《屍河明居鑽石山》（是咁的，我發現打喪屍有得升呢） - 402

002

667Please respect copyright.ＰＥＮＡＮＡt5XV9jsAMG

「我好好彩，應該冇俾啲嘢咬到。」我答佢。

條廢老好懷疑。

因為睇落我成身都係傷，雖然大部份都係啲割傷瘀傷……

我已經玩到點素變負，除咗膊頭個骹位好似喺《暴走者》時無意識咁啪返埋，我身上其他外傷，包括斷咗嗰隻腳趾，已經冇得恢復。

「你……喺樓上跌落嚟嘅？」條廢老問。

即係話，佢冇親眼見住我喺龍蟠苑殺過嚟。

佢打咗個CX，眼皮惰惰地，面頰紅潤，而且窗邊就擺咗支燒酒，仲飲剩半支……

佢可能係半醉半醒，啱啱清醒返少少時先發現到我。

咁我唔怪佢。

咁難得生存到今日，突然發現背後騎樓有個人喺度，仲要成身傷兼冇知覺，正常處理，梗係撩佢落街！唔通等到我屍變咩？

「阿伯，而家幾點？」

「四點幾……」個阿伯似乎好悶，對我好似有少少好奇，「點解仲有需要睇鐘？你趕住去邊？」

「我要去聖母醫院。」

佢「哈！」咁笑咗聲：「你唔好呃鳩阿伯啦！你唔係以為去到醫院就有得救啩？咁你唔好去報警？警署就喺隔離街！」

佢明顯戒備深咗，支竹竿繼續篤住我之餘，仲加大咗向我施力。

佢係認為，我隨便鳩嗡，其實係想搶佢啲嘢？

我見佢冇著老人院服，而係普通阿伯衫；而且以阿伯嚟講，佢算好力，講嘢仲好有中氣。

我估佢唔係院友，只係出咗事時走入嚟避難？

佢所在嘅床位，除咗窗口外三邊都拉哂布簾。而我就咁望，都見到佢啲櫃頂啊床頭啊，堆滿哂佢收集返嚟啲糧食、酒水之類……

「阿伯，你講嘢咁大聲，唔怕引到啲喪屍過嚟？」我問佢。

如果可以嘅話，我都想入去老人院抖抖。

我而家係餓到攰到腳都震哂。

至少想食啲嘢補充返，同埋睇吓有冇得換鞋。

先同佢探聽吓情況……

「我驚咩啊！」個阿伯大大聲咁話，「我試過哂啦！我拉哂布簾對住窗外講嘢，大廈裏面啲喪屍會以為啲聲喺出面！而街度啲喪屍就算對住我發哂癲，都爬唔到上嚟搞我，因為有呢道簷篷隔住嘛！」

講完，佢執起另一支飲完嘅燒酒樽，就咁掉出街。啲喪屍即時撲咗一陣，見唔係肉先慢慢散開。

「我悶悶哋將佢哋當餵錦鯉咁玩添啊！」

有時我都幾服呢啲港式廢老，癲起上嚟可以咩都唔驚。

「車！我後生時咩大風大浪未見過啊？打日本仔，文革，咪同呢劑嘢差唔多！」

我心諗，阿伯你呢個年紀，應該冇打過日本仔……

呃鳩我。

「係怕你呢啲喺樓上跌落嚟㗎啫！」個阿伯話鋒一轉，「文雅啲講句，防不勝防啊！」

「阿伯，我想入嚟老人院抖抖。」我話，「我應承你，我哋河水不犯井水。」

「你入嚟冇用！呢層樓冇嘢食，冇得匿㗎啦！我都係食埋最後呢餐然後等死，我冇嘢俾你搶！入嚟做咩？」

仲邊講邊拎起張冷氣被，冚住成床嘢食。

佢碌竹仲一直頂住我條腰。

「咁既然咩都冇，點解唔俾我入嚟？」

「你理得我啊？走你就走啦！外面天空海闊任鳥飛，你鍾意去邊都得，但係唔好入返嚟喇，呢度留返俾阿伯等死……」

但係我身後冇路，簷蓬下面已經聚集咗十幾條屍，伸哂手……

「咁我唔入嚟，我剩係借條騎樓行到街尾，得唔得？」

「梗係唔撚得！」個阿伯粗都爆埋，「我點知你會唔會行到我面前時，一吓箍我頸，然後掉我出街，咁你咪霸哂我辛辛苦苦納翻嚟啲嘢！」

「俾條路嚟行都唔得？」

「一、一係你就咁坐喺度，坐足一晚先！我見你冇屍變，再考慮俾唔俾你路過。」阿伯話：「你唔好睇小我，我真係可以成晚唔瞓隊住你！」

「喺度坐一晚？」

絕無可能，莎倫等唔到咁耐。

「癡線！」

「你唔好埋嚟啊！我捅撚死你！」

佢真係一嘢捅埋嚟。

但其實佢拎住枝嘢咁耐，對手早就震哂，根本就冇咩力……

我拍開佢枝竹竿。個阿伯就咁鬆一鬆手，成枝嘢就跌咗落街。

「你、你整跌咗我枝竹？」個阿伯望住我，又驚又嬲，「我屌你老母啊？你唔好埋嚟啊！我扔撚死你！」

向我扔燒酒樽！

佢似乎好驚，手邊有咩就扔咩，閙鐘，鏡，垃圾，見嘢就扔出嚟……但其實我根本一步都冇行近過。

「喂！好啦喎！」俾閙鐘扔到都幾痛！

「屌~你老母扔撚死你！屌~你阿爺扔撚死你！」有哂節奏好似唱緊大戲咁，「屌~你阿嫲扔撚死你……」

「你敢鬧我阿嫲？」

我認真嬲咗！

「我係要屌你阿嫲！我係要屌你阿嫲……」佢仲癲到伸手出布簾外，拎起個有屎尿裝住嘅痰罐嚟扔！

點知佢拎住個痰罐，成半個身伸出窗外，都未拋得出……

我見住一隻著外判清潔衫嘅阿姐喪屍，發哂狂咁撕開咗個布簾，撲落個阿伯度，然後一人一屍就咁攬住飛咗出窗，喺我面前碌咗個關斗，再由簷蓬跌咗落街。

街上十幾廿條喪屍，霎時癲哂撲搶！

ns216.73.216.159da2

Reading Theme:

Font Size:

Line Spacing:

Paragraph Spacing:

Load the next issue automatically