一個A0毒L和O4女神的故事 - 第四十六章我唔想見到你再為我受傷

不知何解，阿康會在Athena公司樓下出現。

阿康用力捉住諾少的手，順利甩開了他。

阿康：「你睇下，你捉到Athena隻手紅晒喇，你依家係傷害緊佢，唔係愛佢。」

諾少：「Sorry呀Athena，我唔係有心，我唔係有心想傷害你。」

阿康：「不如你走啦，好冇？」

諾少：「Athena，我遲啲再嚟搵你，拜拜！」

諾少向阿康報以一個凌厲而不友善的目光，便徑自離去。

阿康：「Athena，你點呀，有冇俾佢整親呀？」

阿康溫柔地捉住Athena的左手，細心檢查Athena的手腕。

Athena︰「仲有少少痛，不過OK，唔使擔心。」

阿康：「唔擔心就假喇，你睇下呢個諾少幾粗魯吖，攪到你隻手紅晒！你做乜唔叫我接你喎？」

Athena︰「我本身都想，但又怕麻煩你，唔想你特登過海嘛！」

阿康：「你下次一定要搵我呀！我見到你隻手紅晒，我好心痛。」

Athena看見阿康的緊張神情，知道阿康真的很緊張自己，心裡立時有溫暖的感覺。

阿康：「你……食咗飯未？」

Athena︰「未呀！」

阿康：「不如一齊食吖，我都未食。」

Athena︰「好呀！」

自曼谷回來後，阿康和Athena二人從未一同外出晚飯，今晚是第一次。

阿康：「Athena，sorry呀！」

Athena︰「做乜冇端端講sorry？」

阿康：「我今日終於深深咁體會到，兩年前嘅自己係幾咁乞人憎，做咗今日諾少做緊嘅嘢，令到你受驚、受傷害。」

Athena︰「你已經做咗好多對我好好嘅嘢，我幾乎已經唔記得咗兩年前嘅你。而且你當時只係用錯方法，但今日嘅諾少係有惡意，心地太差，同你完全唔同。更何況，你當年都冇捉到我隻手痛吖！」

阿康：「多謝你仲調返轉頭安慰我！」

Athena︰「喂，點解你會無端端喺灣仔嘅？又會突然喺我公司樓下出現嘅？」

阿康：「冇，我同你心有靈犀嘛，我心裡面感覺到你受到威脅，咪即刻過嚟救你囉！」

Athena︰「咪玩啦，正經啦，講啦！」

阿康：「哈哈，咪就係你嘅『輸入中』囉！」

阿康解釋，大半小時前他打開WhatsApp，無意間看見Athena正在「輸入中…」，以為她會傳送信息給自己。但等了一回，又停止了「輸入中…」，最終又收不到她的信息。這種WhatsApp版的欲言又止，令阿康感到忐忑。

所以，他決定到Athena公司樓下，看看能否碰見她，怎料真的成事，還誤打誤撞地幫Athena解圍。

Athena︰「咁你又知我喺公司？你唔俾我返咗屋企嘅咩！」

阿康：「你認為我唔會睇你IG？你琴晚喺IG po咗張相，話近排好多嘢做，嚟緊呢兩三日都唔使旨意準時放工，咁我咪覺得你喺公司囉！」

在Athena心中，阿康就是一個讓她很放心、在任何時間都會對她無微不至的人。這種感覺，是其他男生包括Fred所沒有的。

在這次和阿康的即興晚餐，跟上星期和Fred的一次，背景設置都很相似，兩者都是即興，而且晚餐前對方都有為她解圍。所以，Athena好想好想，在今晚與阿康一起晚餐的體驗當中，比較上星期跟Fred晚餐時的感覺。

Athena︰「我驚諾少會去騷擾你！我好擔心你嘅安全！」

阿康：「佢唔會搵人伏我掛？咁都唔驚得去邊，再唔係咪同佢大打一場囉，我呢幾個月有練泰拳，我都未必會輸㗎，應該唔會好似兩年前咁樣俾George打到受傷掛！」

Athena︰「我就係唔想咁！我唔想見到你再為我受傷！」

Athena望著阿康，阿康也深情地望著Athena。Athena從阿康的眼中，感受到阿康對自己的愛意。Athena清楚知道，自己對阿康的愛，與阿康對自己的愛相比，一個是低谷，一個是高山。

阿康：「你係咪唔捨得我俾人打傷？」

Athena︰「唔係呀，冇啲咁嘅事！」

二人也忍不住傻笑。

Athena跟阿康相處，感覺很輕鬆自在，但缺乏了一種令人很期待、很驚喜的感覺。而Fred在Athena面前，永遠都有一種很有魅力、讓人很期待、很好奇、很想繼續跟他一起發掘新事物的感覺。

直到目前為止，Athena從Fred身上，找尋到更多戀愛的感覺。

兩天後的晚上，就在阿康放工回家的途中，在屋邨碰見諾少。當然，並不是碰見那麼簡單，是諾少刻意前來找阿康。

諾少：「等咗你好耐喇！」

阿康：「你真係煩到一個點！不過都好，你今晚唔係去煩Athena！」

諾少：「我都好耐冇同人打過。喂，隻揪啦，你打贏我嘅話，我就唔再煩Athena，但我打贏你嘅話，你都一樣唔好再搵Athena。」

諾少提出以單對單決勝負，如果一方輸了的話，便不可再接近Athena。阿康感到相當驚訝。

阿康：「唔係呀化！呢啲嘢根本唔應該用拳頭去解決！你估依家仲七十年代咩，打打殺殺！」

諾少：「講少啲廢話！呢個係最快解決問題嘅方法，嗱嗱臨！」

阿康：「比賽咩依家！你打贏咗我，但追Athena又點止得我哋兩個，唔通你又繼續去打其他人？你太無聊喇！你……」

諾少未等阿康說完，便立刻揮出右直拳。幸好這數個月來，阿康學習了泰拳，他上半身稍稍橫移，避過了諾少的攻擊。

諾少：「幾好吖，反應唔錯！嚟嚟嚟，快啲同我打！」

阿康：「唔打喇，根本就唔需要打。我係Athena嘅朋友，就算我打輸俾你，我都一樣會去搵佢。」

諾少：「朋友朋友，你唔好鳩吹啦，你會唔鍾意Athena？」

阿康：「我鍾唔鍾意佢都唔關你事……」

諾少再次突襲阿康，今次阿康冷不提防，被諾少擊中咀角，立即血流如注。

阿康：「屌，你係咪痴線㗎？」

諾少：「還手啦，仲等？」

阿康平時很少說髒話，但今次真心被諾少惹怒。

諾少不再怠慢，立即發動攻勢，不斷攻擊阿康的臉部和上半身。雖然阿康最近有學泰拳，但從未試過真正跟人埋身搏鬥，更何況對方是有惡意，所以一直處於捱打狀態。

阿康因不想影響工作，以防被打得口腫臉腫，所以只有一直防禦諾少對自己的臉部攻擊，而硬受對方對其上半身的其他攻勢。阿康多處被諾少打傷。

諾少見阿康一直沒有還手，攻勢更加凌厲，阿康快要支撐不住。他們打鬥的那個地方，晚上很少有人經過，而且有瓦遮頭，聲音很難被傳開去，所以沒有一個途人能察覺到有人打架。

諾少：「廢柴，你連打都唔敢打！」

雖然被人大罵廢柴，但阿康仍然不為所動，沒有還手。阿康從小到大，都在別人的欺凌之下長大，普通的辱罵和身體傷害，阿康根本不當一回事。

他不還手的原因，是他根本不喜歡打架。他非常憎恨打架的人，他未到最後一刻，也不會選擇還手。

諾少：「死廢柴，唔識還手吖嘛！好，等我幾個回合之內就收你皮，打到你企唔返身，之後再搵Athena大戰返三百個回合，爽吓都好。」

阿康一聽到諾少講一些侮辱Athena的說話，立即怒火中燒，終於按捺不住，用盡全身力氣，施展一招「後旋踢」，成功擊中諾少的右臉頰。

ns216.73.216.168da2

Reading Theme:

Font Size:

Line Spacing:

Paragraph Spacing:

Load the next issue automatically