《我專門幫人擺分手和頭酒》 - （十六）驚恐症

「驚恐症？」Kelly坐咗喺我書枱前面，好難得咁安靜聽哂我講我同偵探嘅故事。

「嗯，所以我會定期食藥，亦都解釋咗點解我啱啱會喺條街度暈咗。」

「因為你嘅ex？」Kelly試探咁問。

我點一點頭。

驚恐症，係喺分手後三個月後出現嘅。

有一次當我出街準備坐地鐵嘅時候，一落到月台見到好多人，突然之間就覺得呼吸困難。

之後，每當我經過一啲同「佢」有重要回憶嘅地方，或者諗起同「佢」嘅事，我都會有好強烈嘅心理同身體反應。

我嘅心理醫生話，呢樣係驚恐症。

「驚恐症出現嘅原因有好多，可能係天生遺傳，亦可能因為壓力。通常人經歷童年陰影、痛失摯愛、生活嘅重大轉變等等都有可能引致驚恐症嘅出現。」

聽住醫生嘅解釋，我估我明白咗自己點解會有驚恐症。

但係對我嚟講，呢個病最辛苦嘅地方唔係身體上嘅麻煩同唔舒服。

而係佢無時無刻都提醒緊我，我仲未放低到「佢」。

呼吸困難？因為呢度係你同「佢」去過嘅餐廳。

心跳加速？因為你同「佢」喺呢個海旁傾過計。

頭暈頭痛？因為你同「佢」曾經一齊聽過呢首歌。

驚恐症，成為咗我身體入面一個代表「佢」嘅警報器。

雖然驚恐症為我帶嚟咗好多唔方便，但係其實我又唔係真係咁介意自己有呢個病。

因為，我覺得，每個分完手嘅人，多多少少都會有啲病，Playboy/playgirl另計。

我所講嘅病，可能係固執、否定現實、沉迷過往、崩潰……

所以比起呢啲病，我只係有一個有醫生可以認證到嘅病啫。

「你啱啱話，搞和頭酒嘅原因係想彌補遺憾，咁你同佢嘅遺憾係咩？」Kelly又問。

我搖一搖頭，無答到佢。

「我其實啱啱都有問過偵探關於你同你個ex嘅過去，但係連偵探都話唔知。」Kelly一臉疑惑。

「嗯，我一直無同任何人講。」

因為，我根本未準備好去面對。

所以就算偵探曾經話可以幫我查，但係我都拒絕，甚至禁止咗。

「你唔係成日都話，有原因就要坦白講，講出嚟就解決到問題嘅咩？」Kelly追問。

「有啲嘢，唔係咁簡單。」我拋低咗呢句嘢之後就轉身訓向床嗰邊，唔想再解釋。

「我知你覺得我成日換畫就係對感情唔認真，但係其實我只係想搵一個自己鍾意同適合嘅人。我忠於自己，我唔明有咩問題。而你，明知有原因但係都唔面對，唔通呢啲就係認真？」

我聽到Kelly把聲又似鬧，又似想提醒我，但係呢一刻我真係無力氣回應佢。

夏蟲不可語冰，我覺得Kelly永遠都唔會明白，認真咁失去一個人嘅感覺有幾痛。

就係呢一刻，我聽到門打開嘅聲音。

「食藥啦。」

係偵探。

來得及時。

我即刻接過佢俾我嘅藥丸同嘢食，塞滿自己個口，順便唔答Kelly嘅質問。

「做咩揸住我哋張相？」偵探指一指Kelly手上面嘅相框。

「點解你唔同哂樣嘅？」Kelly應該睇得出我唔想答佢，所以轉個話題。

「樣其實係一樣嘅，你所講嘅『唔同』只係一種形態嘅轉變。」偵探哲學級嘅回答，令Kelly無癮咁唔再問落去。

無錯，而家嘅偵探的確已經唔係大學嗰個長頭髮嘅F4髮型。

佢換咗一副木質方框嘅文青眼鏡，剪咗一個碎陰嘅髮型，同唱「下一位前度」嗰個林家謙有幾分相似。

當佢哋想繼續探討偵探外表大變身嘅問題嘅時候，屋入面突然響起咗一首歌。

「風裡笑著風裡唱 感激天意碰著你

縱是苦澀都變得美

天也老任海也老唯望此愛愛未老

願意今生約定他生 再擁抱」

呢個係我屋企每晚凌晨十二點都會響起嘅鬧鐘歌聲。

而呢首「今生今世」，係我同「佢」嘅定情歌，亦都係唯一一樣同「佢」有關，但係唔會令我驚恐症發作嘅回憶。

實際原因，我自己都解釋唔到。

但若果真係要嘗試解釋嘅話，可能係因為呢首歌帶出嘅係希望。

「今生約定他生再擁抱」。

若然今世無機會再一齊，至少可以希望下一世再一齊。

或者，「期望下一世再一齊」呢樣嘢其實似幻想多過似希望。

但係，呢個確實係我僅有，亦係唯一仲可以有嘅希望。

其實有時候我都諗，到底我係咪真係咁在乎佢，定抑或我只係在乎緊佢離開嘅原因。

一個，五年來我一直都未知道嘅原因。

ns216.73.216.176da2

Reading Theme:

Font Size:

Line Spacing:

Paragraph Spacing:

Load the next issue automatically