《屍河明居鑽石山》（是咁的，我發現打喪屍有得升呢） - 602

602

好彩……石屎責唔到人。

陳朝輝應該已被搬上病床抬返入醫院。

但係個槍手已經被擊中到……背脊喺個簷篷穿咗個窿度突咗出嚟！一線鮮血滴落地上。

「嘥咗我一次暴走者！」

施永義喘住氣咁撥頭髮同整領呔，「聽住！我要你哋聽清楚……我個奇蹟係咩嘢！」

「因為，你哋可能係我最後一批聽眾！」

「我搞個奇蹟出嚟，如果冇人知道有幾勁，冇人知我點嘔心瀝血設計出嚟，咁有咩意思？」

「奇蹟，自己匿埋喺房打飛機，唔係奇蹟。」

「當啲人睇到而且驚嘆你嗰啲叫奇蹟，好似五餅二魚咁，令世人好祟拜你；或者走另一條路線，令人好撚驚你咁……呢啲先叫奇蹟！係咪？」

「唔好聽佢講嘢！」Jason話。佢仲一邊推醒其他人，要佢哋專心應付返條防線。

但係我冇辦法唔聽。

就算我點專心去參與落條防線度，佢講嘅說話亦會直接鑽入我腦海……

「聽清楚啦！」

佢繼續話，「你哋係咪好想知道，我想搞奇蹟啫，我咪去搞條屍河去搞啲倖存者囉，點解仲要搞埋自己個大本營？」

「梗係唔得啦！」

「知唔知點解？」

「你哋唔覺得好神奇嘅咩？呢場屍疫早喺幾十年前就有人預見，而且仲留低咗個Plan，留低咗呢個大台……好喇而家真係出事，呢個從來冇實際執行過嘅Plan，冇Boot機過嘅隱形眼鏡，成壇嘢真係Work喎！」

「戴咗Con嘅人，真係會變成超人！而呢啲超人，又真係有能力喺呢場屍疫上生存，救人，甚至建城，作為末世倖存嘅據點……」

「成件事，咪就係一個匪夷所思嘅奇蹟？」

「咁我一手摧毀咗呢個奇蹟，我咪係一個更大嘅奇蹟囉？」

「因為我毀滅咗背後嗰班人好幾十年嚟薪火相傳嘅心血！我用佢哋打算救人嘅手段，嚟毀滅你哋！」

「幾咁諷刺啊！」

「而且呢件事唔係剩係你哋知道！」

「頭上有衛星㗎！」

「衛星鏡頭解像度唔高，如果要搞一齣舉世矚嘅奇，壇嘢一定要搞得夠大！」

「沙田坳道屍河，一直連綿到獅子山以北，全港喪屍大集合，始作俑者就係聖母醫院搞出嚟嗰個Plan，救人變成害人，希望破滅……」

「呢個奇蹟，舉世皆知！仲勁過耶穌啊！耶穌玩五餅二魚，最多咪幾千個目擊者？」

「而家有成五十億人睇住條屍河啊！」

「勁唔勁啊？」

「而且呢條屍河，仲只係一個更大奇蹟嘅一部份！」

「不過呢啲唔輪到你哋關心啦……你哋已經完成咗歷史任務！」

「睇住……我點樣拆咗呢個大台！」

施永義褪後助跑……

然後好似斬罰球咁，一腳踢向擺喺天台邊嘅第二個人頭度！

人頭好似子彈咁直射飛行，甚至到半路已經散散哋，變成一團鮮血同腦漿混合嘅霰彈！

佢目標係街壘另一邊，一直冇咩喪屍攻擊嘅樹叢！

嘩喇！

人頭打落樹叢之後，兩個吊喺樹上嘅屍袋隨即就跌咗落嚟。個袋冇拉實拉鍊，入面兩條屍就咁攔腰掛咗喺外牆上流血……

係本來守喺後欄嘅另一Team人，出事嗰時已經聯絡唔到佢哋。

佢哋個對講機而家先喺屍袋跌落嚟，仲有啲沙沙聲响……

呢兩條血淋淋嘅屍體，驟然又引嚟我哋呢邊嘅情緒大崩潰！當然與此同時，街上嘅喪屍亦沸騰咁發癲起嚟！

唔止衝街壘，直接爬牆！因為啲新嘅血味，掩蓋哂本來噴好嘅殺蟲水。

「再、再係咁落去……條防線守唔住啦！」Jason擔心。

「你哋覺得我仲有冇機關未揭曉？」

施永義喺天台好得意咁問，「喂，俾啲反應嚟吖！」

「冇啦！」

「玩盡埋條舊橋先！」

佢踢出第三個人頭！

「程朗天！縮低！」

Jason勉強反應到，高舉起個防暴盾遮住我，《建設者》技能亦全開……

砰！

防暴盾爆開！

我同Jason亦同時被震到由街壘跌咗落嚟，無數喪屍瘋狂向我哋背脊伸手……

「冇咁易！」

我一腳踩落堆喪屍度借力！

原始腦，暴走者！

我將Jason托喺膊頭，攬大步爬返去個街壘上面！

725Please respect copyright.ＰＥＮＡＮＡzS9xJbELlI

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically