《屍河明居鑽石山》（是咁的，我發現打喪屍有得升呢） - 520

520

『阿良……個頭……呢個係阿良個頭嚟！』

然後嗰邊癲咗咁狂嗌，跟住好似掉咗個對講機……

驟然成條走廊，靜默得可怕。

「即、即係點？」

黃狗已經喺度喘氣，「我哋唯一嘅Level 4，就喺醫院範圍裏面……俾喪屍偷襲，食咗？」

我下意識不斷搖頭。

「呢個係個局嚟。」

我話，「有人殺咗阿良，用佢啲血肉引啲喪屍入嚟，做成好似斷咗電咁，引我哋去睇，然後……散播恐怖。」

「邊、邊個殺得到佢？」

我、唐唐同黃狗，互相對望咗一眼……心都實哂！

一定係佢！

「喂！聽唔聽到！」

黃狗對住個對講機狂嗌，「返翻嚟先講，唔好理個電箱！個電箱冇嘢㗎！」

就喺呢個時候……

「哇……！」

喺後欄嗰邊，傳嚟一把崩潰嘅喪叫聲！

「係Kiki把聲嚟！」

唐唐面都青埋，「嗰邊又發生咩事？」

唐唐望住我。

「我……只係睇到好多血！」我由《血色追蹤》睇到。

而家東翼電箱，同埋後欄，都緊急需要人手支援……至少要搞清楚發生咩事！

「我去東翼電箱睇睇。」

黃狗話，「嗰邊應該最危險，我係《暴走者》，我一定要去……」

「唐唐你睇住呢度！代我做全Team嘅協調！」

「對講機一時Work一時唔Work，你叫啲兄弟辛苦啲走多幾趟，一有消息即刻互通，OK？」

唐唐點頭。

「咁我去後欄幫手！」我話。

「……好。」

黃狗拍拍我膊頭，「唔該哂你！嗰邊架車仔有架生，你儘量攞！」

「Jason，你跟佢去！」

黃狗指咗個睇落同我差唔多年紀嘅男護士跟我走。

條友驚到腳都震埋。

「我、我得《無玷者》一級同埋《建設者》一級咋，唔係好打得架！」

Jason同我講，「睇住我啊師兄！」

佢再望望我打爆咗嗰個鎖頭。

好明顯條友都係新仔嚟，頭先我哋講咁多嘢，佢一句聲都冇得出……

「一係你留喺度。」

我提議，「我單拖上就得。」

「《建設者》揸盾牌好穩陣，頂得耐過《暴走者》好多！」

黃狗話，「我哋標準防衛演習，都係做開兩人一個Team，唔好睇Jason個樣咁淆底，我同佢同Team實戰過，喺有需要倚賴佢時，好可靠。」

「咁師兄你要睇住我就真！」

我拍拍Jason膊頭，「我冇練過㗎。」

「我、我有睇到你點樣過屍河……」Jason回答。

分頭出發！

黃狗自己去嗌返東翼電箱嗰Team人返嚟，仲話有必要會Call支援，佢最清楚邊啲位有咩人，唔使擔心佢。

而且我哋亦未肯定，玩嘢嗰條友而家伏咗喺邊！

話唔定就喺後欄。

我喺部推車度，揀咗支舊式『矮瓜形』警棍，上面仲有港英龍獅徽記，真係啹架兵時期啲嘢嚟。

Jason叫我帶面罩，我嫌風阻大，揀咗個透明護眼罩嚟帶……主要係防止俾屍液濺到而失去視力吧？但係有《夜之眼》，應該唔會有咩影響。

利器唔多，大概係因為大部份人已經出動咗。

講起之前一開始停電時，阿詠佢哋好多人應該分頭去咗醫院各處，好似話要照顧啲用緊儀器嘅病人……

「阿詠佢……」我問Jason。

「佢而家應該喺病房做緊急救。」

唐唐話，「而家主要係後欄同東翼電箱出事，截住呢兩個缺口，守得住揀樓，樓上就冇問題……」

殺蟲水就有好多，竟然都係《黑旋風》嚟……幾多年前嘅倉底貨？

我拎咗兩支，一支揸住，一支放褲袋。

噴左自己同Jason一身，重點係噴落Jason拎住個大膠盾上面……

出發！

走到出面，我不期然窒咗吓步，忍唔住望天吸咗口好大嘅氣。

開咗《夜之眼》後，第一次曝露喺『夜』幕之下。由呢一剎那起，我先真正感到隻《夜之眼》係威能全開。

對黑夜本身嘅恐懼冇哂。

甚至仲覺得好親切！好似憑住對眼，我喺度同夜晚溝通緊，借用緊佢嘅力量。

「你而家個表情，」

Jason話，「就好似我開完眼第一晚出嚟巡邏咁……呃，聽講你係無師自通，你唔係真係第一次『接夜』啊嘛？」

接夜，應該就係透過《夜之眼》嚟達到同『夜』溝通嘅狀態吧？

一言難盡。

「我冇辦法理解你哋呢啲有天份嘅人。」

Jason，「坦白講，我幾乎係『實驗體』裏面進步得最慢嘅，差啲連開眼都做唔到。」

「所以我只能夠穩扎穩打，做我能力範圍內嘅嘢。如果我間陣跟唔上你，請多多包涵。」

我哋沿住條走廊兜出去，轉多個彎，總算真正見到條屍河。

夜晚嘅屍河。

好擁擠！

「究竟有幾多……」

而且好詭異嘅係，啲喪屍全部跟住同一個方向行，又冇話推擠，好似好清楚自己做緊咩，所有喪屍，都有住同一個目的地。

我轉頭望，喺接近沙田坳道嗰邊，已經塞哂。

應該仲一直塞上條山路度。

但即使係咁塞，啲喪屍都依然係咁擁上去……甚至喺轉角位度，已經出現堆疊。

「喺同竹園村交界嗰個十字路口，」

Jason話，「有Carlos施炸出嚟嘅最大街壘。本來呢個街壘，應該係用嚟擋住外邊啲喪屍嘅，而家唔知點解，反而塞哂啲喪屍喺入面。」

「但係嗰度已經擁擠到冇辦法解開，只能由得佢繼續累積。」

「每次守夜時望到嗰邊，就算開住《夜之眼》，都仲係會好驚……」

我睇到Jason面色蒼白，而且好刻意唔敢望條屍河。

ns216.73.217.123da2

Reading Theme:

Font Size:

Line Spacing:

Paragraph Spacing:

Load the next issue automatically