《屍河明居鑽石山》（是咁的，我發現打喪屍有得升呢） - 211

011

735Please respect copyright.ＰＥＮＡＮＡoimIlMpWK6

好彩佢哋冇鎖鐵閘。我拉開到勉強攝得個人入去，然後就輕輕拉返埋度閘。

個鐵閘幾順，雜音唔大。

一剎那我有猶疑，如果屋入面有喪屍撲出嚟咁點？

但係即時危險係喺走廊，轉角嗰隻隨時會聞到我……如果佢因此守住喺門口，我就返唔到屋企。

我做咗個決定。

我關埋大門，將自己反鎖咗喺呢間屋入面。

就咁睇，廳無動靜。

我已經就嚟爆，所以都冇特別謹慎，直接衝入廁所。

門係開住，入面冇嘢……

衝入去，關門，疴！

疴咗足足十分鐘！基本上我頭先食過落肚嘅嘢，全部疴返出嚟。喺斷食兩日之後即刻隊一Lit雪糕，然後一啖杯麵一啖可樂咁隊咗兩個，真係唔講得笑！

成個人疴到虛脫！

痞喺度就有時間反省，我亦明白即使喺呢個狀況，對飲食同營養其實更需要注意，因為亂食嘢嘅話，你個肚根本頂唔順，仲死得快！

疴完，我萬分慶幸，仲有水可以沖廁。

其實我掙扎過，留低一個充滿臭味嘅廁所，定係沖廁所啲水聲，會對我危險啲？

（人類的新鮮排泄物，對喪屍有強烈吸引力，幾可比擬鮮血。）

你應該早啲講。

但可能我一心就諗住搵廁所解決，呢個係正確決定，個系統就唔需要出字幕提醒吧？

水聲完全靜止後，再等咗一陣。

外面似乎冇動靜。

但係呢種警覺性已經唔太肯定，我覺得頭先谷行個『杏仁核』時嗰種敏銳度，已經降低返，剩餘嘅係過度用腦後嘅副作用：偏頭痛。

我推開廁所門，小心翼翼咁行出去。

其實由睇嚟間屋企大致上冇咩點亂，我就幾肯定裏面冇喪屍，應該係話，冇人喺呢個屋企裏面，逐漸變成喪屍過。

呢家鄰居我算認識，有時喺走廊撞到會點頭打個招呼，過年時男女主人仲派過利是俾我！

好似仲有個讀高中嘅女，印象中幾靚女咁。

同埋個阿婆。

我估計喺出事時，佢哋可能只得個女仔同阿婆看屋，然後可能想出去求救，就咁拉埋鐵閘就走咗出去……跟住就冇再返過嚟。

「照原定計劃，搵嘢食。」

我正要轉入廚房……

「咦？」

我發現梳化下面，有個打瀉咗嘅餅乾罐。入面啲餅已經冇哂，餅屑散滿一地。

有啲奇怪。

我視野突然又閃出一幕全紅，就同最開始時沈莎倫想陰我時一樣。

但唔知點解，我並未出現察覺到喪屍嗰時嘅緊張感同危險感。

反而仲好平和。

好似身體有另一個部份，同警告緊我嗰個部份，發生緊對抗。

個餅乾罐冇咩好睇，望落個廳亦無其他食物，咁我就入去廚房……

「咦？廚房啲嘢俾人摷過？」

我最想搵到嘅嘢……罐頭，散落咗喺枱面或跌咗落洗碗盤度……竟然有十幾個咁多！

我仲見到有啲癡住價錢牌，黃色招紙冚住白色招紙，揭開一睇，嘩，半價。

唔怪得入咁多貨。

但呢個價錢應該係出事之前吧？可能好早就買落。

「有幾個罐頭崩咗……唔係跌爛嘅？好似啲罐頭試圖俾人開過，但開唔到……」

突然諗起，末世必備工具，罐頭刀！

因為我哋幾個都係完全唔煮食，至少我自己喺屋企係未開過罐頭，因此我唔知道自己屋企有冇罐頭刀。

我逐個廚櫃咁摷……呢度都冇？

有罐頭，無罐頭刀？

但唔理咁多，喺褲袋拎返個環保袋出嚟，收走哂啲罐頭先！

「有師奶嘅屋企係唔同！仲有福建米粉，通心粉之類……米缸仲係半滿。」

只要仲煲到熱水，一個保溫瓶，已經可以焗到啲粉同粥嚟食！

仲有啲咖喱磚之類……可惜唔係即食。呢個屋企冇咩即食嘢，連杯麵都冇個，食物全部要煮……

好傳統啊呢個師奶。

重點係雪櫃！

啱啱先疴完，我係想食啲蔬菜，最好係焗個野菜粥或野菜米粉……暫時唔敢再食雪糕。

我正想打開個雪櫃……

我喺雪櫃個門柄度，睇到身後嘅反射……我見到有個人企咗喺度。

佢雙手拎住支罐頭刀，震哂咁對住我背脊。

係沈莎倫。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically