是咁的，玩匿名交友app撞返個ex - 【番外篇】芯玥9：算命

我一直以嚟都有個習慣，就係留意吓新識嘅人，佢哋個袋有無掛到啲公仔喺度，用嚟開話題真係一流。

通常咁做嘅女仔係多啲，咁做嘅男仔比較少，而夠膽掛隻得意公仔喺袋嘅男仔通常都有啲故事可以講。

金耀會鍾意百變怪係覺得似自己，都係尻吓尻吓咁。佢掛出嚟係因為要畀外人知道佢鍾意乜嘢。

佢細個嗰陣一直唔知自己鍾意咩公仔，所以搞生日會或者朋友送禮物通常都係咩都有啲，但佢其實全部都唔鍾意。

「所以當我真係搵到鍾意嘅公仔嗰陣，我就想個個都知道我鍾意百變怪。嗱，就算我同你唔熟，你要送小禮物畀我都知要揀百變怪嘅精品啦！」

某次我送完一疊百變怪咪帽紙畀佢之後問起，金耀就咁樣答。

當然有啲情況我就算觀察到都唔會拎嚟開深入話題，比如隻公仔爛晒都唔丟、特別污糟、舊款但特別乾淨，我都會同對方熟啲先問，九成九有段故。

只哥經過我哋旁邊，聽到我哋講緊夢想嘅話題，向我哋微笑點頭，好似幾滿意我哋嘅對話。

我留意到佢行過另一組嗰陣，兩位尷尬嘅女性喺度講緊自己食咗雙餸飯同搭咩車嚟，佢無奈一笑之後就去講咗幾句，引導佢哋去講啲深入啲嘅話題。

無幾耐我哋就整好「雛見」依枝香水，但調好之後仲要放置一至兩日等香味完全融合，所以下次上堂先拎。

寫好貼好自己個名喺香水樽之後，只哥拍拍手：「好喇，今日就差唔多喇。咁落堂之前預告吓下一堂會做咩啦，啱啱叫大家兩個人一組整香水，要同組員溝通，希望大家唔多唔少了解多啲你哋嘅組員。」

我同樂仔互望一眼。

「下堂我會教大家根據其他人嘅性格同故事去設計獨一無二嘅香水，希望大家自己製作一枝專為組員而設嘅香水，當成禮物送畀對方。」

其實整香水同煮嘢食都差唔多，學咗啲基本原理之後理論上唔會做得特別差，就好似煮嘢食學識大中細火同睇火咁，至少唔會煮到變黑炭。

「大家返到去可以諗吓對方適合咩味嘅香水，到時放心整，我會睇實你哋，枝香水點都唔會差得去邊嘅！好啦，下堂見！」

「你打算整咩味嘅香水畀我呀？」

「講咗啦，酸宿味吖嘛。」

「咁我整奶騷味你嘆。」

「外面的人心諗間香水店做乜咁臭。」

「真係搞臭人哋間鋪。」

樂仔趕住去下場同另一班朋友不時瓊，我話下次有機會去支持吓，我都約咗朋友。

「下堂見。」

落堂之後我就喺旺角行一陣街等思雯，行過近朗豪坊嘅一條冷巷，算命阿姐有開，咁啱睇緊一個幾靚女嘅女仔。

我都有段時間學過吓占卜算命塔羅牌，對風水命理算係信啲唔信啲，如果有問題嗰陣我會去問一個參考方向。

準又好唔準又好，都只係一個參考。

「今年姻緣呢，就有嘅，你會喺一個特別嘅地方識到佢。特別嘅意思係一個你平時唔會去嘅地方，咁啱嗰陣去就咁啱識到佢。」

「有無話大概係邊度？」

「總之唔係尋常途徑啦。不過一開始你未知係佢嘅。」

「咁我幾時先知？」

「到你知嘅時候就會知。你哋之間會兜一個圈，分別一段時間，最後你會搵返佢。」

「到時我會真心鍾意佢？」

「至少你個心結解開咗。緣份依家嘢，七分天注定，三分靠打併。總之就注定咗你同依個人係會重遇，之後會點就睇你哋兩個造化喇。」

個靚女諗咗諗，似懂非懂咁，講咗句唔該師傅就起身走。

正當我都想坐埋去問吓我嚟緊嘅姻緣嗰陣，思雯同我講到咗旺角，我就去餐廳搵佢。

「依度！」一入去就見到思雯揮手，佢總係咁大動作，份人大情大性，性格同講嘢係似足袁詠儀，個樣就似倪安慈。雖然叫思雯但一啲都唔斯文，係可以去大排檔棟高隻腳扒干炒牛河嘅女仔嚟。

坐低叫完嘢食，思雯就單刀直入：「真係分手悔婚呀？」

「係呀，我諗得好清楚。今日唔分，遲早都要分。」

「咁你有無話返畀佢知其實佢有咩問題？」

「無啦，一路積積埋埋咁多問題都唔知由邊度講起。」

「妖！一開始叫你同佢坦白講你又話講咗佢都唔會改，到依家又話積積埋埋太多！就係你無解決過，啲問題先會愈積愈多架嘛！即係你由頭到尾都無講過佢聽有咩問題啦？」

思雯總係擔任直接開我波嘅角色，佢份人就係咁直腸直肚，一覺得我做得唔啱就毫無保留咁大屌特屌。

有趣嘅係佢對我點處理感情咁睇唔過眼，都仍然同我做好姐妹。我又係，每見三次就要被佢屌一鑊，都仍然繼續見佢。

ns216.73.216.141da2