《我專門幫人擺分手和頭酒》 - （五）性格不合(上)

海港城，XX拉麵，向海位。

「仲有半個鐘先見客，嗱嗱聲食個面先！」

我「𠽌𠽌」聲咁開始食我個拉面，後面就突然傳嚟一聲「二打打姨媽屎」嘅叫聲。

我一聽呢把聲，我就知道，Kelly又嚟咗。

我一擰轉頭，果然見到Kelly坐咗喺後面張枱，而佢對面亦坐咗一個書生型嘅男仔。

唔洗問，九成九又係佢嘅新目標。

我怒睥咗喺我身邊嘅偵探一眼。

偵探好隨便咁講咗句：「佢話有case就通知佢嘛。」

嘩，又唔見你平時咁聽我講。

Kelly似乎都聽到偵探講嘅嘢，佢先同咗對面個男仔講咗句：「我見到我朋友啊，我哋之後再聯絡啦！」

對面個男仔好期待咁點咗一下頭，然後就走咗。

Kelly將碗麵捧咗去我隔離坐低，我乘機問一句：「新仔？拍咗拖就唔好成日嚟煩住我哋啦！」

「痴線，佢係我大學同學嘅朋友個表哥，出嚟認識下做朋友㗎咋！」Kelly反一反白眼，然後一邊食一邊講：「仲有你唔好怪偵探啊，係我自己話要嚟嘅！」

我唔怪偵探，但我會怪你邊食邊講彈到我一臉湯汁。

「其實你早啲講我知到底點解你要搞分手和頭酒，我就唔洗跟住你嚟查啦。」Kelly今日紮起咗馬尾，特別好睇，如果佢講嘢無咁煩同強詞奪理，我諗我會比較容易接受佢嘅出現。

「首先我講過，你跟住嚟，都唔會知點解我要搞分手和頭酒；二來，我點解搞，關你咩事呢周小姐？」

我抹翻臉上面嘅湯汁，痴線，抹完張紙巾變咗橙色。

「話哂我係你分手和頭酒嘅大股東，我想知原因都好合理啫！」

「我講過，你雖然真係為我哋帶嚟咗好多收入，但係嗰啲全部都係合約有寫嘅收費，唔算係投資喎。」

「咁話哂我參加過十一次分手和頭酒，我都算大客，大客參加得就代表有感情，有感情就代表我想和頭酒好，我想和頭酒好當然要了解和頭酒嘅來源啦！」

Kelly一口氣講哂呢堆嘢，我突然覺得自己變咗「九品芝麻官」入面嘅龜婆，一句都駁佢唔到。

無錯，Kelly其實係我個客，Vip嗰種。

和頭酒搞咗五年幾，佢總共參加咗十一次分手和頭酒。

而佢之所以話自己係大股東，係因為有一次分手，佢又想邀請男朋友出席分手和頭酒，佢當時男朋友係都出名嘅富二代，唔想俾傳媒影到所以死都唔肯出席。

但係根據分手和頭酒合約第九條：「若發現存在違約或詐騙行為，違者需支付港幣$100,000作解約金。」

所以，最後富二代用錢解決咗問題。

因為呢$100,000，令我可以租得起一個小辦公室去搞和頭酒。

但亦因為呢$100,000，令到Kelly自稱自己係我嘅大股東。

既然講開Kelly，都可以講下俾佢纏上嘅呢個惡夢係點開始。

話說，一星期前，Kelly出席咗第十一次分手和頭酒。

就係佢同當時男朋友完成分手和頭酒餐飯之後，我做咗一個決定。

一個我後悔咗七日嘅決定。

當時Kelly前男朋友已經喊住走咗，得翻Kelly喺度大大啖食緊枱上面嘅生蠔。

「周小姐你好。」我當時仲對佢好有禮貌。

「Hi阿濤，坐低一齊食啊！」Kelly左手拎住生蠔，嘟住嘴吸入口個樣其實幾可愛。

呢個係當時我仲未認識佢嘅時候嘅感覺。

「周小姐其實今次我想通知你一聲，今次應該係我哋最後一次接受你參加分手和頭酒啦。」

我個樣表現得非常唔好意思，但我內心其實已經心意已決。

「吓，點解啊？」Kelly個樣好迷惘，手上嘅生蠔亦停咗喺半空。

「其實我哋搞和頭酒嘅目的，係想每對情侶有機會互相分享原因，等佢哋可以認真面對以後嘅關係......」

我嘗試唔將說話講得太白，為免大家尷尬。

「係啊，我就係覺得呢個概念好好，所以我先每次都拉男朋友嚟簽約，如果唔係點會參加咗十一次呢？」Kelly似乎仲未明我嘅意思。

「嗯，好多謝你咁支持我哋，但係從呢十一次嘅和頭酒呢，感覺上都好似唔太幫到你......」

可能你會覺得我好趕客，但其實我真係想趕客。

因為分手和頭酒嘅需求其實好大，好多情侶都單方面「被分手」之後，好想有機會同對方傾清楚，所以其實自從呢樣嘢搞咗一兩年之後，我同偵探到而家嚟到第五年已經做到差唔多日日無停手。

亦都因為咁，對於好似Kelly呢啲根本就唔認真拍拖嘅人，我會寧願將時間花喺其他人身上。

「幫到啊，每次我都搵到分手嘅原因啊！」Kelly點住頭咁講。

「但係，根據紀錄，十一次嘅分手原因，計埋富二代嗰次，全部原因都係......」

「『性格不合』囉！有咩問題？」Kelly好奇咁問。

一次性格不合我可以接受，但係十一次性格不合，我覺得呢個簡直係世上最不負責任嘅分手原因。

當你玩厭咗、唔想煩、或者想換畫、諗唔到原因同人分手，性格不合可以話係萬用分手答案，好用過陳國邦。

當然，偵探查過佢，每次真係無外遇、無金錢糾紛、無奇怪家庭背景。

但因為我覺得佢對感情唔多認真，所以真係唔想花時間俾佢。

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically