機動戰士高達︰瑪斯子嗣　The Children of Mars - 第二十二集　救世主(一)

只係爭少少，殖民衛星就跌咗落來，於是，全地球嘅細路，多多少少，都拿到幾日假期。

奇奧都一樣，學校下個禮拜先開返。再加上，阿爺出咗去，呢幾日都唔會返來。於是乎，佢就做咗，任何正常十三歲細路，都會做嘅事——

打機，打到天光。

裝住核彈嘅米別斯，已經打哂落來，剩返嘅，就係創世——已經練咗成個月，呢一鋪，佢肯定打沉天意——睇住來啦！拉．魯．古魯謝！

嗶、嗶——就喺咁嘅時候，警報竟然響咗。

唔係駕駛艙，係佢哋屋企後門。

海底嗰個。

※※※

「……好黑、好恐怖。」

三日月而家，遇上咗自己一生至今，最為恐怖嘅對手——啲牙長過塊臉，頭頂掛住支燈嘅奇怪生物。

佢仲喺出面呀！

※※※

「喔哈哈——我去閂咗嗰窗。」

「燈籠魚啫，使唔使嚇成咁啊？」

佢哋而家出咗大天使，喺架潛水艇上面，莉古絲小姐話，要再拜訪一位朋友。

雖然蘇萊塔都諗唔到，點解連自己都畀人嗌埋來。

「其實，」佢講︰「海底同宇宙，差唔多啫。」

黑色，冇空氣，牆穿咗就死得，冇乜分別喎。

「宇宙出面冇怪物……」三日月講，仲抱住兩隻腳。

「係呀，」古荻利亞講，一樣抱住兩隻腳︰「嗰隻嘢仲喺度諗，餓，好味……」

小姐，你食咗啲乜，先會去讀一條魚嘅心？

呢個時候，佢哋開始見到陸地喇，岩壁上面有個入口，大到可以畀機動戰士通過。

※※※

菲利特覺得，自己就快散喇。

緊急射上太空，擊落衛星殘骸，再同預備好嘅船會合，跟住降落地球——過程中，仲要避開域根，或者更唔應該遇到嘅嘢——足足三日，佢都冇好好合埋眼。

已經六張幾嘢喇，真係唔可以咁玩。

直到返來奧布，佢先敢唞吓——諒古拿托，仲未敢喺佢哋地方，對佢郁手。

車停咗。

「阿叔，我哋到喇。」

「哦？——哦，唔該哂，蓋里奧。」

等佢再清醒啲，車門已經開咗，蓋里奧都落咗車。

「使唔使我扶你？」

「唔該，我未有咁老。」

雖然條腰，真係痛緊——佢無視嗰個𡃁仔，挑釁嘅微笑，自己落咗車。

再行幾步，佢就察覺到喇，屋企多咗一陣，熟悉嘅氣息。

「呵呵，」佢講︰「似乎我哋有訪客。」

「你又扮神棍呀？」

「再早返廿年，你未停車，我就已經知道喇。」

「頭先先有人話自己未老。」

一行到門口，門就自己開喇，佢個孫衝咗出來。

「阿爺，你估吓，係邊個來咗？」

「哦？係邊個呢？」

仲會係邊個，咪就係——

佢行到入廳，即刻笑唔出喇——唔計出面啲保鑣，同埋蓋里奧，佢感應到嘅人，兩個；預計見到嘅，三個；最後出現嘅，五個。

其中三個，都戴住咗，好冇品味嘅頭盔——普洛斯佩拉嘅頭盔。

肯定係奇奧嘅主意，察覺到佢返來，準備咗小小嘅惡作劇。

不過，佢笑唔出嘅原因，係因為來嘅人。

「……呢個時候，你唔應該喺度㗎，莉古絲。」

「喔哈哈——冇事㗎喎，我哋今次好乖，行後門入來㗎。」

粉紅色嘅女仔，笑住同佢咁講——話說，海底嗰個後門，應該得佢哋屋企嘅人先知道。

其餘嘅人，都跟住除咗頭盔。等到見到嗰個，金色長髮嘅女仔，佢先知道，費特力克行到邊一步喇。

「咳、咳，先此聲明啦——」

※※※

「——掟尤尼烏斯七號落來嘅人，真係唔係我。」

古荻利亞討厭狐狸，老嘅嫩嘅都一樣，佢哋最鍾意，就係講一半，唔講一半——點解冇人同佢講過，呢度就係亞斯諾屋企？

粉紅，你陰我，AGAIN！

嗰個亞斯諾，成立阿麗安蘿德，組織起監察局，將成萬個，域根相關人士，送咗上斷頭台嘅亞斯諾呀！——雖然成萬人唔算好多，不過佢得一個頭喳！

點算好，而家走佬都來唔及喇，出面幾廿個保安，好難甩身——

「嗯，費特力克同我講咗。」

咦？唔係話嗰個阿伯，退咗休好耐嘅乜？173Please respect copyright.ＰＥＮＡＮＡTuXrn2n2KJ

ns216.73.216.55da2

Reading Theme:

Font Size:

Line Spacing:

Paragraph Spacing:

Load the next issue automatically