《我專門幫人擺分手和頭酒》 - （十四）身影

去到油麻地嘅時候，已經係夜晚七點。

我企咗喺一個地方外面已經三十分鐘，一直都未夠決心行入去。

最後，我深呼吸咗幾下之後，終於走入咗正門。

「先生，想睇咩戲？」

「無所謂，邊套戲可以去三號院睇啊？」

「好少人會揀院嚟睇戲......先生，七點十五分有套『奪命狂鯊』。」

「好，就呢套啦。」

「多謝光臨百老滙電影中心。」

我攞住咗張戲飛，望一望上樓嘅樓梯。

呢一刻，先係挑戰嘅真正開始。

喺張「紀念日to do list」上面，最後一個要完成嘅項目係「去百老匯電影中心三號院睇一場戲」。

呢個地方，呢個戲院，係我同佢當年第一次拖手嘅地方。

當年，因為鍾意呢間戲院感覺文青又懷舊，所以佢帶咗我嚟。

當年，我哋睇嗰套係大獲好評，由Iron Man主演嘅「福爾摩斯2」。

當年，套戲有一刻有壞人突然彈出嚟嚇親佢。

當年，我捉住咗佢隻手，之後就無再放開過。

直到，分手嘅一刻。

桃花依舊，人面全非。

明明今日所坐過嘅巴士、所見到嘅餐廳、所走到嘅戲院全部都無變過，但係我心入面剩低嘅，就只係得翻空洞、無奈同驚怕。

經過咗呢幾年，我先開始慢慢明白，原來失戀或者分手唔係要克服。

而係要接受。

接受自己生命之中已經失去咗嗰一個人。

接受自己同嗰個人再無任何名份同關係。

接受無論嗰個人喜怒哀樂都再與你無關。

接受一個生命中一個曾經係最重要嘅存在，霎時之間就消失喺生命入面。

所謂嘅「克服」，其實有「跨過、無視，然後前進」嘅意思。

但係對我嚟講，以上所有嘅嘢都無可能克服到，因為所有感覺，都係真真切切嘅存在過。

我甚至懷疑，當我個心解剖開嘅時候，有一部分係刻上咗佢個名。

所以，無可能克服，只可以接受。2241Please respect copyright.ＰＥＮＡＮＡJYfdy21Goq

「先生，先生！三號院可以入場喇喎。」

當我回過神嘅時候，見到戲院個服務員向緊我揮手。

我望住頭項上面著咗燈嘅嗰個「3」字。

「我唔係三號院㗎。」

轉身。

又多一個交叉。

走咗出戲院嘅一刻，我望住四個今日畫上去嘅交叉。

我無怪責自己，因為就連我嘅醫生都同我講過，個病係唔會因為我迫自己去面對就會好翻。

所以，我知道做唔到唔係我嘅錯，只係我仲未準備好放低佢。

唯有，等到下一年再試過。

正當我準備去附近嘅廟街食碗煲仔飯安慰下自己嘅時候，我突然喺眼前見到一個熟悉但又唔太想見到嘅人。

Kelly。

佢好開心咁同緊一個男仔傾計，個男仔係一個睇落似ABC嘅人，高大有肌肉，笑起嚟幾陽光男孩feel。

我本來都諗住趁佢未見到我就走快兩步，點知都未起步，就俾Kelly一眼發現咗我。

「阿濤！」Kelly勁大聲嗌咗我一聲，然後同個男仔講咗幾句嘢就揮手，跟住就走向我度。

「又換畫啦？幾時上嚟簽約俾錢我賺啊？」我暫時放低咗心入面嘅愁緒，用翻平時個樣對住佢。

「咩啊，嗰個朋友嚟㗎，大學朋友介紹識嘅，今日第一次見咋！」Kelly講。

「哦，好啊，咁唔阻你啦，bye。」我只係想快啲打發佢走。

「喂！」Kelly追快兩步又嚟咗我隔離，「其實你係咪成日都覺得我對感情好唔認真呢？」

「係。」

「我唔明喎，我只係想搵一個啱自己嘅人啫。我仲要認真到連交友apps都唔用，淨係去識啲朋友介紹嘅人，點解你都覺得我唔認真呢！」

Kelly拉住咗我，聽得出佢把聲有少少嬲，但我其實真係無咩心情同佢吹水，所以我無答佢，打算繼續行向廟街。

就係呢一刻，有一陣電話鈴聲同我擦身而過。

「忘掉你誰能接受～如今放手無言退後～」

係「再見Puppy Love」。

我即刻轉身，我見到一個啡色長頭髮嘅背影，攞起咗電話嚟聽。

喺呢個年代，仲會用咁舊嘅歌嘅做電話鈴聲嘅人，除咗佢，仲有邊個？

呢一刻，我直接無視咗Kelly，直接追向鈴聲嘅主人。

但係追出咗幾步，我停低咗。

我知道呢個係我身體嘅反應，話緊俾我知，我個心唔想接近呢個人。

但係，我個腦不斷同我講，行前啦，差幾步咋，真相就喺前面。

我踏出一步，氣喘、心跳加速、頭痛、手腳麻痺，開始不斷咁出現。

「你無事吖嘛？」Kelly喺我隔離睇住我嘅反應，一時間連佢都呆咗唔知點做好。

「扶我...追前面...個女仔。」我好勉強咁講出咗呢句嘢，因為我已經發現自己連氣都開始抖唔到。

「你抖下先啦！仲掛住追女仔！」Kelly扶住咗我，好擔心咁講。

「快...行！」我用盡全力指住前面啡色頭髮嘅女仔，但就喺呢一刻，我見到佢走過咗馬路。

佢嘅身影就咁俾橫過嘅車遮住咗。

到底嗰個係咪佢？

當我想再諗呢個問題嘅時候，我就已經雙眼一黑。

耳邊最後聽到嘅，係Kelly嘅尖叫聲。

ns216.73.216.141da2

Reading Theme:

Font Size:

Line Spacing:

Paragraph Spacing:

Load the next issue automatically