《我專門幫人擺分手和頭酒》 - （八）竊聽風雲

今日阿飛同Rebecca嘅分手和頭酒喺一間茶餐廳度舉行，好彩我事前book定間細房，俾佢兩個叫做有個安靜少少嘅環境傾下計。

Rebecca比原先約定嘅時間早咗半個鐘到，睇得出佢好緊張。

而Kelly一見到佢就即刻陪住佢，仲要加咗句：「放心，我帶定較剪㗎啦。」

聽完呢句，連我都緊張埋一份。

喺正式開始時間十分鐘後，阿飛就嚟到啦。

呢一刻嘅阿飛，已經染翻一頭啡髮，加埋耳邊兩個金色耳環，一身著住唔同潮牌，嗰浸「旺角男生」嘅味道即刻湧哂出嚟。

「你遲到喎死mk。」

我同Rebecca都未出聲，Kelly已經從我哋負責人坐嘅隔離房走咗出嚟，指住阿飛鬧。

「阿嬸你邊位啊？出嚟搏打啊？」阿飛眼眉一挑，好似望精神病人咁望住Kelly。

「唔好意思，佢喺呢度洗碗㗎。」我即刻入房打圓場，順便叫偵探幫我帶走Kelly呢個危險人物先。

「兩位好，歡迎嚟到兩位嘅分手和頭酒，我就係主辦人阿濤。今晚嘅菜式已經為大家預備好，好快就有得食。根據合約，今日大家需要喺呢一場晚餐入面至少逗留60分鐘，同埋完成指定嘅特別活動先可以走嘅。如果有需要，只要whatsapp我就ok，我會喺隔離房standby。」當我講完指定對白之後，我就功成身退咁去翻隔離房，同偵探、Kelly一齊睇隱藏攝錄機。

由於Rebecca同阿飛當初揀嘅呢間只係一間茶餐廳，所以我就幫佢哋每人叫咗一份馳名茶餐。

「其實分手咪分手囉，做咩搞咁多嘢啫，嘥哂我啲時間。」阿飛一邊𡁻住餐包，一邊唔耐煩咁講。

「我...我想知點解你同我分手。」本來仲祈緊謝飯禱嘅Rebecca，聽到阿飛呢句，即刻擘大眼望住咗佢。

「我咪講咗因為唔鍾意你囉，仲有咩原因。」

「唔會㗎，你係由上星期先開始變㗎，你點會無啦啦唔愛我喎。」

「咁我突然發現我哋性格不合唔得嘅咩？」

「性格不合真係萬用，無論mk仔定煩膠都啱用。」

我一聽到「性格不合」這四個字，即刻忍唔住開聲串下Kelly。

「邊個煩膠啊？」Kelly喺褲袋度攞咗把較剪出嚟隊住我。

「無，我怪責緊自己啫。」君子不吃眼前虧，我怕呢刻激嬲Kelly，下一刻我真係會變虧。

呢個時候，茶餐廳開始上菜，Rebecca前面嘅係一碗熱辣辣嘅沙嗲牛肉麵，而阿飛前面就係雪菜肉絲米粉。

「我俾舊牛肉你吖，我知你鍾意食。」Rebecca嘗試笑住咁夾起舊牛肉去阿飛碗米粉度。