機動戰士高達︰瑪斯子嗣　The Children of Mars - 第三十二集　蕩失路，肯定因為有人烏鴉嘴(四)

佢蕩失路喇。

喺殺戮入面。

拿住槍，一槍又一槍。

一次又一次。

一次又——

「喂，你行錯路喇。」

佢擰轉頭，只見到嗰個細路女，頭髮似血咁紅。

※※※

白色，周圍都係白色。

古荻利亞都唔知道，自己點樣行到來。

不過，電視機前面嗰隻豆丁，佢化咗灰都認得——呢一次，換咗套綠色嘅校服。

「喲，衰鬼，點解你而家唔透明嘅？」

「因為你成日作死，」艾莉克特擰轉頭，望住佢，兩隻眼都係鄙視，「今鋪就真係，離死不遠呀。」

「哎呀，假若我真係掛咗，咁唯有來打攪你囉。」

「死開，我住慣單人房。兼且，蘇萊塔會唔開心。」

「死妹控。」

「彼此彼此。」

佢喺隔離坐低。

電視上面，藍天、白雲、綠草、仲有玻璃屋——溫室，佢喺P.L.A.N.T.啲衛星見過。

「嗰度乜地方？」

「阿斯提卡西亞。」

第一身視角，大致可以推斷，嗰位十七歲嘅女主角，同緊個大舊衰霎氣，為咗個白頭髮嘅女仔。

「……你一直咁偷窺你阿妹呀？」

「邊有咁方便？」艾莉克特兩手一攤，「呢個算錄影，佢啱啱上咗風靈。」

「如果我冇搞錯，開學第一日，佢就同人決鬥，為咗女人——呀，呢種感覺，唔通就係老懷安慰？」

「唉，畀你哋帶壞哂。」

「我係教過一招半式，估唔到咁快用得著！」

「……你到底當咗學校係乜地方？」

「龍爭虎鬥、弱肉強食、終日戰人娘親嘅地方！」

艾莉克特眼白一反。

「你睇太多漫畫喇。」

「當初你帶我睇嘅。」

「咁講都係我嘅錯囉？」

「咁梗嘅啦——順帶一提，獨食難肥，我幫你派哂出街喇，第二月球最大禁書源頭——神秘嘅艾莉克特！」

「哇，咁我畀你阿爺打靶嗰陣，咪要多謝你？」

「唔洗慌喎，你食到子彈乜？」

「又真係食唔到——好喇，你都係時候返去喇。」

啪——有人啪咗下手指。

跟住，佢踩住嗰塊地，忽然多咗個窿，一啲先兆都冇。

「喂、等等等等等陣——決鬥邊個贏，我仲未睇呀！」

佢掹住個窿——哇頂，點解咁𨃩㗎！

「一早就知輸贏，仲有乜睇嘅需要？再者喇——」

「再者乜呀？」

「再者囉，三日月等緊你返去哦。」

「……關我鬼事？」

「做人坦白啲，今日今日，唔流行傲嬌㗎喇。」

「你話邊個傲——」

死人幽靈毫無人性，一腳西佢落去，仲要踩落塊臉。

※※※

佢跌咗落去，落咗好耐好耐，耐到佢都唔知幾耐嗰陣，到底喇。

掹大眼，就見到某個𡃁仔塊臉，坐咗喺隔離，瞓得好稔好稔。

跟手，佢又見到喇。

有人留咗支筆喺度。

※※※

三日月不嬲瞓得好淺。

於是，少少風吹草動，佢就醒咗。

一醒，就見到有人，拿住支麥克筆——對住佢塊臉。

「喂。」

「噢、呃——嗨，早晨！」

佢望望嗰鐘，一啲都唔早。

「……你瞓醒第一件事，就係搞搞震？」

「……做乜啫，唔得呀？」

佢諗咗諗，跟住咁講︰「其實，都冇乜唔得。」

※※※

最後，佢哋都係去唔成戲院。

有個蠢才，仲要觀察多晚，先可以出院。

不過，澳加搵咗部大電視，又買咗蘇萊塔揀嘅碟，再畀鐵華團放咗半日嘅假。

就成班冇睇過戲嘅人，一齊，睇咗次戲。

好平靜嘅一日。

唯一嘅意外，就係有個蠢才，笑得太開心，傷口裂開咗，畀醫生㨘咗一鑊。

ns216.73.217.36da2

Reading Theme:

Font Size:

Line Spacing:

Paragraph Spacing:

Load the next issue automatically