《屍河明居鑽石山》（是咁的，我發現打喪屍有得升呢） - 521

521

650Please respect copyright.ＰＥＮＡＮＡUsdDEmEqX6

我哋而家沿住醫院內園條走廊，跑緊去後欄。

喺我哋隔離，就係醫院同書院之間嗰條屍河，呢條好似叫龍鳳街。

我哋同條屍河，就只有一道三米高左右嘅斜坡，同埋做咗加固嘅鐵絲網所分隔開。

我哋可以話係逆屍河而上緊。

屍河沿住龍鳳街往西流，直到街尾，再同另一條我估計應該仲多屍嘅沙田坳道，喺交匯處大集合。

Jason講嗰個截住呢條屍河嘅街壘，到底有幾大，我仲未見到。

俾個彎位遮住咗視線。

講真，我唔想見到亦唔想知，只希望呢個漫長夜晚所將要發生喺我身上嘅事，同呢條屍河完全無關。

我要返去救莎倫。

只係聖母正俾人攻擊緊，恐怕已經冇人得閒去拎副Con俾我帶走……

而阿詠仲會留喺醫院！

如果聖母有淪陷嘅風險，我可以掉低阿詠走咗去嗎？以佢個性，為咗照顧啲病人，唔好話帶佢走先，恐怕佢會係堅持留守到最後嗰個。

我只能夠見步行步！

守住聖母，就等於保護到阿詠！

而就算我哋成身噴哂殺蟲水，仲要儘量摀低身搵啲矮樹之類去遮住身影，喺走過嘅時候，仍然吸引到屍河上一啲靠邊嘅喪屍望過嚟，仲企圖爬上嚟搞我哋。

喪屍喺夜晚嘅活躍程度，果然強過日頭好多。

「啲鐵絲網當然亦噴哂老鼠藥同殺蟲水，甚至成條斜坡都俾我哋噴到毒得死人，咁先確保到條屍河唔會發散。」Jason話。

原來條屍河咁集中，都係醫母班人逼於時勢製造出嚟……

「但我哋喺呢個鐘數走過，可能都會有一、兩隻喪屍爬得過啲鐵絲圈網跳落嚟，但而家唔得閒再瞻前顧後！」

Jason話，「救咗後欄先！呢條係必經之路！」

我點頭同意。

嗰邊Kiki依然間竭性咁喪叫，夾帶住啲喊聲……

轉返個彎入去，總算望到後欄！

「好濃重嘅血腥味！」

呢邊主要係車路嚟，仲有個圓形迴旋處俾人上落客。咁平日放車入嚟度閘，而家就俾專業佈置出嚟嘅街壘取代咗。

喺呢一刻我先記得，其實我抱住阿詠，就係跨過呢個街壘走入醫院嘅。

其實個街壘唔難爬，主要係上面噴哂嘢嚟遮蓋人味，令啲喪屍以為只係一道牆，而唔去衝擊。

而家呢？

街壘其中一端，係條燈柱嚟，好多堆疊起嚟嘅防禦物資，都係靠綁住呢條燈柱嚟借力。當然唔止條燈柱，另一邊啲消防龍頭啊，石躉之類，都係用嚟穩定個街壘嘅。

講返條燈柱。

如果我冇開《夜之眼》，根本就發現唔到，條燈柱原來係其中一個『滑輪飛索』嘅交匯處嚟。

其中一Pair就係連去聖母書院。

另一Pair連去對角直街某幢唐樓。

連去唐樓嗰條飛索，而家個手把上面，掛住咗一條血淋淋嘅人形！

真係成身鮮血！

我甚至可以睇到，佢條頸度仲不斷好似開住水喉咁，有條血柱隨住脈膊去湧啲血出嚟……

而Kiki，正爬咗上個街壘頂度，攬住呢條屍對腳喺度喪喊！

「唔准死啊！」

Kiki話，「係你自己講㗎！係你話如果有一日死到臨頭，你一開口問我，我就要俾你屌！冇得拒絕！」

「你一日未屌我，一日都唔准死！」

「我係玩鳩你啊！我一直唔俾你屌，係想你堅強啲捱落去！捱到場屍疫過去為止！你仲有排要捱啊！陳朝輝！」

「陳朝輝！」

雖然只有一個人，但就憑佢身上流出嚟嘅血，竟然足夠染紅三份一個街壘，甚至仲流滿一地……

可想而知，正係呢啲鮮血，引起咗附近喪屍嘅瘋狂！

唔計我同Jason，我諗有七、八個人聚集咗喺後欄，有兩個人企咗喺醫院外圍嘅圍牆上，對住啲喪屍噴滅火筒！

另外有一個人喺醫院後翼大門嘅簷蓬頂，間竭性咁對住條街開槍！係逐發上彈嘅霰彈槍嚟，因此每射一槍都好大聲，好閃。

每一槍射落屍群度，都會見到大範圍咁炸開，至少幾條喪屍爛哂……但喪屍係唔會被嚇怕，因此開槍嘅作用有限……

畢竟係業餘，個槍手只敢朝冇自己人喺附近嘅地點開槍，因此係解救唔到一啲燃眉之急。

為咗掩護Kiki，佢附近企咗三、四個人，頂住最凶狠撲過嚟啲喪屍！

我見到有兩樽滅火筒已經掉咗喺地，即係已經用完。

佢哋開始扔自製氣油彈！

但同樣，氣油彈只可遠扔，否則會燒到自己！最靠近Kiki嗰兩個應該係《暴走者》嚟，開咗SAM，用長竹竿頂開啲喪屍；仲有個女仔雙手並噴殺蟲水，噴落啲血污度……

「係黃狗叫你哋過嚟嘅？」

喺屋簷上面嗰個『狙擊手』問我，「聽講東翼都出緊事？有冇阿良佢哋消息？啲Team Leader齊人未？」

我暗暗拉一拉Jason件衫，叫佢唔好講啲壞消息先。

「呢邊點解搞成咁？」我問。

「Kiki條仔……」

個槍手話，「陳朝輝，我哋睇住佢血淋淋咁，掛咗喺條飛索度滑落嚟。佢係我哋唯一嘅三級《無痕者》，可以望住幢樓就感知到裏面仲有冇倖存者……今日黃昏時佢就飛索過咗去，話聽到對面五樓有細蚊仔喊聲……」

「咁即係點？」

Jason忍唔住出聲，「佢又冇份去捉Carlos施，點解要咁對佢？」

「條癲佬……」

個槍手話，「俾我瞄到佢喺邊，一槍打佢落嚟！阿良仲話要同佢傾！傾乜鳩……而家搞出人命啦……嗚！」

突然間，個槍手撻咗喺地！

原來有喪屍爬緊上石屎簷蓬，伸手捉住咗佢隻腳，要掹佢落嚟！

ns216.73.216.33da2

Reading Theme:

Font Size:

Line Spacing:

Paragraph Spacing:

Load the next issue automatically