《屍河明居鑽石山》（是咁的，我發現打喪屍有得升呢） - 603

603

「嗄！嗄！」

我喘住大氣，喺老大院時個『費老』除俾我對靚鞋，有一隻俾喪屍掹甩左；小腿亦留低幾道爪痕，但大致無事。

Jason應該亦冇大礙。

但喺呢個時候，我同Jason見到頭上又有個人頭飛射而過！

砰！

打咗落仲吊喺飛索嗰條細路屍體上！

啪！

佢個肚爆開，啲內臟跌哂落啲喪屍頭上。

驟然一陣絕望，瀰漫成條防線……

好似無論做啲咩，都會俾施永義好輕鬆咁破壞哂！做咩都冇用咁！

而且佢個位置高高在上！

就算搵人捉佢，喺上到天台時，佢仲有時間做好多嘢……再講，搵邊個走上去同佢打？

連同最初個阿良，三個Team Leader已經死咗喺佢手上！

「啊！我仲有嘢要補充！」

施永義好似怕我哋未夠絕望咁，「你哋當中有人頭腦會清晰啲，可能會問得出：我破壞聖母醫院呢個奇蹟，呢件事本身點算係一個奇蹟呢？就好似北韓射粒導彈去首爾，破壞咗人哋個經濟奇蹟，咁支導彈可以叫超越咗首爾嘅奇蹟咩？」

「其實個邏輯係咁嘅，教精你哋啦。」

施永義指住自己個腦，「關鍵唔係要整冧間醫院定點，又或者你哋當中大部份庸材死唔死得哂，同個奇蹟其實都冇咩大關係。」

「我搞你哋嘅主要目的，係要食哂你哋當中幾條最Top精英個腦！我啱啱試過啦，原來生食咗『實驗體』嘅人腦，係會連啲佢哋技能都吸收埋㗎！」

「即係話，你哋由戴Con所激發出嚟嘅人類奇蹟，當中嘅精華部份就會由我嚟繼承！」

「我自己就係成個聖母大台嘅奇蹟綜合體！」

「由我呢個奇蹟之子，帶嚟終極嘅毀滅，就好似食完耶穌嘅五餅二魚之後，啲人反而變哂做餓鬼，衝哂出去食人咁！」

「呢啲叫『褻瀆』！」

「最高層次嘅褻瀆，就係褻瀆奇蹟！哇哈哈哈哈……」

「收聲啊！！！」

砰！

施永義左半邊肺被打爆！好幾條肋骨飛斷，血水迸射！

佢呆咗咁啤實我。

好似唔相信，我做得到同佢同樣嘅事。

Jason亦好震驚咁望住我。

係，我頭先執起咗半舊磚頭，憑住一陣怒火就扔咗過去！其實我已經睇過佢呢招好幾次，我腦裏面已經隱約有啲概念。

當中嘅力度，係源自《暴走者》。

但准繩呢？原來係《無痕者》能力帶嚟嘅手眼協調……再加上我有原始腦本能，身體協調性高，總算可以隔咁遠扔得中施永義。

但我覺得同施永義仲有距離，或者佢係用同我唔一樣嘅技能組合，先扔得咁輕鬆咁準，或者同佢《暴走者》級別較高有關。

但總之，我有同施永義隔空較勁嘅能力！

而且佢已經受咗重傷！佢跪咗係天台邊唔知摷緊咩，但似乎冇打算搵掩護！

我從街壘跳返入嚟搵磚頭！

隨手喺花圃邊掹起一塊，雙眼用力瞄準施永義個頭，三步助跑，全身拉哂弓咁將舊磚扔出去！

但係舊磚飛到一半就散開兩邊！

其中一半又打爆咗塊玻璃窗，另一半俾施永義伏身避開咗！

我要回一回氣，因為我頭先連續爆咗兩次《暴走者》，而且我冇咗隻鞋，頭先踏腳用力時扭傷咗幾隻腳趾，腳趾頭都磨甩咗皮，好痛！

佢爬返起身。

「好彩仲有一隻未食！」

我睇住佢將一舊血淋淋嘅嘢，就咁塞咗入口……𡁻吓𡁻吓，都唔使吞，就已經吸收咗。

我咬住牙忍住度氣，又執起一塊磚頭，今次扑開半舊先扔！

「我唔會同你喺度玩！」

佢噤住左肺傷口，轉身走返入去！

但喺佢轉身嘅同時，竟然好似人哋打籃球後手上籃咁，將一樣嘢高高咁扔咗上天！

係咩嚟？

我甚至冇再追縱已經身影消失嘅施永義，就睇住嗰舊嘢喺夜空劃過一條好高嘅拋物線……

喺血月灑照下，舊嘢反射出刺眼嘅光芒。

「……打火機？」

我突然記起嗰啲殺蟲水啊之類嘅噴劑，全部都係易燃嘅！

「避開嗰邊草叢啊！」我大嗌！

啪！個打火機最終撞落醫院南翼一幅外牆，靠近地下左右高度……成個火機爆開。

熊！

我睇住由一絲火星，喺石屎牆身好超現實咁快速漫延……因為嗰面牆係對住街，可能成奉都噴滿哂殺蟲水！

施永義當然知道呢一點，所以根本唔使扔得好准，將打火機隨便扔去奉牆度爆開，入面舊打火石一擦就著！

當然牆壁冇易燃物，唔燒得耐，慘嘅係火勢快速漫延入室內！

「有人喺嗰幾個單位預先淋哂電油！如果唔係，冇理由燒得咁犀利！」

「死啦！」

Jason突然記起，「我記得嗰邊地牢，好似係發電機房嚟……」

「施永義要炸咗我哋啲發電機！」

我哋連反應都嚟唔切，幢樓嘅地底突然發生大爆炸！

轟隆！

成幢南翼啲窗震爆咗大半，室內大量石屎剝落，我懷疑幢樓成邊都會隨時冧落嚟……

「施永義……又俾佢玩咗一鑊！」

我諗最初醫院突然停電，就係因為施永義搞咗個發電機！只係佢同時淋血落街邊個電箱度，等我哋以為只係俾喪屍搞到短路……

喺誤導咗我哋嗰時，佢就將發電機啲柴油放出嚟，淋滿樓上幾層樓……咁等佢後來只要隨便扔個打火機落嚟，就可以造成發電機爆炸嘅效果！

完全係佢嗰種嘩眾取寵嘅風格。

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically