《屍河明居鑽石山》（是咁的，我發現打喪屍有得升呢） - 424

024

604Please respect copyright.ＰＥＮＡＮＡb3XSX44JCv

同之前喺學校電影學院貪得意睇啲『Cult片』一樣……一個活生生嘅正常少女，俾另一個人用最無法想像嘅殘忍方式，徒手殺死！

喺我杏仁核極端放大嘅敏銳感官下，我睇住嗰對仲癡住一抽神經線嘅眼球，好似過年玩啲火箭炮煙花咁射咗出去，然後『啪啪』兩聲爆咗癡喺兩、三層樓高嘅禮堂天花板上，好似打死咗兩隻飛曱甴咁。

啲視神經線仲好似麵條咁跌返落我哋面前。

個女仔並未當場斷氣。

佢隻手仲一直指住嗰個死人本來瞓喺度嘅位置，仲喺度為嗰條死咗嘅屍體突然郁返，而極度震驚緊。

甚至嗰個人唔係屍變，而佢抬起頭之後，係同個女學生用唇形講咗句嘢，先至嚇到佢叫由尖叫變癲叫。

『叫你唔好出聲啊，想死啊？』

我嘅『記憶重溫回溯細節』能力，令我知道返呢個錯過咗嘅細節。

個女學生隻手已經嚴重痙孿緊，但仲未遞返落嚟。

甚至即使俾成半隻手臂塞咗入個口度，佢都竟然喺度叫緊……不過啲叫聲已經極度扭曲，夾帶瘋狂、劇痛、唔係人嗌得出嚟嘅尖銳怪聲……

喺七孔流血之下，佢扯盡蝦咁大力透氣，都要發出嘅呢種叫聲！

「AaaaaarrrrRRRR……嗄……AaaaaaRRRRRRRrr……救……好痛Arrrrrrr……」

聽到我成身酸軟難受。

甚至有種當場崩潰嘅衝動！

而阿詠已經跪咗落嚟，兩手掩住對耳……佢唔要聽到呢種叫聲。

「佢哋講得啱……施永義，你已經走咗去《吞噬》路線，唔怪得你變到比喪屍更可怕，完全冇哂人性……」

我驟然一陣心寒。

「阿詠……你講咩話？」

吞噬路線？

摘喪屍啲夜之眼嚟吸收呢升，唔係正常㗎咩？

本來個升級系統唔係咁玩嘅？

但係阿詠未得閒應我，佢仲爆哂喊咁同個施永義講緊嘢。

「但係你殺呢個女仔嚟做咩？佢都冇受感染，仲係活人嚟㗎！你到底癡線到咩地步啊？點解你只係喺聖母出去走咗一轉，就變成咁？」

「活人又點？」

施永義一陣猛咳，將頭先塞住嘴鼻嘅一啲凝血同埋組織之類咳哂出嚟，然後先開始大力扯蝦，透得返氣。

佢頭先並冇死絕。

而家應該開緊唔知《暴走者》定SAM，只係唔知第幾級，至少同我嘅唔同。

佢個頭超腫，好似癌症末期病人咁，後腦拱起咗一拃有半個頭大嘅腫瘤，應該係應急修補爆裂頭骨時出現嘅發炎保護……

佢將兩隻由少女眼眶伸出嘅手指，縮返入去，然後成隻手臂向上一隊！

ARRRRRRRRRRRR……！

喺個少女渾身劇烈痙攣同歪曲嘶叫之間，施永義抽返隻手出嚟。

嗡！

一下吸收之後，佢隻手拎住執嘢消失咗。

由始至終，我冇產生出想要阻止施永義嘅衝動……因為我心裏面最強烈嘅想法，只係想個女仔快啲斷氣，唔使再受苦。

而家個女仔被掉咗喺地下，仲喺度輕微痙攣緊，甚至個爛哂嘅嘴，仲發出緊好似人哋用指甲刮黑板咁嘅極尖銳嘶聲……

我而家睇到嘅嘢，根本超過咗我SAM狀態下嘅『情緒壓抑常數』……恐懼同嘔心感淹沒咗我！

「嘔！」

我嘔咗出嚟！

阿詠亦都係一樣，佢仲要邊喊邊嘔……

而施永義好似狗咁爬喺地上，佢胸腔強烈起伏，好似禁不住內心嘅興奮。

「……我都係第一次摘活人，原來咁爽！」條陰柔佬用癡滿血漿嘅手嚟撥頭髮，「賺嘅點素比喪屍多好幾倍，好勁！屌那星，咁以後仲殺喪屍嚟做咩？一律狩獵活人啦！之前儲埋啲女學生，而家應該屍變哂，嘥咗！」

我哋仲親眼睇住條友，變態程度升咗級。

原來佢只係憑住某種本能，第一次摘取活人嘅夜之眼（佢叫返松果體）。

「正啊！」

佢好似冇哂事咁企返起身！

佢成身啲骨喺度啪啪響，之前俾我打爆嘅手掌啊，手踭咁，似乎喺度快速駁正修復返……

「惡、惡魔……」

阿詠跪咗喺地上，六神無主。

「點解……呢個叫做《孤城英雄》嘅系統，會將英雄最終培養成惡魔……到底副Con有咩問題……」

阿詠望住我，滿臉無助。

「唔、唔通我哋都會……」

「唔使擔心，你哋唔會變成我咁。」施永義望住我哋陰陰笑，「因為你哋唔使再玩啦！你哋係配角，係好重要嘅配角，因為你哋要成為我英雄奇蹟劇本裏面嘅重要獻祭！」

佢仲逐隻手指喺度奶啲腦漿，好似意猶未盡……

「揼到而家都未天黑，係都爭少少……唔緊要，我剝哂你哋四肢落嚟，然後聽住你哋啲慘叫聲嚟睇日落！到咗入黑，就係我呢幕奇蹟完美收官嘅時……」

砰！

我見到施永義成個人扭曲哂，好似條扭扭綿花糖咁。

佢轉返身望住我。

佢一邊面頰得返個窿，成塊右邊面皮冇咗，入面棚牙至少七、八隻飛咗出嚟，血流如柱。

我望住自己高高踢起嗰隻斷哂韌帶嘅腳。

隻鞋嘅鋼踭上，正正掛住佢塊面皮。

「我唔知呢個世界有冇英雄。」我同阿詠講，「但係我而家，好想殺死隻惡魔。」

604Please respect copyright.ＰＥＮＡＮＡFfNxNccwHs

第四幕完

ns216.73.216.131da2

Reading Theme:

Font Size:

Line Spacing:

Paragraph Spacing:

Load the next issue automatically