《屍河明居鑽石山》（是咁的，我發現打喪屍有得升呢） - 415

015

625Please respect copyright.ＰＥＮＡＮＡPKyNikyi0b

我冇諗過會喺聖母出面，就見到阿詠！

我一直以為聖母係處於被圍城嘅狀態，阿詠一定係為咗住院啲老人家而死守緊……但點解？

『佢……喺度救人嗎？』

首先，佢係點樣可以『隨行隨破』咁爆開哂啲門？

佢帶咗手槍？

「唔會，如果佢開槍，槍聲一定仲響！嗰啲一定係用暴力破門斷鎖嘅聲嚟……」

然後我諗，唔通係因為佢戴咗同我一樣嘅Con……

我即時代入返自己：我有能力好似佢咁樣連環破門嗎？仲未包迎面碰上任何喪屍撲出嘅風險……

應該冇可能，除非長開《暴走者》……

『但點解系統話緊俾我聽，阿詠同我產生緊『任務衝突』？』

如果係救人，點會咁爽快入單位破完門就出返嚟？咁啱一個活人都遇唔到嗎？

定係根本唔理有冇活人，只係想放屍？

我突然諗返，自己跑上嚟呢幢唐樓嘅狀況……真係因為啲廢老咁啱開哂鐵閘抖涼，先至出哂嚟嗎？

定係有人刻意放哂佢哋……

我突然個心一寒。

要救莎倫，我其實剩係諗到要去聖母搵阿詠，我覺得我會喺佢口中知道副Con嘅秘密，同埋點樣可以攞多幾副！

但如果阿詠呢個人本身出咗問題……

我唯一嘅寄望，就會破滅！

而亦因為我內心出現咗呢一剎猶豫，我窒咗一窒，先至識得向佢大嗌！

「阿……詠！」

但當我一嗌出口時，阿詠啱啱轉身行出窗口範圍。

就喺呢個時候，同一層嘅其他單位，又開始砰砰砰咁俾人破門！

「屌你！到底對面發生緊咩事啊！」

我只係感應到嗰啲單位入面有事發生緊，而去到有一家，砰門聲就停咗落嚟……呢家咁啱係樓層嘅邊角位，窗口都俾突出嘅外牆遮咗一半，我根本望唔到入面。

然後我見到阿詠件白件護士服，喺窗邊閃過。

再過幾秒。

我望住一個細路仔，俾人扔到破窗而出，然後直跌咗落樓！

個細路，係活人嚟……

我眼白白睇住佢跌到爆哂腦，然後一樓啲喪屍撲哂出窗，圍住佢嚟食……

我面都白哂，喉嚨好乾……

「點、點解？係阿詠做嘅？」

就喺呢個時候，

我聽到由嗰個單位，傳嚟一把撕心裂肺嘅悲叫聲！

『你都係醫生嚟！點解你要咁做！點解啊！！！』

我要整理一下自己嘅猜想……

除咗阿詠之外，嗰邊應該仲有另一個人……而佢係醫生嚟。

而聽阿詠咁講，似乎個細路……係個醫生扔出去嘅？如果個醫生做得出咁嘅事，講唔定啲門都係佢開。

咁阿詠同個醫生對峙，就好危險！

呢個時候，灰色狀態消失咗，視野變返正常。

「我要過對面！而且係即刻！」

我唔知自己有咩本事去插手，我剩係知道我要見到阿詠！

我退後咗十幾步，一直退，退到天台另一邊盡頭，直覺都係話俾我知，勉強跳過去只有一個結果，就係墮樓。

但係沿路落樓已經唔可能，而且太慢。

再講，已經開始有喪屍上到嚟天台……

（路線選擇錯誤，路線選擇錯誤……）

「啊啊啊啊啊……！」

我冇理，就直線向住我要跳嘅方向，全力助跑！我𨈇上邊邊條石𡒊……但係我冇蓄力起跳，而是直角轉彎，借住個就嚟就嚟拋出去嘅離心力，喺條只有一個鞋印闊度，凸咗出街嘅石屎邊上，超速狂奔！

上咗天台啲喪屍，已經不斷向我撲過嚟！

我只能靠速度甩開！我咁樣橫向狂奔，仲一度令個系統以為我都係走返沙田坳道嗰邊！

但唔係！

頭先『灰色狀態』時，我望到一樣嘢，係呢樣嘢令我本能地想搏一搏！

我跑過隔離幢樓，見住迎面有條喪屍要撲我，我一低腰避過，睇住條屍就咁撲空墮樓時，我亦全力魚躍式咁向前撲出！

我抱住碌好大枝，好粗嘅竹杆！

冇錯，係個竹棚嚟，呢幢樓正好圍哂棚架做緊大維修！我抱住嘅，正係用竹篾加索帶綁住大廈外牆嘅『受力杆』！

我用手上嘅鐵筆鋤咗幾吓，插斷嗰幾條黑色粗索帶同竹篾，用雙腳踏住外牆，然後開埋《暴走者》，好似做Gym做深蹲咁，全力向外踭出去！

我要將個棚架扳過對面街！

（不建議你採用此升級路徑，強烈建議你保留點素晉升《夜之眼》。）呢個時候先嚟向我警告？太遲啦！

我聽到個竹棚各處，不斷傳嚟其他竹杆同埋索帶嘅斷裂聲，有外牆批盪階磚成大塊成大塊剝落嘅聲音……

雖然好勉強，但係喺《暴走者》狀態下唔要命咁將自己猛Fing出去，我感到成片竹棚開始頂唔順向外塌，而且扳落速度加快到好得人驚！

個棚好似唔夠長，唔夠扳到對面街！

但係《暴走者》嘅直覺反應係好準，從未誤判，佢夠膽俾我咁做，就一定唔係純送死！

（保命制度激發強制升級。）

（升級《杏仁核》到第三級。《原始腦本能》深度覺醒。）

（點素出現透支。）

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically