《屍河明居鑽石山》（是咁的，我發現打喪屍有得升呢） - 601

601

抬頭一望，係我今晚第一次見到個月亮。

正好係月圓之夜。

個月亮好大，好圓，但唔係好光，橙橙紅紅咁，仲矇矇哋。我玩《曠野之息》時就見過類似嘅月亮，Game入面嘅稱呼係……

血月。

血月會令魔物瘋狂。

喺距離嘅錯覺下，月亮就掛咗喺嗰個男人伸手可摘嘅距離……喺四周烏燈黑火，同時月色又咁暗淡嘅環境，正常係好難留意到有個人企喺天台上。

就除咗有《夜之眼》嘅我哋。

尤其對於有《無痕者》三級嘅我，呢個男人，好似一個遮擋住哂我視線，高清到我冇可能忽視嘅存在！

施永義！

佢仲著住件醫生袍，不過袍上已經睇唔到有邊忽係白色。

兩邊衫袖俾咗掹咗落嚟，露出血淋淋嘅裸露雙臂。啲血係噴落去佢手臂上，唔係自己流出嘅。

我甚至隱約見到有啲白氣冒起……啲血係熱嘅！

當然，佢唔再係書院禮堂見到嗰個文質彬彬，頭髮蠟得一絲不苟嘅施永義。

雖然睇得出頭髮有梳理過，俾我撞爆過嘅後側腦仲係凹陷嘅，嗰部份嘅頭髮同啲血漿癡埋一舊，好似個雀巢咁……

副金絲眼鏡都係歪框，爆鏡嘅。

但除此以外，我感覺到佢身體狀態，整體嚟講係強壯嘅，甚至比起上次，更少幾分陰柔，多幾分暴躁同癲狂。

只係佢依然好姿整，用佢隻接駁得有啲畸形嘅手臂，梳返順啲頭髮，又整吓條呔……竟然仲有打呔。

我記得條手臂係俾我打斷過落嚟，但既然當時佢好緊張咁執返，即係佢都預算係駁得返。

而事實上，喺我親眼睇住佢生食個女學生嘅松果體後，身體外傷以肉眼可見速度修補……我對佢嘅復原速度就唔會大驚小怪。

佢一現身，全場嚇到窒咗窒！

「唔好理佢住！」

仲企喺街壘前線上嘅Jason話，「繼續頂住條防線啊！」

仲要諗辦法拎返個細路條屍落嚟，唔好俾佢繼續滴血喺個街壘上……大家仲好多嘢做，但顯然，而家都俾施永義搞到六神無主，險象橫生！

『呢幢大廈天台有一Team人守夜，』

Jason喺身後同我講，『佢唔玩得好耐，我哋會伏到佢。』

「Jason！」

施永義用好似演講咁嘅聲線嗌落嚟，「我知你諗緊咩，我諗你要失望啦。」

佢指咗指側邊地下。

就喺天台邊緣條壆上面，好齊整咁擺咗四舊嘢……

係人頭嚟！

當場就有幾個人崩潰大嗌！

「係阿雲同加拿大佬！今晚係佢哋負責守天台……」

「咁、咁另外嗰兩個呢？佢哋係咪……」

驟然防線一片大混亂！

就連一直都好冷靜嘅Jason，都嚇到就要由街壘跌出去，我連忙一手捉住。

『佢有《無痕者》三級，』

我喺Jason耳邊話，『佢唔識讀心，只係察覺到你視線同表情，估中你大致諗咩……』

但係有咁敏銳嘅感官，同真係識讀心嘅分別唔大！

「你哋係咪好掛住啲Team Leader呢？」

施永義繼續嗌落嚟，「夜媽媽派哂最識打嗰幾個出去圍捕我？雖然話趁我病攞我命啫，有勇無謀咗少少啊嘛？」

「不過紙上談兵就係咁，而且呢個年代嘅人，理想主義，又唔夠危機感。畢竟呢一批Team Leader都已經係第四定第五代，同啹㗎兵時嗰批爭太遠……」

「你講得啱啊，祖堯師兄，」

佢執起其中一個人頭，對住佢講嘢：「你平日發惡夢時擔心緊啲嘢，而家全部發生哂！呢一代係未有足夠訓練去面對屍疫，尤其係爆災之後衍生出嚟嘅人性轉變同考驗！」

「祖堯師兄，你係呢一代唯一有俾元祖嗰批Team Leader 訓練過嘅，你每年同佢哋出去飲茶聚舊時，佢哋都係咁同你講，一代不如一代，如果聽日香港出事你哋就死硬！」

「真！就連祖堯師兄你自己，都犯咗無法補救嘅新手過錯。」

「你太睇小透過食人腦嚟升呢嘅《吞噬者》啦！」

「而且我話你知！」

「原來唔只松果體食得！我當冬瓜盅咁挖哂你成個腦嚟食之後，就連你嘅記憶甚至發過嘅夢，我都接收到一啲！當然唔係全部啦……」

「呢啲嘢Manual都冇講㗎！」

「鬼叫你哋幾十年嚟，都冇做過呢方面嘅人體實驗咩！」

我望向嗰幾個人頭，輕到俾風都吹得郁少少，而且眼珠都係吊哂出嚟嘅……似乎大腦都俾施永義挖咗出嚟食！

「你個變態去死！」

個霰彈槍手忍唔住鬧咗出嚟！

砰！

施永義腳下嗰層嘅玻璃窗，驟然被子彈射爆！

只有兩粒鐵珠彈到佢褲管，造成佢完全唔在意嘅小傷。

佢企前一步，彎腰俯視忙住換子彈嘅槍手。

「我未講完喎。」

施永義就拎住個人頭，用盡全力向下掉，「咁急住送死做咩嘢！」

……砰！

呢一扔，竟然擲到個簷蓬都爆爆哋，背面嘅天花有大幅石屎剝落！

嗰個位有Kiki同陳朝輝喺度！

ns216.73.216.174da2

Reading Theme:

Font Size:

Line Spacing:

Paragraph Spacing:

Load the next issue automatically