：「話說小明去行山⋯⋯」又忍唔住笑：「嘰嘰⋯⋯呼，忍住忍住。咁小明就跌咗一千蚊落湖，湖入面嘅仙子就出嚟問佢⋯⋯」

你跌咗嘅係依張十蚊？定依張廿蚊呀？

小明話：「我跌咗一千蚊。」

仙子話：「你真係一個誠實嘅孩子，依張十蚊同廿蚊我就送咗畀你啦！」

𨋢到開門嗰陣，笑緊嘅，有兩個人。

「唔怪得仙子有錢買金銀斧頭！」

其實個笑話唔係真係咁好笑，但金耀一路一路笑，就感染到我都笑唔停，我好耐都無笑得咁放。

「哈哈哈哈！」嗰一刻我同佢就只係不停笑，咩學業壓力家姐鞭策前度麻煩統統唔關我事，當下一刻只係開心咁笑。

我行出𨋢門嗰陣掛住笑被個𨋢門槽撠親，金耀即刻扶住我。

「睇住呀。」

「唔該。」

我哋互望一眼之後又繼續笑，笑到入課室。我都係第一次同個唔係咁熟嘅人一齊咁樣笑法。入到去我哋順理成章坐埋一齊。

之後導師播《食神》同講背後嘅小插曲，唔知點解嗰堂記憶就特別深刻。

落堂之際，我留意到金耀個背囊掛咗隻粉紅色公仔。

「依隻咩嚟架？個樣咁𢦀尻嘅？」

何金耀嗰吓嘅表情好似一個獨自流落地球幾十年嘅外星人，終於見返同類咁展現笑顏。

「你竟然覺得係戇尻？」

我呆一呆，唔明佢點解咁興奮：「呃⋯⋯因為『可愛』好似唔足以形容佢個樣。」

「Exact柒ly！」

「咁依隻咩嚟先？」

「咩打芒。」

正常聽完應該會「吓？」但我竟然又笑。

「即係百變怪！」

每段感情都會為我人生引入一隻公仔，第一個男朋友令我知咩係高達，第二個男朋友令我知道哥斯拉，但佢哋只喺我人生當中出現一段時間。分咗手之後，我係識分高達同哥斯拉，但無特別鍾意。

何金耀為我人生引入咗百變怪，時至今日我仍然係咁鍾意依隻戇尻尻嘅公仔。

「哦！我知！數碼暴龍嚟！」

「係寵物小精靈⋯⋯」

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically