機動戰士高達︰瑪斯子嗣　The Children of Mars - 第四集　我哋搵食㗎喳，唔負責打救世界

CGS基地西南方，三十里外，一塊隱密嘅山谷。

萬里紅沙。

冇幾遠，就係禁區，克里斯當局明令，禁止進入——雖然馬魯巴做人做到呢個歲數，都係唔知點解。

而家佢哋所有人，就瞇埋哂喺呢個山窿。

「仆佢個街，班死𡃁仔，竟然整好咗部廢鐵。」

喺佢面前，薩沙以吵喧巴閉，同街邊啲醉酒佬冇乜分別。

「係雪之丞整好咗部廢鐵。」佢講，「佢同班𡃁仔，不嬲行得好埋。」

「一早就應該對冧佢！而家連大佬都死咗喇！」

朝頭早嘅戰鬥，佢哋損失咗三分一人，因為嗰部高達——包括夏艾達，死得最早嗰批。

佢點著支煙。

「咁而家，你係大佬喇。」

「我？社長？我何德可能……」

「做唔到都要做啊。下面嗰班，想取而代之，我保你唔住啊。」

「佢哋佢哋佢哋——」

「人越少，錢越多，夏艾達就唔會問啲咁嘅問題，你明吖嘛？」

「係嘅，社長！」

「只要過咗呢關，我有人有錢，我，馬魯巴．亞奇，會無辦法東山再——」

嘭！

爆炸，由出面傳來。

「點會？點解佢哋搵到我哋㗎？」

就喺呢個時候，佢側邊部電腦，忽然響喇。

有通訊，佢接通咗。

「嗨，有冇掛住我？」

係域根想要嘅女人。

「你、點會——」

「或者係因為，你錢唔離身？」

佢望向手上，用鐵鍊，同自己綁埋一齊嘅手提箱。

「……八婆你陰我？」

「冇錯喇，偷聽器、發訊器、追蹤器乜都有齊——你唔陰我我唔陰你啊。」

「……同域根作對！你以為喺火星上面，真係有人咁戇鳩，接啲咁嘅生意？」

「又真係有喎——你話係唔係啊？新社長。」

呢個通訊，又多咗一個人。

「多得前社長調教有方，我戇鳩真係唔好意思。」

「澳加．伊祖卡！」

「仲記得吖嘛，我今朝講過啲乜？」

※※※

吔屎啦，馬魯巴！

※※※

澳加接咗入去。

佢前面，只有巴巴托司，拿住支槌，將第一隊啲工兵，當係垃圾咁掃。

天上面，大小姐部白色機，冇落場。

其他嘅人，守住周圍，確保連一隻老鼠，都走唔到出去。

至於佢，其實好得閒，得閒到，可以慢慢欣賞，前社長仆街嘅樣。

「乖乖投降，錢拿出來，我可以留返你一條命。」

「……你呢個土匪！」

「土匪就土匪，我唔介意——我問最後一次，你嘅決定呢？馬魯巴。」

朝頭早，前社長就畀佢呢句，而家原封不動，彈返轉頭，佢點可能拒絕咁嘅機會？

「我、我我我我——我就唔畀。」

咦？出乎意料，前社長仲有啲骨氣。

「喂喂，你以為自己乜處境，可以討價還價？」

「哈、哈、哈——如果我死咗，你開得走鬼火乜？」

屌，點解就係呢種時候，前社長咁清醒嘅？

鬼火要用生物認證解鎖，如果前社長斷咗氣，佢哋就要暴力破解，唔係兩三日搞得掂嘅事。

「所以，我哋來交易啦！澳加！」

「好，就來交易。」

「我不嬲話你醒目！」

「喂，薩沙以，聽唔聽到？」

交易就交易喇。不過交易對象，係前社長後面嗰隻二打六。

「我對社長赤膽忠心，同你呢隻二五仔冇嘢好講！」

「同我捉住前社長，遣散費同長期服務金，我畀夠三倍！」

「Sir，Yes sir！」

哇，真係赤膽忠心，反面唔駛三秒。

※※※

「薩沙以，你呢個反骨仔！」

「呢行講金唔講心，係你教嘅，前社長！」

砰！

薩沙以擝咗槍——不過唔夠佢快。

所以薩沙以死喇。

一向都係廢柴，反骨仔都做唔好。

佢仲未玩完，佢仲有後著！

佢係馬魯巴．亞奇！

※※※

出面。

澳加喺自己嘅工兵上面。

「講金唔講心，關係就係咁脆弱。」

「噢？我哋嘅關係，好似都係差唔多。」

螢幕上面，大小姐笑喇。

「你講得啱。」

就喺呢個時候，山谷發生爆炸，沙塵衝天。

「哇，薩沙以玩到咁大啊？」

「似乎唔係喇。」

沙塵之中，巨人企咗喺身，手拿住槍。

一部機動戰士。

「哈哈哈哈——死𡃁仔！你以為阿叔冇招乜？——」

聲音通過擴音器傳來。

「你阿叔始終係你阿叔，我，係馬魯巴．亞奇——」

忽然，有人笑咗出聲——係大小姐。

「唔係吖嘛？一部古尼捷？雖然唔知道你邊度執到，但係咁嘅貨仔，姐姐我片過好多部囉。」

※※※

馬魯巴唔出聲喇。

佢忽然醒起，喺邊度見過嗰部機——域根啲招兵廣告，單張有時喺天跌落來。

部機就喺上面。

域根啲政治宣傳，同火星領主啲自傳，一鳩樣，信唔過。

但係喺朝頭早，佢一部機，就全滅咗域根成支小隊。

於是，佢做咗一個，最理智的決定。

走佬！

※※※

「……屌！」

三日月喺駕駛艙，聽到澳加把聲，由通訊器傳來。

第一隊已經冇咗一半，剩低嘅已經投降。

「追？」

「咁梗係追啊！」

幾部工兵已經駛緊埋來，自己人，來接替佢——澳加永遠都會安排好。

佢將啲降兵留畀隊友，啟動推進器，向住馬魯巴嘅方向，跳咗過去。

※※※

荒野，風大，漫天紅沙。

已經越追越近，仲爭少少，三日月就追到馬魯巴。

澳加話，唔好將人打死。

真係麻煩。

佢舉起槌，準備掟過去，瞄準對腳。

呢個時候，又有聲，由通訊器傳來。

「停低，而家！」

又係好煩嘅八婆。

※※※

古荻利亞一開始，冇追上去。

隊長話，留返一部喺度，佢都同意。

直到佢睇住地圖，注意到馬魯巴，行緊去乜嘢方向。

禁區。

其他人唔知，但佢知道，點解火星有啲地方，絕對唔可以行入去。

於是佢追咗上去。

只不過，遲咗少少。

硬係遲咗少少。

※※※

喺三日月嘅面前，紅沙沖天，瞬間遮掩天空。

巨大嘅身影，由沙漠之中，爬咗出來。

比起機動戰士，大咗幾倍，似係雀，冇手，得返一隻翼。

鐳射噴出，成個沙漠一分為二——或者係眼花，或者係馬魯巴運氣太好，呢一下，只打斷佢兩隻腳。

「哈斯武、天使、敵人——」

一見到嗰隻雀，佢個頭就痛，仲痛過第一次，開著巴巴托司。

「睇來你清楚過我，阿賴耶識真係好用。」

「……嗰隻係乜來？」

「你自己講咗喇。災難戰爭之中，人類嘅敵人——就連域根，都知得唔多。」

佢個頭有夠痛，如果呢個時候，有人射佢幾槍，應該死梗。

不過，佢幾好彩，隻雀完全冇理佢。馬魯巴應該暈咗。

「你趁而家，執馬魯巴返去。」

「……咁你呢？」

「我去劏咗隻雞，小朋友唔好跟來。」

呢一句，令佢個頭更痛喇。

※※※

「喂，你做乜春？馬魯巴已經喺我哋手，而家——」

「機動裝甲，會自動駛向人口最多嘅地方——我轉頭返來。」

一講完，通訊就斷咗，澳加點接都接唔通。

「而家點算，澳加？」

反而第個接咗入來，係三日。

「點乜嘢算？錢喺度喇，人都喺度喇！收隊，返去——」

「附近人口最多嘅地方，克里斯。」

「……關我哋鬼事？我哋搵食㗎喳，唔負責打救世界。」

再者，對付啲咁嘅嘢，畀多多錢，佢都唔制。

「阿櫻、曲琪、克歷嘉，佢哋就住喺克里斯出面。」

畢斯杰特嘅屋企人——同佢哋唔同，畢斯杰特仲有屋企，可以寄錢返去。

佢十五十六嗰陣，又有人開口喇。

「收隊，澳加。」

「……畢斯杰特？」

畢斯杰特拉低咗頂帽，遮住自己塊臉。

「我哋接單搵食，風險太高唔做，冇錢搵嘅，更加唔做。」

「……係，你講得啱。」

佢望向螢幕，繼續講︰

「喂，三日，打死嗰隻雀，畢斯杰特之後三個月份糧，落你嘅袋。」

三日笑喇。

「Roger。」

※※※

肥雞全速前進，直線駛向克里斯。

古荻利亞跟喺後面。

其實，佢可以完全唔理呢件事——伊謝魯根特就唔會理。

根據域根交戰守則，如果有人蠢到，喺火星荒野，吵醒一部機動裝甲的話——

走。

走得越快越好。

如果非打不可嘅話，最少需要一支機動戰士大隊，加上相應嘅戰艦，提供炮火支援。

事後，你都好可能畀人處決，因為你嘅愚蠢，令域根承受極大，而且毫無需要嘅損失。

不過，根據傳說，亞古尼卡．卡艾盧，一生之中，擊落過幾百部機動裝甲。

一個人，一部機，兩把劍。

「喂，戰達斯，你唔係高達，我唔係亞古尼卡，不過呢度只係隻肥雞，得返半條命。」

少咗隻翼，斷咗條尾，頭殼冇咗半個——

打得贏嘅，佢哋。

佢掹雞，鐳射火神砲發射，子彈打落目標上面，只有濺起火花。

納米積層裝甲，同高達一樣，鐳射唔會有用。

肥雞停低咗，頭望向佢。

鐳射擦身而過。

佢變型，擝劍，跳咗落去。

如果芙拉姆喺度，肯定屌柒佢——白痴，你扮乜撚英雄啊！

※※※

其實唔係好難。

只要咪畀人打中，拿把劍插落去，插得夠深，佢就贏了。

肥雞越打越縮，離開咗原本軌道，佢大概做啱喇。

忽然，後尾枕寒咗一寒。

肥雞向天雞叫，地面隨即震盪，更多小型機體，黑色，喺紅沙爬咗出來。

屌。

隻肥雞係專登引佢過來。

※※※

三日月遲咗少少。

要先送馬魯巴返去，巴巴托司又唔識飛——

等佢趕到時，情況大概係咁︰

一部白色機，拿住兩把劍，周旋喺幾十部普隆瑪之間。

咁嘅動作，簡直唔係人——同佢打嘅時候，嗰個女人，根本只係喺度玩。

「喂，𡃁仔，你喺度做乜？」

「……幫手？」

「過主，我唔得閒，冇時間湊細路。」

唉，呢條八婆，個腦肯定有嘢。

佢踩油門，當冇聽到，舉起支槌，掃落黑色嘅蟲海。

「你一個人打唔贏，巴巴托司係咁樣講。」

「關你鬼事？你傭兵搵食㗎喳，冇錢收嘅咪做。」

「唔好彩，識得有人，住喺克里斯出面。」

「你條女？」

「畢斯杰特啲屋企人。」

通訊靜咗一陣。

「……死𡃁仔，你肯定唔長命。」

「你大概都一樣。」

「哈——我同你開路，車死佢。」

※※※

澳加到嗰陣，天差唔多光。

高達拿住矛槌，背對晨曦，企喺巨獸殘骸上面。

白色嘅機，挨住把劍，跪喺紅沙上面，周圍都係零件。

「唏，社長，你嗰邊，有冇熱水涼？」

「有，就呢一次，你想要乜，我都同你搵。」

※※※

就咁樣，克里斯嗰幾百萬人，避過咗一場危機。

雖然，冇乜人知道。

555Please respect copyright.ＰＥＮＡＮＡg6ygCuwC64

ns216.73.216.136da2

Reading Theme:

Font Size:

Line Spacing:

Paragraph Spacing:

Load the next issue automatically