《屍河明居鑽石山》（是咁的，我發現打喪屍有得升呢） - 416

016

595Please respect copyright.ＰＥＮＡＮＡ5Dg1cJkYQZ

……砰！

我只係聽到成個棚架撻咗落地嘅巨響！甚至因此而揚起咗一陣向上嘅勁風！

而我喺邊？

我喺個棚加速撻地時，已經抱唔穩條大竹杆，但係我冇飛出街，而係俾覆住棚架嘅綠色隔塵網兜住！

而雖然個棚差少少先夠長，但係我之前抱住支主杆，啱啱扳到條街燈柱，所以個棚冇橫瞓喺地，而係斜斜哋俾枝燈柱托住！

咁喺個棚反震起上風時，個綠網就對我產生咗彈床效應。

其實嗰時《暴走者》唔係完咗都已經尾水（掹冧個棚好嘥時間），但係我喺嗰刻好似變咗隻爬蟲類生物咁，借住個反彈沿住個綠網向上爬。

我好似青蛙咁踎咗喺條燈柱頂上，再一步𨈇上隔離條竹杆頂，借力破窗跳入最近個單位度！

但係支竹杆頂好尖，我一踩根本食唔足力！

再加上我大髀斷韌帶個位，喺我發力時出現一陣酸軟……

結果我係斜身扳爆個玻璃窗，撻落人哋個梳化上面，再反彈跌落地，直碌到電視櫃前先識停。

條腰骨痛到摃橋！

但係總算成功咗！

而喺我爬返起身時，有件好頂癮嘅事發生：有枝棒球棍喺窗外慢飛入嚟，輕輕打到我額頭個痛位。

「哎吔！」

我記得我跳棚時已經將支棍掉咗。

「梗係嗰時纏住咗喺個隔塵網度。」

然後我借勢反彈攀上燈柱時，記得係隨手拎住枝嘢，啷喺燈柱頂幫我借力爬上去，但我嗰時係喺『爬蟲』狀態，個腦冇諗到嘢。

而我跳窗入屋時其實已再拋棄咗支棍。

結果唔知點樣，支棍彈飛到樓上條石屎𡒊，又撞返入屋……睇嚟我同支嘢有緣。

我用支棍撐返起身。

「呢、呢度係幾樓？」我仲有啲頭暈眼花。

以我估計，應該係三、四樓倒。而我仲要上返去頭先發現阿詠嘅六樓……假設佢哋仲喺度嘅話。

但係我已經出現緊過度透支嘅反噬效應……頭先我都唔知係第二重定第三重透支《暴走者》。

（強烈建議緊急休整。）

我否決。

「話我知，我要食幾多隻《夜之眼》，先可以暫時噤住個反噬。」

（不斷吸收。）個系統話，（但必需要向你警告，被壓抑的反噬以及重覆透支暴走者，會造成不能逆轉的負面效果。這將會影響到你《英雄路線》的選擇自由。）

「你講過好多次啦！」

你叫我喺呢個時候坐低抖抖？

我而家最唔能夠承受嘅反噬，就係『失去時間』！

支鐵筆已經冇咗，但我對玩入屋戰已有經驗！我衝入呢間屋嘅廚房，扑爆咗條撲過嚟嘅印傭，摘眼續命之餘，重點係攞殺蟲水！

噴撚住殺出去！

喺走廊嘅喪屍唔算多，令我聯想到可能已經被『引流』，雖然我唔知對方係點做到。

我噴一隻扑一隻！

一路所見，果然呢層樓啲單位，都俾人破哂鐵閘同大門。鐵閘都係『閘榫』被成條抽起咁解鎖，門就成個鎖位被從外踢爆，但對度門似乎破壞唔大，只係個鎖頭啲螺絲爆曬，然後一踢門就散咗落地咁。

除咗超過正常人嘅暴力，仲有好準繩嘅破壞技巧……

除咗同我一樣戴咗Con，應該冇咩正常人可以做到。

而呢個人做到嘅水平，係我而家呢個Level完全無法企及嘅。

「到底破門放屍嘅人，係阿詠，定係佢嗌出嚟嗰個『醫生』？」

我已經唔得閒去猜想佢哋做呢啲事嘅目的！

我喺呢邊遇到嘅喪屍，冇我一開頭衝上去嗰幢唐樓咁多，再加上我發覺自己有少少唔同咗……

我啲動作敏銳到難以置信！

但係呢種敏銳，只有喺面對危險時以『短爆發』形式發生，比如有兩條喪屍包抄過嚟，我可以突然踎低一爬，竄咗去佢哋後面，仲順便用棍剔跌其中一條！

如果正常狀況，我冇辦法主動做得出呢啲動作。

呢啲就係上咗『三呢』嘅杏仁核常駐技能：《原始本能腦》？我簡直覺得好似溝咗啲爬蟲基因咁，亦完全唔會有『扮狗爬』『扮蟲躝』呢啲自尊，關節亦冇頂唔順，總之就係好自然，危險一埋身就避……

有咗呢樣新嘢，令我喺呢啲唐樓巷戰中，行動得更有效率！

雖然因此令我點素清零，仲要靠猛食夜之眼續命，但係再喺呢啲九成都係廢老嘅地方混戰，唔開《暴走者》亦綽綽有餘。

而亦可能同已經被『引流』有關，越係往上嘅樓層，越少喪屍。

我殺咗上六樓！

ns216.73.216.159da2

Reading Theme:

Font Size:

Line Spacing:

Paragraph Spacing:

Load the next issue automatically